শ্ৰীমন্ত শংকৰ একাডেমী উচ্চতৰ মাধ্যমিক বিদ্যালয়ে গুৱাহাটীৰ দিচপুৰৰ ইয়াৰ বিদ্যালয় চৌহদত বিদ্যালয়খনৰ প্ৰতিষ্ঠাপক সভানেত্ৰী প্ৰয়াত বীনা চৌধুৰীৰ স্মৃতিত শনিবাৰে এখন আন্ত:বিদ্যালয় বৰগীত প্ৰতিযোগিতাৰ আয়োজন কৰে।
অধ্যক্ষ ড০ গীতা দত্ত বৰুৱাই তেওঁৰ উদ্গনিমূলক ভাষণেৰে অনুষ্ঠানত উপস্থিত থকা সকলোকে আদৰণি জনায়।
বিশিষ্ট সংগীতজ্ঞ তথা সুৰকাৰ ৰমেন চৌধুৰীয়ে অনুষ্ঠানত মুখ্য অতিথি হিচাপে উপস্থিত থাকি এক সাৰুৱা ভাষণ আগবঢ়ায়।
চৌধুৰীয়ে তেওঁৰ ভাষণত বৈষ্ণৱ গুৰু মহাপুৰুষ শংকৰদেৱ আৰু মহাপুৰুষ মাধৱদেৱৰ এই অনবদ্য সৃষ্টিৰ ওপৰত আলোকপাত কৰে। সংগীতজ্ঞগৰাকীয়ে লগতে নতুন প্ৰজন্মৰ মাজত মহাপুৰুষ দুগৰাকীৰ বাণীসমূহ প্ৰসাৰত গুৰুত্ব আৰোপ কৰে।
বিদ্যালয় চৌহদত আয়োজন কৰা বৰগীত প্ৰতিযোগিতাখনত বিচাৰকৰ দায়িত্বত আছিল খনা দাস, অনন্ত ওজা আৰু কৃষ্ণ গোস্বামী।
প্ৰতিযোগিতাখনত শ্ৰীমন্ত শংকৰ একাডেমীৰ শ্ৰেয়া দাস আৰু বিমৃশা বিমলে যুটীয়াভাৱে প্ৰথম পুৰস্কাৰ লাভ কৰে। দিল্লী পাব্লিক স্কুলৰ কৃষ্ণা ডেকা আৰু ছেন্ট ফ্ৰান্সিস ডি’ এএছএছআইএছআই ছিনিয়’ৰ ছেকেণ্ডাৰী স্কুলৰ দেবাং ৰাজ কলিতাই ক্ৰমে দ্বিতীয় আৰু তৃতীয় পুৰস্কাৰ লাভ কৰে।
পুৰস্কাৰ লাভ কৰা সকলক এটা ট্ৰফীৰ লগতে প্ৰথম পুৰস্কাৰৰ বাবে ১০,০০০ টকা, দ্বিতীয় পুৰস্কাৰৰ বাবে ৭,০০০ টকা, তৃতীয় পুৰস্কাৰৰ বাবে ৫,০০০ টকা আৰু নিচুকনি পুৰস্কাৰ ৩,০০০ টকাকৈ আগবঢ়োৱা হয়।
প্ৰতিযোগিতাখনত ১৯ খন বিদ্যালয়ৰ ছাত্ৰ-ছাত্ৰীয়ে অংশগ্ৰহণ কৰিছিল।
অধ্যক্ষ ড০ গীতা দত্ত বৰুৱাই কয়, ‘’ অনুষ্ঠানটো সদায় স্মৰণীয় হৈ থাকিব যিটো সকলোৱে মনত ৰাখিব।‘’
ইয়াৰ আগেয়ে বিদ্যালয়খনে যোৱা বছৰৰ ৪ ডিচেম্বৰত ‘ফাষ্ট ষ্ট্ৰোক-৩’ শীৰ্ষক এখন চিত্ৰ প্ৰদৰ্শনীৰ আয়োজন কৰিছিল। চিত্ৰ প্ৰদৰ্শনীখন গুৱাহাটীৰ পাঞ্জাবাৰীৰ শ্ৰীমন্ত শংকৰদেৱ কলাক্ষেত্ৰত বিশিষ্ট শিল্পী মুনীন্দ্ৰ নাৰায়ন ভট্টাচাৰ্যই মুকলি কৰিছিল।
বৰগীত হৈছে পোন্ধৰ-ষোল্ল শতিকাত বৈষ্ণৱ গুৰু মহাপুৰুষ শংকৰদেৱ আৰু মহাপুৰুষ মাধৱদেৱে ৰচনা কৰা সুৰীয়া গীত। ‘একশৰণ নাম ধৰ্ম’ৰ লগত জড়িত নামঘৰসমূহত বৰগীতক প্ৰাৰ্থনা সেৱাত ব্যৱহাৰ কৰা হয়।
