নাগালেণ্ডৰ শাসনাধিষ্ঠিত নেশ্যনেল ডেম’ক্ৰেটিক প্ৰগ্ৰেছিভ পাৰ্টি (এন ডি পি পি)-এ আজি এটা স্পষ্টীকৰণৰ জৰিয়তে এইটো স্পষ্ট কৰে যে মুখ্য মন্ত্ৰী নেইফিঅ’ ৰিঅ’ই যোৱা ১৩ জুনত নতুন দিল্লীত একাংশ সংবাদ মাধ্যমৰ আগত এই বুলি স্পষ্টকৈ কৈছিল যে সকলো নাগালেণ্ডৰ চুবুৰীয়া অঞ্চলবোৰক একত্ৰিকৰণ কৰাৰ নাগাসকলৰ যি দাবী আৰু আকাংক্ষা সেয়া স্বাভাৱিক।
উক্ত দিনা নতুন দিল্লীত কেন্দ্ৰীয় গৃহ মন্ত্ৰী ৰাজনাথ সিং আৰু ভাৰত চৰকাৰৰ অন্যান্য বিষয়াৰ সৈতে হোৱা বৈঠকৰ পিছত একাংশ ইলেকট্ৰনিক মাধ্যমৰ আগত দিয়া তেওঁৰ সাক্ষাৎকাৰত মুখ্য মন্ত্ৰীজনে মাত্ৰ তেওঁক আৰু ৰাজ্য চৰকাৰখনক জনোৱা খবৰহে প্ৰকাশ কৰিছিল। এই কথা আজি প্ৰকাশ কৰা এন ডি পি পিৰ মিডিয়া আৰু কমিউনিকেইশ্যন কমিটীৰ এটা প্ৰেছ বিজ্ঞপ্তিত কোৱা হয়।
“মুখ্য মন্ত্ৰীৰ টেলিভিশ্যন সাক্ষাৎকাৰটোৰ প্ৰতিলিপি পৰ্য্যালোচনা কৰি চাব পৰাকৈ সকলোৰে বাবে ৰাজহুৱা ডমেইনত উপলব্ধ।” প্ৰেছ বিজ্ঞপ্তিটোত কোৱা হয়।
বিজ্ঞপ্তিটোত আৰু কোৱা হয় যে ৰিঅ’ই এই কথাটো কৈছিল যে কেন্দ্ৰই এই কথাও জানিবলৈ দিছিল যে ভৌগোলিক একত্ৰিকৰণ সম্ভৱ নহয়, যিটো আছিল আলোচনাৰ মূল বিন্দু।
“এইটো মুখ্য মন্ত্ৰী আৰু তেওঁৰ প্ৰতিনিধিকেইজনক কেন্দ্ৰৰ দ্বাৰা জনোৱা কথা আৰু সেই গতিকে সেয়া তেওঁৰ ব্যক্তিগত মত আৰু তেওঁৰ দলৰ মত বা পি ডি এ চৰকাৰৰ মত নহয়।” এইদৰে কোৱা হয় দলৰ বিজ্ঞপ্তিটোত।
আচলতে এই মন্তব্যক একাংশ সংবাদ মাধ্যৰ দ্বাৰা ভুলকৈ ব্যাখ্যা কৰা হৈছে আৰু ইয়াক লৈ চাঞ্চল্যৰ সৃষ্টিৰ প্ৰয়া কৰা হৈছে। বিজ্ঞপ্তিটোত কয়।