ভ্ৰাম্যমাণৰ জনপ্ৰিয় অভিনেত্ৰী অঞ্জলি চেত্ৰীক অচ্যুত লহকৰ স্মাৰক বঁটা প্ৰদান
ভ্ৰাম্যমাণৰ মঞ্চত কেইবা দশক ধৰি বলিষ্ঠ অভিনয়েৰে আলোড়নৰ সৃষ্টি কৰি অহা প্ৰবীণ অভিনেত্ৰী অঞ্জলি চেত্ৰীক ১৭ জুনত প্ৰদান কৰা হয় অচ্যুত লহকৰ স্মাৰক বঁটা।
সমাজ সংস্কৃতিমূলক অনুষ্ঠান ‘মঞ্চ’ই আগবঢ়োৱা এই বঁটা প্ৰদান কৰে প্ৰয়াত অচ্যুত লহকৰৰ সহধৰ্মিণী কিৰণ লহকৰ আৰু বিশিষ্ট অভিনেতা তথা চলচ্চিত্ৰ আৰু বিত্তীয় উন্নয়ন নিগমৰ অধ্যক্ষ যতীন বৰাই।
অভিনেত্ৰীগৰাকীক বঁটাৰ লগত এখন গামোচা, স্মাৰক, সম্বৰ্ধনাপত্ৰ, গ্ৰন্থৰ টোপোলা, ফুলৰ থোপা, জাপি প্ৰদান কৰা হয়। অঞ্জলি চেত্ৰীয়ে বঁটা গ্ৰহণ কৰি আৱেগিক হৈ উঠি কয়, ‘ভ্ৰাম্যমাণে মোক ছাঁ দিছে। জীয়াই থাকিবলৈ, পৰিয়াল পোহ-পাল দিবলৈ সম্বল দিছে। অচ্যুত লহকৰে ভ্ৰাম্যমাণৰ জন্ম নিদিলে মোৰ দৰে বহু অভিনয় শিল্পীয়ে জীয়াই থকাটো কঠিন হৈ পৰিলেহেতেন’।
আনহাতে এই অনুষ্ঠানত উপস্থিত থকা বিশিষ্ট অভিনেতা যতীন বৰাই কয় যে অঞ্জলি চেত্ৰী ভ্ৰাম্যমাণ থিয়েটাৰৰ এটা অনুষ্ঠান। তেওঁৰ দৰে প্ৰতিভাশালী অভিনেত্ৰীক বঁটা প্ৰদান কৰিবলৈ পায় যথেষ্ট সুখী।
ইফালে বিশিষ্ট অতিথি হিচাপে উপস্থিত থকা ভ্ৰাম্যমাণ থিয়েটাৰৰ বিশিষ্ট নাট্যকাৰ অভিজিৎ ভট্টাচাৰ্যই কয় যে ভ্ৰাম্যমাণৰ প্ৰতিজন দৰ্শকৰে অতিকৈ আপোন অঞ্জলি চেত্ৰী। অভাৱনীয় প্ৰতিভাৰে ভৰপূৰ এনে এগৰাকী অভিনেত্ৰীয়ে জীৱনত নানা ঘাত-প্ৰতিঘাতেৰে আগবাঢ়িবলগীয়া হোৱাটো সঁচাই চিন্তনীয়।
উল্লেখ্য যে হেমন্ত ভট্টাচাৰ্যৰ সভাপতিত্বত অনুষ্ঠিত হোৱা বঁটা প্ৰদান অনুষ্ঠানত বহুতো বিশিষ্ট ব্যক্তিক সম্বৰ্ধনা জনোৱাৰ লগতে স্মৰণিকা ‘স্বপ্নদ্ৰষ্টা’ উন্মোচন কৰে অসম আৰক্ষীৰ মহাপৰিদৰ্শক প্ৰদীপ চন্দ্ৰ শালৈয়ে।
বঁটা প্ৰদান অনুষ্ঠানৰ সম্পাদক ড০ নীলোৎপল শৰ্মাই আঁত ধৰা অনুষ্ঠানটোত বিশিষ্ট অতিথি হিচাপে উপস্থিত থাকে এমট্ৰনৰ প্ৰবন্ধক দীনমণি ভাণ্ডাৰ কায়স্থ।