ৰাজ্যৰ যান বাহন আৰক্ষী আৰু পৰিবহন বিভাগে যাতায়ত আইন কানুন নমনা লোকসকলৰ বাবে যিমানেই জৰিমনা বা শাস্তিৰ প্ৰয়োগ নকৰক কিয় তথাপিও ৰাজ্যৰ পথ সমূহত অসাৱধানতা তথা নিয়মানুৱৰ্তিতা মানি নচলাই পৰিলক্ষিত হয়। বিশেষকৈ বৰ্তমান সমাজৰ যুৱ শ্ৰেণীয়ে যান বাহন আৰক্ষী বা পৰিবহন বিভাগৰ আইন কানুন মুঠেই মানি নচলে। যাৰ ফলত সঘনাই ৰাজপথত ভয়াবহ তথা কৰুণ দুৰ্ঘটনা বৃদ্ধি পাবলৈ ধৰিছে। এই সমূহ ৰোধ কৰা তথা বাইক আৰোহীসকলক সাৱধানতা অৱলম্বন কৰোৱাৰ বাবে দৰং জিলাৰ আৰক্ষীক সহায় কৰাৰ উদ্দেশ্যৰে মঙলদৈৰ এখন ব্যক্তিগত খণ্ডৰ বিদ্যালয় গ্ল’ৰিয়াছ পাব্লিক স্কুলৰ ছাত্ৰ-ছাত্ৰীৰ এটা দলে আগবাঢ়ি আহিছে। এই ছাত্ৰ-ছাত্ৰীৰ দলটোৱে ৰাজপথত নিয়ম মানি নচলা মটৰ চাইকেল আৰোহীক ৰখাই এপাহ ফুল আৰু মিঠাই খুৱাই তেওঁলোকৰ ভুলবোৰ আঙুলিয়াই দিয়াৰ এক অনন্য ৰুপত প্ৰয়াস কৰা কাৰ্যই বিশেষ চৰ্চিত হৈছে।
মনকৰিবলগীয়া যে নতুন বছৰ উপলক্ষে বিদ্যালয়খনৰ কৰ্তৃপক্ষই মঙলদৈ-ভূটিয়াচাং ৰাজপথত প্ৰায় ৫০গৰাকী শিশুৰ দ্বাৰা এই অনন্য কাৰ্যসূচী বুধবাৰে গ্ৰহণ কৰে। এই শিশু সকলে বাইক আৰোহী সকলৰ সাৱধানতা অনলম্বন কৰোৱাৰ উদ্দেশ্যৰে ‘সদায় হেলমেট পৰিধান কৰা’, ‘তীব্ৰ গতিত বাইক নচলোৱা’, ‘বাইক চলোৱা সময়ত মদ্যপান কৰিবলৈ মানা কৰা’ আদি বিভিন্ন শ্লোগান তথা প্লে কাৰ্ডেৰে ৰাজপথলৈ ওলাই আহে। শিশু সকলৰ এই অনবদ্য কাৰ্যসূচী ৰুপায়ণত বিদ্যালয় সঞ্চালক মিজানুৰ ৰহমানৰ লগতে বিদ্যালয়ৰ অধ্যক্ষা বন্দনা শৰ্মা বৰদলৈও উপস্থিত থাকে।
শিশুসকলে কৰা এঘণ্টীয়া কাৰ্যসূচীত দৰং আৰক্ষীৰ অধীক্ষক শ্ৰীজিঠ থিৰাভিয়াম, অতিৰিক্ত আৰক্ষী অধীক্ষক সত্যজিত নাথৰ লগতে বহুতো লোকে উৎসাহ তথা প্ৰেৰণা যোগায়। ইয়াৰ উপৰি মঙলদৈৰ বিধায়ক গুৰুজ্যোতি দাসে বিদ্যালয় কৰ্তৃপক্ষ তথা ছাত্ৰ-ছাত্ৰীসকলে দেখুওৱা সামাজিক দায়বদ্ধতাৰ বাবে ধন্যবাদ তথা শুভেচ্ছা প্ৰদান কৰে।
