মণিপুৰ আৰক্ষীয়ে কালি এক অভিযান চলাই সেনাপতি জিলাৰ ২ নং ৰাষ্ট্ৰীয় ঘাইপথৰ ট্ৰিনিতি হোটেলৰ সমীপৰ পৰা দুজন নিচাযুক্ত ড্ৰাগছ সৰবৰাহকাৰীক গ্ৰেপ্তাৰ কৰিবলৈ সক্ষম হয়।
ড্ৰাগছ সৰবৰাহকাৰী দুজনক সেনাপতি জিলাৰ ছিডাম নেপালী গাঁৱৰ শুভাস গুৰুং (৩৬) আৰু অ’কলং খুনৈৰ পৰশুৰাম গুৰুং বুলি চিনাক্ত কৰা হৈছে।
মণিপুৰৰ আৰক্ষী বিভাগৰ পৰা প্ৰকাশিত এক প্ৰেছ বিজ্ঞপ্তি মতে, লোকদুজনৰ পৰা জব্দ কৰা ৭ কিলো ওজনৰ নিচাযুক্ত ড্ৰাগছখিনিৰ মূ্ল্য স্থানীয় বজাৰত প্ৰায় ৫,৬০,০০০ টকা হ’ব।
আনহাতে, এক বিশেষ সূত্ৰৰ পৰা পোৱা খবৰৰ বিত্তিত আৰক্ষীৰ আন এটা দলে পূব ইম্ফল জিলাৰ মাতৃপুখুৰী অঞ্চলৰ পৰা এজন ড্ৰাগছৰ চোৰাং সৰবৰাহকাৰীক আটক কৰিছিল।
সেই অভিযানত আটক কৰা ব্যক্তিগৰাকীক মণিপুৰৰ উখৰুল জিলাৰ চাংগাম টাংখুলৰ পত্নি ৰেইমিচ’ন টাংখুল (৩৭) বুলি চিনাক্ত কৰা হৈছে। তেওঁৰ পৰা আৰক্ষীয়ে ১ গ্ৰাম হেৰ’ইন পাউডাৰ উদ্ধাৰ কৰিবলৈ সক্ষম হয়।
ঘটনা সম্পৰ্কত এক গোচৰ ৰুজু কৰি আৰক্ষীয়ে ইতিমধ্যে তদন্ত আৰম্ভ কৰিছে বুলি জানিবলৈ দিয়ে।
