নগাঁও কলেজৰ মহাৰজত জয়ন্তী উপলক্ষে ১৭ জুনত ২০০৫ বৰ্ষত উত্তীৰ্ণ হোৱা প্ৰাক্তন ছাত্ৰ-ছাত্ৰীসকলৰ এক সতীৰ্থ সন্মিলন অনুষ্ঠিত হয়। সন্মিলনত প্ৰাক্তন ছাত্ৰ-ছাত্ৰী সকলে নগাঁও কলেজৰ প্ৰাক্তন অধ্যক্ষ মহেন্দ্ৰ আহোমৰ লগতে বিভিন্ন জনক সম্বৰ্ধনা জ্ঞাপন কৰে।
সম্বৰ্ধনা গ্ৰহণ কৰি মহেন্দ্ৰ আহোমে আবেগিক হৈ কয় যে তেওঁ জীৱনত কেইবাখনো শিক্ষানুষ্ঠানত কাম কৰিছিল কিন্তু নগাঁও কলেজত অধ্যক্ষৰ আসনত বহি যিকেইবছৰ কাম কৰিছিল, সেই সময়বোৰ তেওঁৰ জীৱনত বেছি সেউজ আৰু গুৰুত্বপূৰ্ণ হৈ আছে।
উল্লেখ্য যে জাগীৰোড কলেজৰ অধ্যক্ষৰ পদ এৰি আহি নগাঁও কলেজত অধ্যক্ষ হিচাপে কিছু বছৰ কাম কৰাৰ পাছত তেজপুৰ বিশ্ববিদ্যালয়ত পঞ্জীয়ক পদত যোগদান কৰে আৰু সেই পদৰ পৰাই তেওঁ অৱসৰগ্ৰহণ কৰিছিল।
প্ৰাক্তন অধ্যক্ষগৰাকীয়ে লগতে কয় যে, অনুশাসন থাকিলেহে এখন শিক্ষানুষ্ঠান সফলতাৰ দিশত আগবাঢ়িব পাৰে। মেধাৰ ভিত্তিত নামভৰ্তিৰ পৰা আৰম্ভ কৰি পৰীক্ষালৈকে সকলো ক্ষেত্ৰত নিষ্ঠাসহকাৰে কাম কৰাৰ দৰকাৰ। বৰ্তমান নগাঁও কলেজৰ আন্ত:গাঁথনিৰ উন্নয়ন আৰু বিদ্যায়তনিক উন্নয়ন সমান্তৰালভাবে চলিছে বুলি মন্তব্য কৰি প্ৰাক্তন অধ্যক্ষ আহোমে সন্তোষ প্ৰকাশ কৰে।
এই সম্বৰ্ধনা সভাত বাণিজ্য বিভাগৰ অৱসৰপ্ৰাপ্ত অধ্যাপক ৰূপদাকান্ত ভূঞা, বৰ্তমানৰ অধ্যক্ষ ড° শৰৎ বৰকটকী আৰু প্ৰাক্তন ছাত্ৰ সন্মিলনৰ সম্পাদক ড° চিন্তামণি শৰ্মা, অসম কলেজ শিক্ষক সংস্থাৰ সভাপতি বিশ্বজিৎ ভূঞাকো প্ৰাক্তন ছাত্ৰ-ছাত্ৰীসকলে সম্বৰ্ধনা জ্ঞাপন কৰে।
সম্বৰ্ধনা গ্ৰহণ কৰি অৱসৰপ্ৰাপ্ত অধ্যাপক ৰূপদাকান্ত ভূঞাই কয় যে চাকৰিত যোগদান কৰাৰ সময়ত তেওঁৰ বাণিজ্য বিষয়ত স্নাতকোত্তৰ ডিগ্ৰী আছিল যদিও পিছলৈ তেওঁ ইংৰাজী, আইন, ৰাজনীতি বিজ্ঞানত স্নাতকোত্তৰ ডিগ্ৰী লাভ কৰে। অৱসৰগ্ৰহণ কৰাৰ পাছত বৰ্তমান তেওঁ ছ’চিয়ল’জি বিষয়ত স্নাতকোত্তৰ পৰীক্ষা দি আছে। জীৱনত পঢ়া আৰু পৰীক্ষা দিয়া কেতিয়াও শেষ নহয় বুলি তেওঁ উল্লেখ কৰে।
আনহাতে বৰ্তমানৰ অধ্যক্ষ ড° বৰকটকীয়ে চলিত বছৰৰ ৭ আগষ্টৰ পৰা হ’বলগীয়া মহাৰজত জয়ন্তীৰ কাৰ্যসূচীৰ বিষয়ে অৱগত কৰি প্ৰাক্তন ছাত্ৰ-ছাত্ৰীসকলক এই মহাৰজত জয়ন্তীৰ কাৰ্যসূচীত অংশগ্ৰহণ কৰিবলৈ আহ্বান জনায়।
উল্লেখযোগ্য যে মধ্য অসমৰ এই ঐতিহ্যমণ্ডিত শিক্ষানুষ্ঠানখনে ভাৰতৰ স্বাধীনতাৰ আগতেই প্ৰতিষ্ঠা লাভ কৰিছিল। সাহিত্যাচাৰ্য যজ্ঞেশ্বৰ শৰ্মা এই কলেজৰ প্ৰথমগৰাকী অধ্যক্ষ আছিল। ভাষা আন্দোলনৰ শ্বহীদ অনিল বৰা এই কলেজৰ প্ৰাক্তন সাধাৰণ সম্পাদক আছিল। বুৰঞ্জীৰ পৃষ্ঠা চহকী কৰা এই কলেজৰ বহুতো ঘটনাৰ কথা ২০০৫ বৰ্ষৰ প্ৰাক্তন সতীৰ্থসকলে ৰোমন্থন কৰে আৰু মহাৰজত জয়ন্তীৰ কাৰ্যসূচীত অংশগ্ৰহণ কৰিবলৈ সংকল্পবদ্ধ হয় বুলি প্ৰাক্তন সতীৰ্থ সন্মিলনৰ অন্যতম সদস্য পংকজ মহন্তই জানিবলৈ দিয়ে।
মৌচম দাস আৰু পংকজ মহন্তই আঁত ধৰা এই অনুষ্ঠানত প্ৰাক্তন ছাত্ৰ-ছাত্ৰীসকলে নিজৰ কলেজীয়া দিনৰ সোণালী অতীত ৰোমন্থন কৰি এক প্ৰকাৰ আবেগিক হৈ পৰা পৰিলক্ষিত হয়।
