কোকৰাঝাৰৰ গ্ৰীণ হাৰ্ট নেইচ্যাৰ ক্লাবৰ উদ্যোগত মানস ৰাষ্ট্ৰীয় অভয়াৰণ্যত পাচঁদিনীয়া কাৰ্যসূচীৰে এটা প্ৰকৃতি সজাগতা শিবিৰ অনুষ্ঠিত হৈ যায়।
গ্ৰীণ হাৰ্ট নেইচ্যাৰ ক্লাবক শিবিৰটো অনুষ্ঠিত কৰাত সহযোগিতা আগবঢ়াই বন বিভাগ আৰু বি টি চি প্ৰশাসনে।
অনুষ্ঠানটো শুভউদ্বোধন কৰে বি টি চিৰ শিক্ষা সঞ্চালক আৰ এছ বৰগয়াৰীয়ে। চিৰাং জিলাৰ বিদ্যালয় পৰিদৰ্শক জয়পাল ব্ৰহ্ম, হাল্টুগাঁও মণ্ডলৰ মাণ্ডলিক বন বিষয়া, চিমবৰগাওঁ উচ্চ মাধ্যমিক বিদ্যালয়ৰ প্ৰধান শিক্ষকৰ লগতে বিভিন্ন সন্মানীয় লোক শিবিৰটোত উপস্থিত থাকে।
ঘাইকৈ ছাত্ৰ-ছাত্ৰীসকলৰ বাবে আয়োজিত প্ৰকৃতি শিবিৰটোত কোকৰাধাৰ, চিৰাং, বাকসা আৰু ওদালগুৰি জিলাৰ বিভিন্ন বিদ্যালয়ৰ পঞ্চম শ্ৰেণীৰ পৰা দশম শ্ৰেণীলৈ অধ্যয়ণৰত ৬৭ গৰকী ছাত্ৰ-ছাত্ৰীয়ে অংশগ্ৰহণ কৰে।
এছ বৰগয়াৰীয়ে প্ৰকৃতি সজাগতা শিবিৰ অনুষ্ঠানত সৰহ সংখ্যক ছাত্ৰ-ছাত্ৰী তথা যুৱ সমাজৰ উপস্থিতি দেখি উৎফুল্লিত হোৱা দেখা যায়। তেওঁ এই কৰ্মশালাৰ জৰিয়তে ছাত্ৰ-ছাত্ৰীসকলে প্ৰকৃতি সম্পৰ্কে বিভিন্ন জ্ঞান আহৰণ কৰিব পাৰিব বুলিও মন্তব্য কৰে।
তেওঁ নিজৰ ভাষণ প্ৰসংগত এই শিবিৰৰ গুৰুত্ব সম্পৰ্কত মত প্ৰকাশ কৰি কয় যে ভবিষৎ প্ৰজন্মক প্ৰকৃতি সংৰক্ষণ তথা সুৰক্ষাৰ বিষয়ে অৱগত কৰোৱাৰ বাবে আৰু অধিক এনেধৰণৰ শিবিৰৰ আয়োজন কৰাৰ প্ৰয়োজন।
ভবিষ্যতত এনেধৰণৰ প্ৰকৃতি সজাগতামূলক অনুষ্ঠান আৰু যুৱ সমাজৰ মাজত সংৰক্ষণ সম্পৰ্কীয় সজাগতা বৃদ্ধি কৰাৰ বাবে সঞ্চালকগৰাকীয়ে নিজৰ ফালৰ পৰা সম্পূৰ্ণ সহযোগিতা আগবঢ়াব বুলিও মন্তব্য কৰা দেখা যায়।
আনহাতে গ্ৰীণ হাৰ্ট নেইচ্যাৰ ক্লাবৰ অধ্যক্ষ বাবলু দেয়ে কয় যে প্ৰত্যেক বছৰে প্ৰকৃতি সম্পৰ্কীয় এনেধৰণৰ সজাগতা অনুষ্ঠান আয়োজন কৰা উত্তৰ-পূবৰ এইটোৱে একমাত্ৰ সংগঠন।
সজাগতামূলক শিবিৰটো সাফল্য মণ্ডিত কৰাত সহায় সহযোগিতা আগবঢ়োৱা সকলোকে সংগঠনটোৰ ফালৰ পৰা অধ্যক্ষই ধন্যবাদ জ্ঞাপন কৰে।