নিৰ্বাচন হোৱা নোহোৱাক লৈ ৰাজনৈতিক নাটক চলি থকাৰ পিছত আৰু ৰাজনৈতিক দলবোৰৰ নিৰ্বাচনী কুচ কাৱাজৰ অন্তত মঙলবাৰে পুৱা ৭ বজাৰ পৰা নাগালেণ্ডত অনুষ্ঠিত হৈছে নিৰ্বাচনৰ ভোটগ্ৰহণ।
ভোটগ্ৰহণ আবেলি ৪ বজাত সমাপ্ত হ’ব । অৱশ্যে, কিছুমান ভিতৰুৱা অঞ্চলৰ ভোটগ্ৰহণ কেন্দ্ৰত ভোটগ্ৰহণ ৩ বজাতে সমাপ্ত হ’ব।
নিৰ্বাচনৰ দিন ঘোষণা কৰাৰে পৰা ৰাজ্যখনত দৃশ্যপট সঘনে সলনি হোৱা দেখিবলৈ পোৱা গৈছিল। কিছুমান পক্ষই নিৰ্বাচনৰ আগতে নাগা ৰাজনৈতিক সমস্যাটোৰ সমাধান হোৱাটো বিচাৰিছিল।
ভোটদাতাসকলে ৯ টা ৰাজনৈতিক দল আৰু নিৰ্দলীয়কে ধৰি মুঠ ১৯৫ গৰাকী প্ৰাৰ্থীৰ বাবে ভোটদান কৰিব। ৬০ জনীয়া বিধানসভাখনৰ ৫৯ টা সমষ্টিত ভোটগ্ৰহণ কৰা হ’ব। আনহাতে, ১১ নং উত্তৰ আংগামী-২ সমষ্টিৰ প্ৰাৰ্থী এনডিপিপিৰ মুখ্যমন্ত্ৰী পদৰ প্ৰাৰ্থী তথা নাগালেণ্ডৰ প্ৰাক্তন মুখ্যমন্ত্ৰী নেইফিউ ৰিঅ’ই বিনা প্ৰতিদ্বন্দ্বিতাৰে জয়লাভ কৰিছে।
মঙলবাৰৰ ভোটগ্ৰহণৰ বাবে ৰাজ্যখনৰ ১১,৭০,৫৪৮ গৰাকী ভোটদাতাই ২১৫৬ টা ভোটকেন্দ্ৰত তেওঁলোকৰ ভোটাধিকাৰ সাৱ্যস্ত কৰিব।
ছয়খন জিলাৰ ১০৩ টা ভোটগ্ৰহণ কেন্দ্ৰত ভোটগ্ৰহণৰ সময় ৰাতিপুৱা ৭ বজাৰ পৰা ৩ বজালৈ ভোটগ্ৰহণৰ সময় নিৰ্দ্ধাৰণ কৰা হৈছে। বাকী ২০৫৩ টা ভোটগ্ৰহণ কেন্দ্ৰত ৰাতিপুৱা ৭ বজাৰ পৰা ৪ বজালৈ ভোটগ্ৰহণ অনুষ্ঠিত হ’ব।
আনহাতে, নিৰ্বাচন আয়োগে ১০৬২ টা ভোটগ্ৰহণ কেন্দ্ৰক সমস্যাপূৰ্ণ, ৫৩০ টাক স্পৰ্শকাতৰ আৰু ৫৬৪ টাক স্বাভাৱিক বুলি চিনাক্ত কৰিছে।
সৰ্বমুঠ ১৭,৫৩২ গৰাকী নিৰ্বাচনী বিষয়াক নিৰ্বাচনৰ বাবে নিয়োগ কৰা হৈছে। ইয়াৰে ১৫,৫২৩ গৰাকী প্ৰকৃত নিৰ্বাচনী কৰ্তৱ্যত থাকিব আৰু বাকী ২,০০০ নিৰ্বাচন সম্পৰ্কীয় আন কৰ্তৱ্যত নিয়োজিত হৈছে।
অহা ৩ মাৰ্চত ৰাতিপুৱা ৮ বজাৰ পৰা ৰাজ্যখনৰ ১২ টা স্থানৰ মুঠ ৫৯ টা হলত ভোটগণনা অনুষ্ঠিত হ’ব।
