মৃত্যু দূতত পৰিণত হৈছে বিশ্বনাথ। এই কথাকে প্ৰমাণ কৰি বিশ্বনাথত ২১ মাৰ্চৰ পৰা ২৪ মাৰ্চলৈকে ধাৰাবাহিকভাৱে সংঘটিত হৈছে ইটোৰ পিছক সিটো পথ দুৰ্ঘটনা।
আজি বিশ্বনাথ চাৰি আলিত সংঘটিত এক পথ দুৰ্ঘটনাত এজন চাইকেল আৰোহী থিতাতে নিহত হয়।
প্ৰাপ্ত তথ্য মতে বিশ্বনাথ চাৰিআলিৰ এক্সিছ বেংকৰ সন্মুখত ৰতন দাস নামৰ এগৰাকী চাইকেল আৰোহীক অগ্নি নিৰ্বাপক বাহিনীৰ গাড়ীয়ে খুন্দিয়াওৱাৰ ফলত চাইকেল আৰোহী গৰাকীৰ থিতাতে নিহত হয়।
আনহাতে দুৰ্ঘটনাটোৰ ফলত বহু সময় ধৰি বিশ্বনাথৰ ১৫ নং ৰাষ্ট্ৰীয় ঘাই পথটো আবদ্ধ হৈ পৰে। স্থানীয় একাংশই নিহত পৰিয়ালক ক্ষতিপুৰণ প্ৰদান কৰাৰ দাবীত উত্তপ্ত কৰি তোলে ৰাজপথটো।
অৱশ্যে শেহতীয়াকৈ ঘটনা স্থলিত বিশ্বনাথৰ উপ আৰক্ষী অধীক্ষক, ৰাজহ চক্ৰ বিষয়া আৰু আৰক্ষী প্ৰশাসন উপস্থিত হৈ পৰিস্থিতি নিয়ন্ত্ৰণ কৰে।
উল্লেখযোগ্য যে একেদৰে ২৩ মাৰ্চতো বিশ্বনাথৰ পাভৈ বনাঞ্চলিক বিষয়াৰ কাৰ্যালয়ৰ সমিপত বিয়লি এ এছ ০১ এম বি ৭২০৫ নম্বৰৰ বাইক আৰু এখন টাটা এচিৰ মাজত মুখামুখি সংঘৰ্ষ হয়।
ফলত দুৰ্ঘটনাটোত থিতাতে নিহত হয় বিসেশ্বৰ বিভাৰ (কৰ্ণ) আৰু গুৰুতৰভাৱে আহত অংগদ তাঁতি। নিহত বিসেশ্বৰ বিভাৰ দিৰিং প্ৰাথমিক গোট আটছাৰ উপ-সভাপতি আছিল।
ইফালে ২২ মাৰ্চতো এখন মটৰ চাইকেলেৰে নুৰুল আমিন আৰু কলেজিয়া ছাত্ৰী ছফিনা বেগম আহি থকা অৱস্থাত বিশ্বনাথ ঘাটত হঠাৎ গছ পৰি দুয়োগৰাকী গুৰুতৰভাৱে আহত হয়। গুৰুতৰভাৱে আহত দুয়ো গৰাকীকে বিশ্বনাথ অসামৰিক চিকিৎসালয় ভৰ্তি কৰে যদিও উন্নত চিকিৎসাৰ বাবে দুয়োকে তেজপুৰলৈ প্ৰেৰণ কৰা হয়।
স্থানীয় ৰাইজে বিশ্বনাথত ধাৰাবাহিকভাৱে হৈ থকা দুৰ্ঘটনা ৰোধৰ বাবে প্ৰশাসনক উচিত পদক্ষেপ গ্ৰহণ কৰিবলৈ দাবী জনায়।