আজি অনুষ্ঠিত হৈছে মেঘালয় বিধানসভা নিৰ্বাচন। পুৱা ৭ বজাৰ পৰাই ৰাজ্যখনত আৰম্ভ হৈছে ভোটগ্ৰহণ। পিছে ৰাজ্যখনৰ বিধানসভা নিৰ্বাচনৰ মাজতে চৰ্চালৈ আহিছে কেইটামান বিশেষ নাম। এইবাৰ মেঘালয়ৰ বিধানসভা নিৰ্বাচনত প্ৰতিদ্বন্দিতা কৰিছে ইংলেণ্ডৰ প্ৰাক্তন তাৰকা ক্ৰিকেটাৰ ইয়ান ব’থামে!
কেৱল সিমানেই নহয়, আজিৰ নিৰ্বাচনত ভোটদান কৰিব ফুটবল সম্ৰাট পেলে, যুৱৰাজ মাৰাডোনা আৰু ৰোমাৰিঅ’ৰ দৰে মহাতাৰকাই! তেওঁলোকৰ লগতে ভোটাধিকাৰ সাব্যস্ত কৰিব প্ৰখ্যাত আমেৰিকান সংগীতজ্ঞ গায়ক জিম ৰিভছেও!
আচৰিত যেন লাগিলেও আপুনি ঠিকেই শুনিছে এই বিশেষ নামকেইটা। মেঘালয়ৰ ৰাজ্যিক বিধানসভা নিৰ্বাচনত প্ৰতিদ্বন্দিতা কৰা অথবা ভোটদান কৰা এনে কিছু নামে বাৰুকৈয়ে চৰ্চাৰ সৃষ্টি কৰিছে।
পেলে, মাৰাডোনা, ৰোমাৰিঅ’, ৰিভছ নামৰ এই লোকসকল উমনিউহ-টমাৰ এলাকাৰ ভোটাৰ। তেওঁলোকে পূব খাছি পাহাৰ জিলাৰ শ্বেলা বিধানসভা সমষ্টিৰ প্ৰাৰ্থীসকলক ভোটদান কৰিব। সমষ্টিৰ কেইগৰাকীমান ভোটাৰৰ নামো লক্ষণীয়। এনে কেইগৰাকীমান প্ৰাৰ্থী হৈছে প্লেনেছ, এৰিনা, ৱেলবৰ্ণ আৰু গ্ৰেচ।
আজি নিৰ্বাচনত ভোটদান কৰিব ২৮ বৰ্ষীয় এচেম্বলী ৰিংগা আৰু ৪৫ বৰ্ষীয় ভোটাৰ মেঘালয় খংটিমেও। নিৰ্বাচনত প্ৰথমবাৰৰ বাবে ভোটদান কৰিব ব’ৰ্ডাৰ, কম্প্লেন আৰু ৰিপেন্টেঞ্চেও। চিষ্টাৰ প্ৰমিছলেণ্ড, হলিলেণ্ড ডখাৰ আৰু জেৰুজালেম খিয়েউটামেও সাব্যস্ত কৰিব ভোটাধিকাৰ।
সপ্তাহৰ দিন কেইটাৰ ইংৰাজী নাম ক্ৰমে থাৰ্ছডে’, চানডে’ নামৰ ভোটাৰৰ নামো আছে ভোটাৰ তালিকাত। লগতে আছে ত্ৰিপুৰা আৰু গোৱাৰ দৰে ভাৰতীয় ৰাজ্যৰ নাম। সেইদৰে আছে অসমৰ ৰাজধানী দিছপুৰৰ নামৰে এগৰাকী মহিলা ভোটাৰ।
আনহাতে আটলান্টা, এড্ৰেছ, পেচিফিক, কন্টিনেণ্ট, চিটি, ভিলেজ, এজেণ্ডা আৰু বেবীলেণ্ড, চুৱেটাৰ আৰু তেওঁৰ কন্যা আই হেভ বিন ডেলিভাৰড- য়েও ভোটাধিকাৰ সাব্যস্ত কৰিব। তিনিগৰাকী ভগ্নী ক্ৰমে- ৰিকুৱেষ্ট, লাভলীনেচ আৰু হেপীনেচৰ নামো আছে ভোটাৰ তালিকাত।
টেবুল, ফ’ৰটিন, ডাবলব্লেছ, এভ্ৰিডে’, সৌৰজগতৰ দুই গ্ৰহ ভেনাছ-জুপিটাৰ, ৰিম’ট, টাইৰছ’ (সৰিয়হ) আৰু মুলি (মূলা), এটলাছ আৰু নেভিও ভোটাৰৰ তালিকাত আছে।
এইবাৰ মেঘালয়ত নিৰ্বাচনত প্ৰতিদ্বন্দ্বিতা কৰা একাংশ প্ৰাৰ্থীৰ নামো অনন্য। ইষ্ট খাছি পাহাৰ জিলাৰ পাইনুৰ্ছলা সমষ্টিৰ পৰা এন পি পিৰ উপ মুখ্যমন্ত্ৰী প্ৰেষ্টন টাইনছঙৰ বিৰুদ্ধে নেহৰু ছুটিঙে প্ৰতিদ্বন্দ্বিতা কৰিছে। নিৰ্বাচনত অৱতীৰ্ণ হৈছে ছানমুন, ছানশ্বাইন আৰু মুনলাইটো।
অসম-মেঘালয় সীমান্তৰ জিৰাং সমষ্টিৰ পৰা ভাৰতীয় ৰিপাব্লিকান পাৰ্টি (আথৱালে)ৰ প্ৰাৰ্থী হিচাপে নিৰ্বাচনত প্ৰতিদ্বন্দ্বিতা আগবঢ়াইছে চানমুন মাৰাকে। সেইদৰে ছানশ্বাইন মাক্ৰী হৈছে উমছনিঙৰ প্ৰাৰ্থী। ফৰকাষ্টাৰ নংৰাঙে তাত নিৰ্দলীয় প্ৰাৰ্থী হিচাপে প্ৰতিদ্বন্দ্বিতা কৰিছে।
পশ্চিম জয়ন্তীয়া পাহাৰ জিলাত জোৱাই সমষ্টিৰ পৰা ইউনাইটেড ডেম’ক্ৰেটিক পাৰ্টিৰ টিকটত প্ৰতিদ্বন্দ্বিতা আগবঢ়াইছে মুনলাইটে। ফাৰ্ষ্টবৰ্ণ মেনাৰে বিজেপিৰ টিকটত আমলাৰেম সমষ্টিৰ পৰা প্ৰতিদ্বন্দ্বিতা আগবঢ়াইছে।
হাইলেণ্ডাৰ, চাউণ্ডাৰ, প্ৰচেছ আৰু ব্ৰাইটষ্টাৰৱেলে ক্ৰমে বিজেপি, ইউডিপি আৰু ভইচ অৱ পিপলছ পাৰ্টিৰ পৰা প্ৰতিদ্বন্দ্বিতা আগবঢ়াইছে। ফ’ৰটিনছনক কংগ্ৰেছে মনোনীত কৰাৰ বিপৰীতে প’লষ্টাৰ নংছিয়েজক নংষ্ট’ইন সমষ্টিৰ বাবে মনোনীত কৰা হয়। দক্ষিণ পশ্চিম গাৰো পাহাৰ জিলাৰ ছলমানপাৰা আসনত প্ৰতিদ্বন্দ্বিতা কৰিছে ইয়ান বোথামে।
