মেঘালয়ত বৰ্তমান নাই জি এন এল এ’ৰ সক্ৰিয় সদস্য : ৰাজ্য চৰকাৰ
মেঘালয়ত নিষিদ্ধঘোষিত সংগঠন জি এন এল এ’ ( GNLA )ৰ কাৰ্য্যকলাপত কঠোৰভাৱে বাধা দিয়া হৈছে আৰু ৰাজ্যখনত উগ্ৰপন্থী কাৰ্য্যকলাপ সম্পূৰ্ণৰূপে নোহোৱা কৰিবৰ বাবে আৰক্ষীয়ে চেষ্টা কৰি আছে বুলি মেঘালয় চৰকাৰে আজি ১০ এপ্ৰিলত জানিবলৈ দিছে।
সদনৰ প্ৰশ্নকালত কংগ্ৰেছ বিধায়ক ৱিনাৰ্ছন ডি চাংমাৰ এক প্ৰশ্নৰ উত্তৰত জ্যেষ্ঠ কেবিনেট মন্ত্ৰী প্ৰেষ্টন তিনছঙে জনাই যে জি এন এল এ’ৰ কোনো জ্যেষ্ঠ সদস্য বৰ্তমান সক্ৰিয় হৈ থকা নাই আৰু সংগঠনটোৰ বহুসংখ্যক সদস্যই আত্মসমৰ্পণ কৰিছে।
লক্ষণীয় যে সদনত উপস্থিত থকা সত্ত্বেও গৃহ মন্ত্ৰী জে’মছ কে’ চাংমাৰ পৰিৱৰ্তে মন্ত্ৰী তিনছঙেহে প্ৰশ্নটোৰ উত্তৰ দিয়ে।
আন এটা প্ৰশ্নৰ উত্তৰত মন্ত্ৰী চাংমাই কয় যে দেশবিৰোধী কাৰ্য্যকলাপত জড়িত ব্যক্তি বা সংগঠনসমূহৰ সৈতে মোকাবিলা কৰাত আৰক্ষী লাগি আছে।
তিনছেঙে কয় যে আত্মসমৰ্পণকাৰী উগ্ৰপন্থীসকলৰ বাবে সংস্থাপনৰ পেকেজো চৰকাৰে আগবঢ়াইছে।
মেঘালয় আৰক্ষীৰ সেই সময়ৰ এজন উপ আৰক্ষী অধীক্ষক চেম্পিয়ন আৰ চাংমাক অধ্যক্ষ আৰু চহান দি চিৰাক মুখ্য সেনাধ্যক্ষ হিচাপে লৈ ২০০৯ চনত গঠিত মূলতঃ গাৰো পাহাৰকেন্দ্ৰিক জি এন এল এ’ ৰাজ্যখনৰ আটাইতকৈ সক্ৰিয় উগ্ৰপন্থী দল।
চেম্পিয়ন চাংমাই শেহতীয়াকৈ কাৰাগাৰৰ মুক্তি পোৱাৰ বিপৰীতে চহানৰ যোৱা ২৪ ফেব্ৰুৱাৰিত নিৰাপত্তা বাহিনীৰ হাতত মৃত্যু হৈছে।
মেঘালয় আৰক্ষীয়ে ‘আটাইতকৈ বিচাৰি থকা’ চহানৰ হত্যাৰ পিছত ইয়াৰ বেছিসংখ্যক সদস্যই আত্মসমৰ্পণ কৰা বাবে জি এন এল এ’ৰ শক্তি বৰ্তমান টুটি আহিছে বুলি জানিব পৰা গৈছে।