মেঘালয়ৰ নিৰ্বাচন : নীতিবিৰুদ্ধ প্ৰচাৰ চলোৱা বুলি বিজেপিয়ে অভিযোগ দিলে বেচৰকাৰী এফ এম ৰেডিঅ’ৰ বিৰুদ্ধে
আজি মেঘালয়ত প্ৰায় শান্তিপূৰ্ণভাৱে ভোটদান সম্পূৰ্ণ হয়। ৰাজ্যখনত ভোটাদানৰ হাৰ আশা কৰাতকৈ কম হোৱা দেখা যায়। সাম্প্ৰতিক সময়ছোৱাত সকলো ৰাজ্যতে ভোটদানৰ হাৰ যথেষ্ট বেছি হোৱা দেখা যায় যদিও মেঘালয়ত এই হাৰ আবেলি ৫ বজালৈকে ৬০ শতাংশৰ সামান্য বেছি বুলি জানিব পৰা গৈছে ।
উল্লেখযোগ্য যে ৰাজ্যখনত ভোটদান সুকলমে আৰু শান্তিপূৰ্ণভাৱে অনুষ্ঠিত কৰা বাবে নিৰাপত্তা ব্যৱস্থা কটকটীয়া কৰি তোলা হৈছিল। ৰাজ্যখনত সুৰক্ষা বাহিনীৰ মুঠ ১০৬টা কোম্পানী নিয়োগ কৰা হৈছে।
যোৱা ২৪ ফেব্ৰুৱাৰিত নিষিদ্ধ ঘোষিত গাৰো নেশ্যনেল লিবাৰেশ্যন আৰ্মিৰ (জি এন এল এ) সেনাধ্যক্ষ ছোহান ডি ছিৰাক মেঘালয় আৰক্ষীৰ কমাণ্ডোৱে গুলীয়াই হত্যা কৰাৰ পৰিপ্ৰেক্ষিতত গাৰোপাহাৰৰ পৰিস্থিতি চেপা উত্তেজনাৰ মাজত আছিল। কিন্তু আজি বিশেষ একো গণ্ডগোল নোহোৱাকৈ ভোটদান সম্পন্ন হয়।
আনহাতে আজি দুপৰীয়াৰ ভাগত নীতিবিৰুদ্ধ প্ৰচাৰ চলোৱা বুলি নিৰ্বাচন আয়োগৰ ওচৰত মেঘালয় ৰাজ্যিক বিজেপিয়ে এটা বেচৰকাৰী এফ এম ৰেডিঅ’ৰ বিৰুদ্ধে অভিযোগ দিলে।
অভিযোগ পত্ৰখনত কোৱা হৈছে ৰেডিঅ’ মিৰ্চি নামৰ (৯১.১ এফ এম) এফ এম চেনেলটোৱে নীতিবিৰুদ্ধ কথাৰ প্ৰচাৰ চলাইছে, যিটোত চলিত নিৰ্বাচনী প্ৰক্ৰিয়াটোক সাম্প্ৰদায়িক ৰূপ দিয়াৰ উদ্দেশ্য থাকিব পাৰে। অভিযোগপত্ৰখনত দিয়ামতে, ৰেডিঅ’ চেনেলটোৱে খ্ৰীষ্টান বিৰোধী দলক ভোট নিদিব বুলি বাৰ্তা প্ৰচাৰ কৰিছিল।
আজি দিয়া অভিযোগত কোৱা হৈছে যে ২৭ ফেব্ৰুৱাৰিৰ ১২.৪৮ বজাতো ৰেডিঅ’ চেনেলটোৰ এগৰাকী মহিলা ৰেডিঅ’ জকিয়ে একে ধৰণৰ বাৰ্তা প্ৰচাৰ কৰি আছে।
অভিযোগপত্ৰখনত ভাৰতীয় জনতা পাৰ্টীৰ অংকুৰ কুমাৰৰ স্বাক্ষৰ আছে। পত্ৰখনত কোৱা হৈছে যে এনেকুৱা বিভাজনমূলক বিজ্ঞাপনে নিৰ্বাচনক সাম্প্ৰদায়িক ৰূপ দিব পাৰে আৰু লগে লগে বন্ধ কৰা উচিত। ৰেডিঅ’ চেনেলটোৰ লগতে বিজ্ঞাপন দিওঁতাৰ বিৰুদ্ধে ব্যৱস্থা ল’বলৈও পত্ৰখনত দাবী জনোৱা হৈছে।