কেন্দ্ৰীয় চৰকাৰৰ স্বচ্ছ সৰ্বেক্ষণৰ ওপৰত চলোৱা জৰীপ অনুসৰি অসমৰ প্ৰদৰ্শন অত্যন্ত হতাশাজনক। ৰাজ্যভিত্তিক সমীক্ষাত গড় নম্বৰৰ তালিকাত অসমে ২৩ সংখ্যক স্থান লাভ কৰিছে।
সমগ্ৰ দেশৰ ভিতৰতে পশ্চিমবংগ, পুডুচেৰীৰ সৈতে উত্তৰ-পূবৰ নাগালেণ্ড আৰু ত্ৰিপুৰা আটাইতকৈ অপৰিস্কাৰ ৰাজ্য হিচাপে স্থান লাভ কৰিছে।
ৰাজ্যভিত্তিক জৰীপত গড় নম্বৰত ঝাৰখণ্ডই ২৬১৯ নম্বৰ লাভ কৰি শীৰ্ষস্থান লাভ কৰাৰ বিপৰীতে ৭৯৯ নম্বৰ লাভ তালিকাৰ নিম্নতম স্থানত আছে নাগালেণ্ড। এইক্ষেত্ৰত ত্ৰিপুৰাই লাভ কৰা ৮৫৪ নম্বৰৰ বিপৰীতে অসমে ৮৮৩ নম্বৰহে লাভ কৰিছে।
এই তালিকাত অসমে ২৩ সংখ্যক স্থান লাভ কৰিছে। উত্তৰ-পূবৰ ৰাজ্যসমূহৰ ভিতৰত মিজোৰাম, মেঘালয়, নাগালেণ্ড আৰু ত্ৰিপুৰাই লাভ কৰিছে ক্ৰমে ২৪, ২৭,২৮ আৰু ২৯ সংখ্যক স্থান। ৩০ সংখ্যক স্থানেৰে নিম্নতম স্থানত আছে পশ্চিমবংগ।
তাৎপৰ্যপূৰ্ণভাৱে উত্তৰ-পূৰ্বাঞ্চলৰ ৰাজ্য ছিকিমে ২৬০১ নম্বৰ লাভ কৰি তালিকাৰ শীৰ্ষত পঞ্চম ৰাজ্যৰ মৰ্যাদা লাভ কৰিছে। এই জৰীপত দেশৰ ৪৫ খন চহৰক অপৰিস্কাৰ চহৰ হিচাপে চিহ্নিত কৰা হৈছে।
কেন্দ্ৰীয় চৰকাৰে ৰূপায়ন কৰা স্বচ্ছ ভাৰত অভিযানে বহু সংখ্যক চহৰ পৰিস্কাৰ কৰি তুলিছে যদিও আন বহু চহৰে এইক্ষেত্ৰত ব্যৰ্থ হৈছে। কেন্দ্ৰই চলোৱা জৰীপ অনুসৰি ছিকিমৰ গেংটকে দেশৰ পাঁচশখন চহৰৰ ভিতৰত পঞ্চম স্থান লাভ কৰিছে।
বিজেপি শাসিত ৰাজ্য হিচাপে অসমে তৎপৰতাৰে স্বচ্ছ ভাৰত অভিযানত অংশ লৈছিল যদিও সেই অনুসৰি কৃতকাৰ্যতা লাভ কৰিব পৰা নাই। বৰঞ্চ যোৱা এবছৰত স্বচ্ছ সৰ্বেক্ষণৰ নামত কেৱল প্ৰচাৰৰ মাজতে সীমা ৰখা এই কাৰ্যসূচীয়ে লক্ষ্যত উপনীত হ’বলৈ বহুদূৰ বাট যে অতিক্ৰম কৰিব লাগিব সেয়া এই জৰীপে স্পষ্ট কৰি দিলে।
