অত্যন্ত প্ৰতিকূল অৱস্থাত কাম কৰি থকা শিশু শ্ৰমিকসকলক সুৰক্ষা দিয়াৰ বাবে ম্যানমাৰ চৰকাৰে এলানি পদক্ষেপ গ্ৰহণ কৰিছে। এই ক্ষেত্ৰত ফলপ্ৰসূভাৱে আগবঢ়াৰ উদ্দেশ্যে দেশখনে শিশুসকলৰ বাবে নিৰাপদ বুলি বিবেচিত নোহোৱা কাম কিছুমানৰ এখন তালিকা প্ৰস্তুত কৰিছে।
শ্ৰম আইন, শিক্ষাৰ অধিকাৰ, এনেধৰণৰ কেতবোৰ বিষয়ত শিশুৰ অধিকাৰ সুৰক্ষিত কৰাৰ লক্ষ্য আগত ৰাখি দেশখনে এই পদক্ষেপ গ্ৰহণ কৰিছে।
উল্লেখযোগ্য যে আন্তৰ্জাতিক শ্ৰম সংস্থাই ৫ আৰু ১৮ বছৰৰ মাজৰ শ্ৰমত নিযুক্ত ব্যক্তিক শিশু শ্ৰমিক হিচাপে বিবেচনা কৰে ।
তথ্য অনুযায়ী সমগ্ৰ ম্যানমাৰত ১.২মিলিয়ন শিশু শ্ৰমিক আছে আৰু তাৰে ৮০ শতাংশই গাঁও এলেকাৰ পৰা অহা।
আন্তৰ্জাতিক শ্ৰম সংস্থাই প্ৰকাশ কৰিছে যে ৫ বছৰ বা ততোধিক বয়সৰ ১.২ মিলিয়ন শিশু দেশখনৰ অবৈধ শ্ৰমৰ বজাৰখনত বন্দী হৈ আছে, যি সকলৰ কিছুমানক দিনটোত ১৪ ঘণ্টা পৰ্যন্ত হাড়ভঙা পৰিশ্ৰম কৰিবলৈ বাধ্য কৰোৱা হয়।
আন্তৰ্জাতিক সংস্থাটোৰ প্ৰতিৱেদনত প্ৰকাশ যে শিশু শ্ৰমিকসকলক প্ৰায়েই মালিকসকলে আৰু বয়সীয়া কৰ্মচাৰীসকলে গালি-শাপনি পাৰে, যিয়ে তেওঁলোকৰ মানসিক বিকাশত বাধাৰ সৃষ্টি কৰে।
ম্যনমাৰৰ শ্ৰম আইনে ব্যক্ত কৰে যে কাৰখানাত কাম কৰা শিশুসকলকহে শিশু শ্ৰমিক হিচাপে শ্ৰেণীভুক্ত কৰিব পাৰি।
আনুমানিক ১১,০০০ শিশুৱে ম্যানমাৰৰ চাহৰ দোকান আৰু ৰেষ্টোৰাঁসমূহত কাম কৰি আছে।
২০১৩ চনৰ ডিচেম্বৰ মাহৰ ১৮ তাৰিখে ম্যানমাৰে সংস্থাটোৰ আন্তৰ্জাতিক শ্ৰম সংস্থা চুক্তি-১৮২ ( ILO Convention 182) নামৰ ‘আটাইতকৈ বিপজ্জনক প্ৰকাৰৰ শিশু শ্ৰম’ চুক্তিখনত স্বাক্ষৰ কৰে আৰু ২০১৫ চনৰ ছেপ্টেম্বৰত এটি কাৰ্যকৰীকৰণ প্ৰতিৱেদন আগবঢ়ায়।
আন্তৰ্জাতিক শ্ৰম নীতি আৰু শ্ৰম অধিকাৰৰ প্ৰায়োগিক দিশসমূহৰ সৈতে একে মানৰ কৰি তেলাৰ উদ্দেশ্যে দেশখনে ইয়াৰ শ্ৰম সম্পৰ্কীয় আইন-কানুনসমূহ পুনৰীক্ষণ কৰি আছে। শেহতীয়াভৱে ম্যানমাৰৰ সংসদে দেশখনৰ শ্ৰম আইনৰ সংশোধন কৰিছে আৰু নতুন শ্ৰম আইন প্ৰণয়ন কৰিছে বুলি জানিব পৰা গৈছে।
