কিছুদিন পূৰ্বে শিৱসাগৰৰ এজন গাড়ী চালকক হত্যাৰ ঘটনাৰ চাঞ্চল্য সম্পূৰ্ণ মাৰ নৌযাওতেই পুনৰ সংঘটিত হয় আন এক হত্যাকাণ্ড। মঙ্গলবাৰে, শিৱসাগৰ জিলাৰ ডিমৌ আৰক্ষী থানাৰ অন্তৰ্গত ৰাজমাই চাহ বাগিচাৰ শেনচোৱা শাখাৰ ১০ নং লাইনৰ সমীপত এজন অচিনাক্ত যুৱকৰ ৰক্তাক্ত মৃতদেহ উদ্ধাৰ কৰা হয় ।
বাগিচাখনৰ নলাত পেলাই থোৱা অৱস্থাত উদ্ধাৰ হোৱা মৃতদেহটোৰ কাষত দুটাকৈ ইন’ভা গাড়ীৰ চিট ক’ভাৰ উদ্ধাৰ কৰা হৈছে । পিন্ধনত নীলা ছাৰ্ট,ৰঙা স্পৰ্টিং আৰু বগা লং পেন্ট পৰিহিত যুৱকজনৰ শৰীৰত চোকা অস্ত্ৰৰ আঘাত স্পষ্ট দেখা গৈছে ।
যুৱকজন বোকাখাত পলাশগুৰিৰ সুশীল দলেৰ পুত্ৰ সদাগৰ দলে(২৩) বুলি জানিব পৰা গৈছে । ঘটনাস্থলীত ডিমৌ আৰক্ষীৰ এটা দল উপস্থিত হৈ তদন্ত আৰম্ভ কৰে । উক্ত মৃতদেহটো গাড়ীচালক সদাগৰ দলেৰ বুলি ইতিমধ্যে নিশ্চিত কৰিছে আৰক্ষীয়ে ।
চালকজনে বোকাখাতৰ পৰা শিৱসাগৰলৈ বুলি AS-01DD-0090 ইন’ভা বাহনখনেৰে ভাড়াত আহিছিল বুলি নিশ্চিত হৈছে আৰক্ষী । গাড়ী চুৰি চক্ৰই চালকক হত্যা কৰি গাড়ী লৈ উধাও হোৱাৰ সন্দেহ কৰা হৈছে। এই নৃশংস ঘটনাৰ পিছত তীব্ৰ চাঞ্চল্য বিৰাজ কৰিছে সমগ্ৰ অঞ্চলটোত।
ইতিমধ্যে ডিমৌ আৰক্ষীয়ে প্ৰাথমিক তদন্ত আৰম্ভ কৰি ঘটনাৰ মূল কাৰণ অথবা এই ঘটনাত জড়িত অপৰাধীক কৰায়ক্ত কৰিবলৈ চেষ্টা অব্যাহত ৰাখিছে। আৰক্ষীয়ে অপৰাধীক জালত পেলাবলৈ অভিযান তীব্ৰতৰ কৰি তুলিছে আৰু পলায়ন কৰা ইন’ভা গাড়ীখন নাগালেণ্ডৰ মন জিলাত উদ্ধাৰ কৰিবলৈ সক্ষম হৈছে। কিন্তু আন্ধাৰৰ সুযোগ লৈ গাড়ীখনত থকা লম্পট চোৰ দুটাই পলায়ন কৰা বুলি আৰক্ষীয়ে জানিবলৈ দিয়ে।
