বিতৰ্কত সদৌ অসম উকীল সন্থা! সদৌ অসম উকীল সন্থাৰ যোৱা ২৭, ২৮ আৰু ২৯ ছেপ্টেম্বৰত পাঠশালাত অনুষ্ঠিত হৈ যোৱা ১৮ সংখ্যক দ্বিবার্ষিক বজালী অধিৱেশনত গ্রহণ কৰা কেইবাটাও সিদ্ধান্ত সন্দর্ভত ক্ষোভ প্রকাশ কৰিছে বজালী উকীল সন্থাই। পৰহি বজালী উকীল সন্থাৰ কাৰ্যালয়ত বজালী উকীল সন্থাৰ তদর্থ সমিতিৰ সভাপতি গিৰিধৰ চৌধুৰীৰ সভাপতিত্বত এখন জৰুৰী সাধাৰণ সভা অনুষ্ঠিত হয়।
সভাত সদৌ অসম উকীল সন্থাই ১৮ সংখ্যক দ্বিবার্ষিক বজালী অধিৱেশনত গ্রহণ কৰা কেইবাটাও সিদ্ধান্ত সন্দর্ভত বিশদভাবে আলোচনা কৰি তীব্র ক্ষোভ প্রকাশ কৰে৷ আজি বজালী উকীল সন্থাৰ তদর্থ সমিতিৰ সভাপতি গিৰিধৰ চৌধুৰী, সম্পাদকদ্বয় নৱজিৎ শৰ্মা, ৰঞ্জিত কলিতা স্বাক্ষৰিত এক বিবৃতিত সদৌ অসম উকীল সন্থাই সন্থাৰ সংবিধান উলংঘা কৰি বজালী উকীল সন্থাৰ পৰা ১৮ সংখ্যক দ্বিবার্ষিক অধিৱেশনত প্রয়োজনীয় অর্হতা নথকা সত্ত্বেও বজালী উকীল সন্থাৰ সদস্য গোপাল তালুকদাৰক উপ-সভাপতি হিচাপে ঘোষণা কৰা, অধিৱেশনত প্রতিনিধি অন্তর্ভুক্ত কৰা আৰু যোৱা ১৯ নৱেম্বৰত সদৌ অসম উকীল সন্থাৰ কাৰ্যালয়ত বজালী উকীল সন্থাৰ তদর্থ সমিতিৰ যুটীয়া সম্পাদকদ্বয় তথা বজালী সন্থাৰ প্রতিনিধিদ্বয় নৱজিৎ শৰ্মা আৰু ৰঞ্জিত কলিতাক সদৌ অসম উকীল সন্থাৰ সম্পাদক দীপক কুমাৰ দাসে কৰা দুর্ব্যৱহাৰৰ বাবে বজালী উকীল সন্থাই সদৌ অসম উকীল সন্থাৰ সদস্য পদ ত্যাগ কৰাৰ কথা ঘোষণা কৰে।
প্ৰেছ বিবৃতিটোত যোৱা ১৯ নৱেম্বৰত বজালী উকীল সন্থাৰ প্রাক্তন সভাপতি গোপাল তালুকদাৰ আৰু প্ৰাক্তন সম্পাদক দীপক বয়ে সামাজিক মাধ্যমত বজালী উকীল সন্থাৰ তদর্থ সমিতিখনক অবৈধ বুলি অভিহিত কৰি উক্ত সমিতিৰ বিষয়ববীয়া সন্দৰ্ভত বিৰূপ মন্তব্য কৰাৰ লগতে বজালী উকীল সন্থাৰ কাৰ্যনিৰ্বাহকৰ কাৰ্যকাল সন্দৰ্ভত মিথ্যাচাৰৰ আশ্ৰয় লৈ যি মন্তব্য দিছিল, সেই সন্দর্ভতো সভাত বিশদভাবে আলোচনা কৰি সকলো সদস্যই প্রাক্তন সভাপতি গোপাল তালুকদাৰ আৰু প্ৰাক্তন সম্পাদক দীপক ৰয়ক তীব্ৰ গৰিহণা দিয়ে।
