কলিয়াবৰৰ কুঁৱৰৰীটোলৰ গান্ধী পথাৰত মঙলবাৰৰ পৰা দুদিনীয়াকৈ সদৌ অসম ছাত্ৰসন্থাৰ উদ্যোগত ,কলিয়াবৰ আঞ্চলিক ছাত্ৰসন্থাৰ সহযোগত আৰু কলিয়াবৰৰ ৰাইজ আৰু কেবাটাও সংগঠনৰ সহযোগত কেন্দ্ৰীয়ভাৱে অনুষ্ঠিত বিষ্ণুৰাভা দিৱসৰ আজি সফলতাৰে সামৰণি পৰে।
মঙলবাৰে সদৌ অসম ভিত্তিত বিষ্ণু ৰাভাৰ গীতৰ আৰু বিষ্ণু ৰাভাৰ গীতৰ আধাৰত নৃত্য প্ৰতিযোগিতা অনুষ্ঠিত হোৱাৰ পাছত আজি সদৌ অসম ছাত্ৰ সন্থাৰ সভাপতি দীপাংক নাথে পতাকা উত্তোলনৰে দ্বিতীয় দিনাৰ কাৰ্যসূচী আৰম্ভ কৰে।
পতাকা উত্তোলনৰ পিছতে সম্পাদক লুৰিণজ্যোতি গগৈয়ে শ্বহীদ তৰ্পণ আৰু বিষ্ণুৰাভাৰ প্ৰতি শ্ৰদ্ধাঞ্জলি জ্ঞাপন অনুষ্ঠান মুকলি কৰে ড০সমুজ্জ্বল কুমাৰ ভট্টাচাৰ্যই।
আজি সৈনিকশিল্পীজনক সোৱঁৰণ কৰিবলৈ ভিৰ কৰেহি কলিয়াবৰৰ অগণন লোকে।
বিয়লি দীপাংক নাথৰ সঞ্চালনাত অনুষ্ঠিত মুকলি সভাত সদৌ অসম ছাত্ৰসন্থাৰ বিষয়ববীয়াসকলৰ লগতে বিষ্ণুৰাভাৰ পুত্ৰ পৃথ্বিৰাজ ৰাভা, ড০ অমৰজ্যোতি চৌধুৰী আৰু বিশিষ্ট বিজ্ঞানী ড০ হলধৰ ভূঞাই অংশগ্ৰহণ কৰি শিল্পীজনৰ সৃষ্টিশীল কৰ্মৰাজিৰ ওপৰত আলোকপাত কৰি বক্তৃতা প্ৰদান কৰে।
আনহাতে ,আজিৰ সভাতে ৫ গৰাকীকৈ সাহিত্যক ,শিল্পী তিলক চন্দ্ৰ মজুমদাৰ ,ফণীন্দ্ৰ নাথ গায়ন ,গুণ মহন্ত ,অৰূপ মান্না আৰু গিৰীন্দ্ৰ নাৰায়ন দেৱগোস্বামীক সদৌ অসম ছাত্ৰসন্থাই সম্বৰ্ধনা জনায়।
তদুপৰি পুৰণিগুদামৰ ভাস্কৰ্য শিল্পী পাৰ্থপ্ৰতিম ভূঞাই থিতাতে নিৰ্মাণ কৰি উলিওৱা বিষ্ণুৰাভাৰ এক মৃন্ময় প্ৰতিমূৰ্তিও উন্মোচন কৰা হয়। স্মৃতিগ্ৰন্থ ‘ মুক্তিদেউল’ উন্মোচন কৰে অধ্যক্ষ ড০ হিৰণ্য কুমাৰ চলিহাই ।
নিশা অনুষ্ঠিত সাংস্কৃতিক অনুষ্ঠানত অপূৰ্ব বেজবৰুৱা ,জিনা ৰাজকুমাৰী,নাহিদ আফ্ৰিন ,নীল আকাশৰ গীতৰ অনষ্ঠানৰে সামৰণি পৰে দুদিনীয়াকৈ আয়োজন কৰা কেন্দ্ৰীয় ৰাভা দিৱসৰ কাৰ্যসূচীৰ।
