ভাৰতত বৃদ্ধি পাইছে টিবি ৰোগীৰ সংখ্যা। সূত্ৰ অনুসৰি যোৱা বছৰ ভাৰতত ২৫ লাখতকৈ অধিক লোকৰ শৰীৰত টিবি ৰোগ ধৰা পৰিছে। যোৱা ৬০ টা বছৰৰ ভিতৰত এই যোৱাবছৰ সৰ্বাধিক টিবি আক্ৰান্ত লোক ধৰা পৰিছে।
হিন্দুস্তান টাইমছৰ প্ৰতিবেদন অনুসৰি যোৱা বছৰ সমগ্ৰ দেশতে ২৪.২ লাখ টিবি ৰোগী পঞ্জীয়ন হৈছিল। ইয়াৰে ৩২% ৰোগীৰ নাম পঞ্জীয়নন হৈছে ব্যক্তিগত স্বাস্থ্যসেৱা খণ্ডত।
যোৱা ৯ বছৰত ভাৰতত টিবি ৰোগীৰ সংখ্যা ৬৪% বৃদ্ধি পাইছে। দেশৰ ভিতৰত আটাইতকৈ বেছি টিবি দ্বাৰা আক্ৰান্ত হৈছে উত্তৰ প্ৰদেশত।
যোৱা বছৰৰ তুলনাত এইবছৰ উত্তৰ প্ৰদেশত টিবি ৰগীৰ সংখ্যা ২১% বৃদ্ধি পাইছে। টিবি ৰোগী বৃদ্ধিৰ ক্ষেত্ৰত দ্বিতীয় স্থানত আছে বিহাৰ। বিহাৰত ১৫% বৃদ্ধি পাইছে টিবি আক্ৰান্ত ৰোগীৰ সংখ্যা।
উল্লেখ্য যে কেন্দ্ৰ চৰকাৰে বৰ্ধিত টিবি ৰোগ ২০২৫ চনৰ ভিতৰত নিৰ্মূল কৰাৰ লক্ষ্য নিৰ্ধাৰণ কৰিছে।
কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰালয়ৰ টিবি বিভাগৰ প্ৰাক্তন মুৰব্বী ডাঃ কুলদীপ সিং সচদেৱে কয় যে, ‘প্ৰাথমিক পৰ্যায়ত ৰোগীৰ সংখ্যা বৃদ্ধি হোৱাৰ সম্ভাৱনা আছে কাৰণ ইয়াৰ অৰ্থ হ’ল ৰোগীক চিনাক্ত কৰি চিকিৎসা প্ৰদান কৰা হৈছে। ই সংক্ৰমণ চক্ৰ ভংগ কৰাত সহায় কৰিছে। টিবি এটা সংক্ৰামক ৰোগ, গতিকে এই ৰোগৰ বিস্তাৰ বন্ধ কৰিবলৈ ৰোগীসকলক চিনাক্ত কৰি উপযুক্ত চিকিৎসাৰ দ্বাৰা সংক্ৰমণৰ চক্ৰ ধ্বংস কৰাতো জৰুৰী।
বিশ্ব স্বাস্থ্য সংস্থাই (WHO) প্ৰকাশ কৰা গ্ল’বেল টিবি ৰিপ’ৰ্ট ২০২৩ অনুসৰি ভাৰতত টিবি ৰোগৰ প্ৰাদুৰ্ভাৱৰ হাৰ ২০১৫ চনত প্ৰতি এক লাখ জনসংখ্যাৰ বিপৰীতে ২৩৭ৰ পৰা ২০২২ চনত প্ৰতি এক লাখ জনসংখ্যাৰ বিপৰীতে ১৯৯ জনলৈ ১৬% হ্ৰাস পাইছে। একে সময়ছোৱাতে ২০১৫ চনত প্ৰতি এক লাখ জনসংখ্যাৰ বিপৰীতে টিবিত মৃত্যুৰ হাৰ ২৮ৰ পৰা ২৩লৈ ১৮% হ্ৰাস পাইছে।
ডাঃ সচদেৱে কয়, ‘টিবি-মুক্ত ভাৰত কাৰ্যসূচীয়ে ভালদৰে কাম কৰি আছে আৰু মূলতঃ টিবিক জনচৰ্চাত আনিছে, যাৰ ফলত এই ৰোগৰ প্ৰতি সজাগতা সৃষ্টি হৈছে।
চৰকাৰী কাৰ্যসূচীৰ অধীনত টিবি ৰোগীৰ আৰ্থিক বোজা হ্ৰাস কৰিবলৈ দেশৰ সকলো জনস্বাস্থ্য সুবিধাত ৰোগীক বিনামূলীয়াকৈ পৰীক্ষা, বিনামূলীয়া চিকিৎসা, পৰীক্ষা আৰু বিনামূলীয়া ঔষধ প্ৰদান কৰা হয়। ইয়াৰ উপৰিও নিক্ষয় পুষ্টি আঁচনিৰ অধীনত টিবি ৰোগৰ চিকিৎসাধীন লোকসকলক পুষ্টিৰ বাবে আৰ্থিক সাহায্যও আগবঢ়ায় কেন্দ্ৰীয় চৰকাৰে।
