সাহিত্যৰথী লক্ষ্মীনাথ বেজবৰুৱাৰ ওড়িশাৰ সম্বলপুৰত থকা গৃহ সংৰক্ষণ কৰাৰ বাবে অসম চৰকাৰে আজি প্ৰাৰম্ভিকভাৱে ৫০ লাখ টকা ওড়িশা চৰকাৰক প্ৰদানৰ ক্ষেত্ৰত যাৱতীয় অনুমোদন জনাইছে। মুখ্য মন্ত্ৰী সৰ্বানন্দ সোণোৱালে আজি এই সম্পৰ্কত যাৱতীয় অনুমোদন জনাইছে।
তাৰোপৰি এই গৃহ সংৰক্ষণৰ ক্ষেত্ৰত প্ৰয়োজন হোৱা অতিৰিক্ত পুঁজিও ৰাজ্য চৰকাৰে বহন কৰিব বুলি ইতিমধ্যে ওড়িশা চৰকাৰৰ সংশ্লিষ্ট কৰ্তৃপক্ষক আজি অসম চৰকাৰৰ তৰফৰ পৰা জনোৱা হয়।
আনহাতে সুধাকণ্ঠ ড০ ভূপেন হাজৰিকাৰ কলকাতাৰ টালিগঞ্জস্থিত গৃহ ইয়াৰ বৰ্তমানৰ স্বত্তাধিকাৰীৰ পৰা ক্ৰয় কৰি এই গৃহ উন্নীতকৰণৰ দিশটো ৰাজ্য চৰকাৰে যথেষ্ট অগ্ৰগতি লাভ কৰিছে।
উল্লেখযোগ্য যে যোৱা ১ নৱেম্বৰত মুখ্য মন্ত্ৰী সৰ্বানন্দ সোণোৱালৰ নিৰ্দেশ মৰ্মে সাংস্কৃতিক পৰিক্ৰমা বিভাগৰ মন্ত্ৰী নৱ কুমাৰ দলে আৰু মুখ্য মন্ত্ৰীৰ মিডিয়া উপদেষ্টা হৃষীকেশ গোস্বামীয়ে এই গৃহ বৰ্তমানৰ স্বত্তাধিকাৰী সুশীল কুমাৰ দাংগীৰ সৈতে কলকাতাস্থিত অসম ভৱনত এক আলোচনাত মিলিত হৈছিল।
আৰু এই আলোচনাৰ পৰৱৰ্তী পৰ্যায়ত দাংগীক গুৱাহাটীলৈ মতাই আনি সাংস্কৃতিক মন্ত্ৰী আৰু মিডিয়া উপদেষ্টাৰ উপস্থিতিত এক চুক্তিত স্বাক্ষৰ কৰোৱা হয়। আৰু এই চুক্তিৰ প্ৰস্তাৱ আগন্তুক কেবিনেট বৈঠকত উত্থাপন কৰি কেবিনেটে এই প্ৰস্তাৱ অনুমোদন কৰাৰ পিছতেই বাস্তৱায়িত কৰাৰ দিশত ৰাজ্য চৰকাৰে অগ্ৰাধিকাৰৰ ভিত্তিত পদক্ষেপ গ্ৰহণ কৰিব বুলি জানিব পৰা গৈছে।