নাগৰিকত্ব সংশোধনী বিধেয়কখন যিকোনো প্ৰকাৰে বাতিল কৰাৰ দাবীত অসমৰ দল-সংগঠনে প্ৰতিবাদ কৰি থকাৰ সময়তে অসম প্ৰদেশ কংগ্ৰেছ কমিটিয়ে আৰম্ভ কৰিব গণ স্বাক্ষৰ অভিযান।
আজি ৰাজীব ভবনত অনুষ্ঠিত এখন সংবাদমেলত কংগ্ৰেছৰ সভাপতি ৰিপুন বৰাই এই কথা সদৰি কৰে।
আজিৰ সংবাদ মেলত বৰাই জনোৱা অনুসৰি অহা ১৪ মে’ৰ পৰা ২৪ মে’ লৈকে ৰাজ্যৰ ৩৩ খন জিলাক সামৰি মুঠ ৮ টা মণ্ডলত ভাগ কৰি এই অভিযান আৰম্ভ কৰিব।
তেওঁ লগতে কয়, ‘’অসম প্ৰদেশ কংগ্ৰেছ কমিটিয়ে সমূহীয়াকৈ এই বিধেয়কৰ বিৰোধিতা কৰিছো যদিও ভিতৰুৱা অঞ্চলৰ লোকসকলৰ মতামত আৰু স্বাক্ষৰ লৈ ব্লক কংগ্ৰেছ আৰু জিলা কংগ্ৰেছ কমিটিসমূহে একত্ৰিত হৈ যুটীয়া সংসদীয় কমিটিলৈ স্মাৰক পত্ৰ প্ৰদান কৰিম।‘’
আনহাতে, বিভিন্ন অঞ্চলৰ খণ্ড উন্নয়ন বিষয়া অথবা ৰাজহ চক্ৰ বিষয়া আৰু মহকুমাধিপতি বা জিলা উপায়ুক্তৰ জৰিয়তে এই স্মাৰক পত্ৰসমূহ যুটীয়া সংসদীয় কমিটিৰ অধ্যক্ষলৈ প্ৰেৰণ কৰা হ’ব বুলিও প্ৰদেশ কংগ্ৰেছৰ সভাপতিগৰাকীয়ে উল্লেখ কৰে।
প্ৰদেশ কংগ্ৰেছৰ সভাপতি ৰিপুন বৰাই বুধবাৰৰ সংবাদ মেলত জনোৱা অনুসৰি উত্তৰ অসম, মধ্য অসম, কেন্দ্ৰীয় অসম , উজনি অসম, পাৰ্বত্য মণ্ডল, নামনি অসম, বি টি এ ডি মণ্ডল আৰু বৰাক উপত্যকা- এই আঠটা মণ্ডলত ভাগ কৰি তেওঁলোকে এই অভিযান আৰম্ভ কৰিব।
উল্লেখযোগ্য যে যোৱা ৭ মে’ৰ দিনা ৰাজ্যৰ বিভিন্ন প্ৰান্তৰ জনসাধাৰণ অথবা গণতান্ত্ৰিক দল-সংগঠনে এই শুনানিত অংশগ্ৰহণ কৰাৰ সুযোগ নোপোৱাৰ কথা বিবেচনা কৰি অসম প্ৰদেশ কংগ্ৰেছ কমিটিয়ে এই পদক্ষেপ হাতত লৈছে।