সুদীৰ্ঘ তিনিবছৰৰ অন্তত কাজিৰঙা ৰাষ্ট্ৰীয় উদ্যানত আজিৰ পৰা দুদিনীয়া কাৰ্যসূচীৰে আৰম্ভ হৈছে গঁড় গণনা প্ৰক্ৰিয়া। গঁড় নিধনৰ বাবে সততে বাতৰিৰ শিৰোনাম দখল কৰি থকা কাজিৰঙা ৰাষ্ট্ৰীয় উদ্যানৰ এইবাৰৰ গঁড় গণনাই বিশেষ তাৎপৰ্য বহন কৰিব। কিয়নো উদ্যানখনত গঁড়ৰ অৱস্থিতি কিমান সেয়া প্ৰকৃতি প্ৰেমীসকলে জানিবলৈ কৌতুহলেৰে বাট চায় আছে।
‘গঁড় গণনাৰ বাবে সমগ্ৰ উদ্যানখনক ৭৪টা কম্পাৰ্টমেণ্টত ভাগ কৰি লোৱা হৈছে। ৭৪টা কম্পাৰ্টমেণ্টৰ ভিতৰত ৩৬টা কম্পাৰ্টমেণ্টতে আজি অতি সুকলমে গঁড় গণনা সম্পন্ন হৈছে। আৰু বাকী থকা কম্পাৰ্টমেণ্ট কেইটাত কাইলৈ গণনা সম্পূৰ্ণ হ’ব। ১৫০গৰাকী লোকে গঁড় গণনা কাৰ্যসূচীত অংশগ্ৰহণ কৰিছে’, বুলি সদৰী কৰে বন সংমণ্ডল প্ৰাধিকাৰী ৰোহিণী বল্লভ শইকীয়াই।
আনহাতে তেওঁ পুনৰ উল্লেখ কৰি কয় যে এই বছৰ আমি গঁড়ৰ সঠিক উপস্থিতি নিৰূপন কৰাৰ বাবে জিপিএছ পদ্ধতি অৱলম্বন কৰিছো। আৰু এই বছৰৰ গঁড় গণনাৰ অন্তত পোৱা চূড়ান্ত সংখ্যা মঙলবাৰে সন্ধিয়া বা বুধবাৰে ৰাতিপুৱা প্ৰকাশ কৰা হ’ব।
৪২,৯৯৬ হেক্টৰে আৱৰা কাজিৰঙা ৰাষ্ট্ৰীয় উদ্যানখন হৈছে পৃথিৱীৰ একমাত্ৰ উদ্যান য’ত আটাইতকৈ বেছি এশিঙীয়া গঁড়ৰ অৱস্থিতি পোৱা যায়।
উল্লেখ্য যে এই গঁড় গণনা কাৰ্যসূচী প্ৰতি তিনিবছৰৰ অন্তৰালত অনুষ্ঠিত হয় আৰু পূৰ্বৰ ২০১৫ বৰ্ষত হোৱা গঁড় গণনা প্ৰক্ৰিয়াত কাজিৰঙা ৰাষ্ট্ৰীয় উদ্যানখনত ২,৪০১টা গঁড়ৰ অৱস্থিতি পোৱা গৈছিল।
