ত্ৰিপুৰাত শেহতীয়াভাৱে মানৱ অংগৰ ব্যৱসায়ীৰ বাতৰিয়ে জনসাধাৰণক ভীতিগ্ৰস্ত কৰি তুলিছে। মঙলবাৰে এটা ১১বছৰীয়া বালকক নৃশংসভাৱে হত্যা কৰাৰ আগতে তাৰ কিডনী উলিয়াই লৈ যোৱাৰ এটা বাতৰি বিয়পি গৈছিল। হত্যাৰ বলি হোৱা ১১ বছৰীয়া ল’ৰাটো সীমনা আৰক্ষী থানাৰ অন্তৰ্গত ভূমিহীন কলনিৰ বাসিন্দাৰ অছিল।
অৱশ্যে ত্ৰিপুৰাৰ মুখ্য মন্ত্ৰী বিপ্লব কুমাৰ দেবে সমগ্ৰ ঘটনাটোকে ভিত্তিহীন বুলি স্পষ্টীকৰণ দিছে।
গৃহ বিভাগৰো দায়িত্বত থকা মুখ্য মন্ত্ৰী বিপ্লব দেবে বিৰোধী বিদায়ক তপন চক্ৰবৰ্তীয়ে এই বিষয়ে উত্থাপন কৰা এটা প্ৰশ্নৰ উত্তৰত কৈছে যে হত্যাৰ বলি ল’ৰাটোৰ দেহৰ পৰা কিডনী উলিয়াই নিয়া বুলি ত্ৰিপুৰাৰ আগশাৰীৰ সংবাদ মাধ্যমত প্ৰকাশিত বাতৰিটো মৰণোত্তৰ পৰীক্ষাত মিছা বুলি প্ৰমাণিত হৈছে। মুখ্য মন্ত্ৰীগৰাকীয়ে এই সমগ্ৰ ঘটনাটোকে বৰ্তমানে চৰকাৰখনে ড্ৰাগ আৰু অপৰাধৰ বিৰুদ্ধে অভিযান চলাই যোৱা নতুন নব নিৰ্বাচিত চৰকাৰখনৰ মৰ্যাদা হানি কৰাৰ বাবে কোনো গোটৰ দ্বাৰা সম্পন্ন কৰা এটা সংগঠিত অপৰাধ বুলি সন্দেহ ব্যক্ত কৰিছে।
মুখ্য মন্ত্ৰীয়ে ১১ বছৰীয়া ল’ৰাটোৰ পৈশাচিক হত্যাকাণ্ডটো কোনো পধ্যেই গ্ৰহণীয় নহয় বুলি কৈছে আৰু ইয়াৰ বাবে বিধান সভাৰ সকলো সদস্য আৰু মন্ত্ৰীসকল দুখী বুলি মন্তব্য কৰে। ড্ৰাগছ সৰবৰাহৰ সৈতে জড়িত মাফিয়াবোৰৰ বিৰুদ্ধে অভিযান চলোৱা আৰু গ্ৰেপ্তাৰ কৰাৰ বাবে চৰকাৰৰ মনোযোগ সেই বিষয়ৰ পৰা আঁতৰ কৰিবলৈ অপৰাধী বিলাকে এনে জঘন্য অপৰাধ সংঘটিত কৰিছে।
বিধানসভাত মুখ্য মন্ত্ৰীগৰাকীয়ে ঘোষণা কৰে যে মৰণোত্তৰ পৰীক্ষাৰ প্ৰতিৱেদন অনুসৰি নিহত ল’ৰাটোৰ দেহৰ পৰা কোনো অংগ-প্ৰত্যংগ আঁতৰাই নিয়া নাই।
ৰাজ্যখনত বিশেষজ্ঞ চিকিৎসকেৰে গঠিত এটা সংগঠিত অপৰাধী চক্ৰ সক্ৰিয়া হৈ থকাৰ কথাটো মুখ্য মন্ত্ৰীগৰাকীয়ে নস্যাৎ কৰে। তেওঁ আৰু কয় যে কিডনী সংৰোপিত কৰাৰ বাবে নিম্নতম বয়স হৈছে ১৮ বছৰ আৰু নিহত ল’ৰাটো হৈছে মাথোঁ ১১ বছৰ বয়সীয়া। তেওঁ আৰু কয় যে ঘটনাস্থলী পৰিদৰ্শন কৰাৰ বাবে তেওঁ আৰক্ষীৰ সঞ্চালক প্ৰধান আৰু মহা পৰিদৰ্শকক (আইন) নিৰ্দেশ দিছে।
তেওঁ আৰু কয় যে ওযৱা নিশা আৰক্ষীকো আক্ৰমণ কৰা হৈছিল আৰু ভিডিঅ’ ৰেকৰ্ডিঙৰ ওপৰত ভিত্তি কৰি এজন লোকক গ্ৰেপ্তাৰ কৰা হৈছে। বৰ্তমান লোকজনক জেৰা কৰি থকা হৈছে বুলি মুখ্য মন্ত্ৰীগৰাকীয়ে জনাইছে।
মুখ্য মন্ত্ৰীগৰাকীয়ে লগতে দোষীক অতি সোনকালে কৰায়ত্ব কৰি কাৰাগাৰলৈ নিক্ষেপ কৰাৰো আশ্বাস দিয়ে।
