শিক্ষা আয়ুক্তৰ কাৰ্যালয়ে যোৱা ১০ জুলাইত ই ডি এন (এল চি) ২৭/ ২০১৬/ ১৫০ পি টি ২/৩৮-এ নম্বৰৰ এক নিৰ্দেশ যোগে ৰাজ্যখনৰ বিভিন্ন জিলাত কৰ্মৰত ৯২৩৬ গৰাকী শিক্ষকলৈ তেওঁলোকক চাকৰিৰ পৰা কিয় বৰ্খাস্ত কৰা নহ’ব তাৰ কাৰণ দৰ্শোৱাৰ জাননী প্ৰতিজন শিক্ষকক প্ৰদান কৰিবলৈ শিক্ষা সঞ্চালকালয়ক আদেশ দিয়ে। এই কাৰ্যত ৰাজ্যখনৰ শিক্ষকসকলৰ মাজত প্ৰতিক্ৰিয়াৰ সৃষ্টি কৰিছে।
অসম ৰাজ্যিক প্ৰাথমিক শিক্ষক সন্মিলনীয়ে এই আদেশ শীঘ্ৰে প্ৰত্যাহাৰ কৰাৰ দাবী তুলিছে। সন্মিলনীৰ সভাপতি জীৱন চন্দ্ৰ বৰা আৰু সাধাৰণ সম্পাদক ৰাতুল চন্দ্ৰ গোস্বামীয়ে শুকুৰবাৰে এক বিবৃতি যোগে কয় যে শিক্ষকসকলে নিজৰ নিযুক্তি পত্ৰ নিজেই বনাই লোৱা নাই, বিধিগত প্ৰক্ৰিয়াৰে বিভাগে নিযুক্তিৰ ব্যৱস্থা কৰে। এনে প্ৰক্ৰিয়াত হোৱা ত্ৰুটি- বিচ্যুতিৰ কোনো তথ্য নিযুক্তিপ্ৰাপ্ত শিক্ষকসকলৰ হাতত নাথাকে। সেয়েহে বিভাগীয় কৰ্মচাৰীয়ে দিবলগীয়া উত্তৰ শিক্ষকৰ পৰা বিচৰাটো অযুক্তিকৰ।
বিবৃতিটোত লগতে কোৱা হৈছে যে সন্মিলনীয়ে দীৰ্ঘদিন ধৰি বেতন বঞ্চিত শিক্ষকসকলক তেওঁলোকৰ প্ৰাপ্য আদায় দিয়াৰ দাবী উত্থাপন কৰি আহিছে। চৰকাৰে এই শিক্ষকসকলৰ জৰিয়তেই ভোটাৰ তালিকা, লোকপিয়ল, এন আৰ চিৰ কাম সম্পাদন কৰাৰ উপৰি নিৰ্বাচনী দায়িত্বও অৰ্পণ কৰি আহিছে। এই শিক্ষকসকলৰ বেছিভাগৰে চাৰ্ভিছ বুক থকাৰ লগতে বিভাগীয় প্ৰশিক্ষণ, জি পি এফ আছে। তেওঁলোকে নিয়মীয়াকৈ বহুদিন দৰমহাও লাভ কৰিছিল।
সন্মিলনীয়ে আক্ষেপ প্ৰকাশ কৰে যে বিগত ২৮ বছৰ ধৰি এই শিক্ষকসকলৰ নথি পৰীক্ষণৰ নামত হাৰাশাস্তি কৰি অহা হৈছে। শেহতীয়াভাৱে আদালতেও শিক্ষকসকলৰ চাকৰি নিয়মীয়াকৰণৰ সিদ্ধান্ত গ্ৰহণৰ বাবে দায়িত্ব প্ৰদান কৰিছিল।
যোৱা ১৯ জুন তাৰিখে শিক্ষা বিভাগৰ উচ্চ পদস্থ বিষয়াসকলৰ উপস্থিতিত সন্মিলনী আৰু শিক্ষামন্ত্ৰীৰ আলোচনাত বেতন বঞ্চিত শিক্ষকসকলৰ সমস্যাটো আদালতৰ সিদ্ধান্তৰ পিছতে ব্যৱস্থা গ্ৰহণৰ প্ৰতিশ্ৰুতি দিছিল। তাৰপিছত সমাধানৰ পথ উলিওৱাৰ পৰিৱৰ্তে ভুক্তভোগী শিক্ষকসকলক কাৰণ দৰ্শোৱাৰ জাননী জাৰি কৰাটো ৰহস্যজনক বুলি অভিহিত কৰিছে শিক্ষক সন্মিলনীয়ে।
শিক্ষক সন্মিলনীয়ে উক্ত আদেশ বাতিল কৰি বিষয়টো সচিবালয় পৰ্যায়তে মানবীয় দৃষ্টিভংগীৰে সিদ্ধান্ত গ্ৰহণ কৰি সন্মাজনকভাৱে সমাধান কৰাৰ দাবী জনাইছে। সন্মিলনীয়ে উক্ত আদেশ বাতিল নকৰিলে প্ৰয়োজনত প্ৰতিবাদী কাৰ্যসূচী গ্ৰহণ কৰিব বুলিও বিবৃতিটোত সকীয়াই দিছে।