নিৰ্বাচন মুখী মেঘালয় ৰাজ্যত বিজেপিৰ হৈ প্ৰচাৰ কাৰ্য চলোৱাৰ উদ্দেশ্যে অহা দেশৰ গৃহ মন্ত্ৰী ৰাজনাথ সিঙে সোমবাৰে আইন-শৃংখলা সন্দৰ্ভত কৰা মন্তব্যক উভটি ধৰিছে ৰাজ্যখনৰ মুখ্য মন্ত্ৰী মুকুল চাংমাই। মুকুল চাংমাই সিঙৰ মন্তব্যক ভিত্তীহীন তথা দায়িত্বহীন মন্তব্য বুলি অভিহিত কৰিছে।
সোমবাৰে কেন্দ্ৰীয় গৃহ মন্ত্ৰী ৰাজনাথ সিঙে মেঘালয়ৰ পূব গাৰোপাহাৰ জিলাৰ চংচকত অনুষ্ঠিত এখন নিৰ্বাচনী সভাত অংশ লৈ তাৎপৰ্যমূলক মন্তব্য কৰি কৈছিল যে কংগ্ৰেছৰ শাসন কালত মেঘালয়ত আইন-শৃংখলাৰ অৱনতি ঘটিছে তথা অৰাজক পৰিৱেশে বিৰাজ কৰিছে। লগতে কয় যে চৰকাৰখনে ৰাইজক নিৰাপত্তা দিয়াত সম্পূৰ্ণ ব্যৰ্থ কিয়নো তাৰ প্ৰমাণ উইলিয়ামনগৰত সংঘটিত আইইডি বিস্ফোৰণ।
‘এখন দেশৰ গৃহ মন্ত্ৰীয়ে এইদৰে মন্তব্য কৰাটো একেবাৰে দায়িত্বহীন। তেওঁ নিজৰ দায়িত্বৰ কথা পাহৰি গৈছে নেকি?’ মুখ্য মন্ত্ৰী চাংমাই এনেদৰে প্ৰশ্ন কৰা দেখা যায় গৃহ মন্ত্ৰীজনক।
আনহাতে প্ৰশাসনৰ ওপৰত কৰা মন্তব্য সম্পৰ্কত চাংমাই কয়, ‘ৰাজ্যখনত আৰক্ষী বিভাগটো শক্তিশালী কৰাৰ বাবে কেন্দ্ৰত কংগ্ৰেছ চৰকাৰ থাকোতে আমি দাখিল কৰা প্ৰস্তাৱ চৰকাৰে অনুমোদন জনাইছিল কিন্তু পাচত বিজেপিয়ে এই সকলোবোৰত হস্তক্ষেপ কৰি আমাৰ প্ৰস্তাৱৰ অনুমোদন স্থগিত ৰাখে’।
তেওঁ লগতে কয় যে ৰাজ্যখনৰ আইন-শৃংখলা বিষয়ত কৰা প্ৰস্তাৱক কেন্দ্ৰীয় বিজেপি চৰকাৰে কোনো ধৰণৰ গুৰুত্ব আৰোপ কৰা নাই। আমি ৰাজ্যখনত যিকোনো সময়ত উদ্ভৱ হ’ব পৰা আইন শৃংখলা জনিত সমস্যাৰ মোকাবিলা কৰিবৰ বাবে নিজাববীয়াকৈ ১৭০০ জনক নিযুক্তি প্ৰদান কৰি স্পেচিয়েল ফোৰ্চ- ১০ গঠন কৰিছো।
‘নাগালেণ্ডত অবৈধ অস্ত্ৰ-শস্ত্ৰ অনায়াসে উপলব্ধ হয়। আন্তঃৰাষ্ট্ৰীয় সীমান্ত ভৰি আছে বিভিন্ন সুৰুঙাৰে আৰু গৃহ মন্ত্ৰী আছে ৰাজনীতিত ব্যস্ত’, চাংমাই এইদৰে মন্তব্য কৰে।
মুখ্য মন্ত্ৰীজনে লগতে কয় যে গৃহ মন্ত্ৰী সিঙে ৰাজ্যবাসীক ভয় ভাবুকি দেখুৱাই ভোট আদায় কৰাৰ প্ৰয়াস কৰিছে। ‘আমি ভিক্ষাৰী নহয়। কেন্দ্ৰৰ পৰা কোনো সহায় নোপোৱাকৈ আমি ৰাজ্যখনত ২.৫ লাখ টকাৰ জীৱন বীমা আঁচনি ৰূপায়ন কৰিছো’, এই মন্তব্য চাংমাৰ।
