সাংবাদিকসকলৰ অন্যতম শক্তিশালী সন্থা হিচাপে বিবেচিত আছাম প্ৰেছ কৰ’ছপণ্ডেণ্টছ ইউনিয়ন চমুকৈ ‘আপকু’ৰ কেন্দ্ৰীয় কাৰ্যনিৰ্বাহকৰ লগত সংগতি ৰাখি তথা ৰূপালী জয়ন্তীৰ সামৰণী অনুষ্ঠানত ৰাজ্যখনৰ দহগৰাকী সাংবাদিকলৈ আগবঢ়োৱা হ’ব বঁটা।
বঙাইগাঁৱত অনুষ্ঠিত হ’বলগীয়া অনুষ্ঠানটোত ‘অসমীয়া প্ৰতিদিন’ৰ নামৰূপৰ সংবাদদাতা স্মৃতিৰেখা কলিতাক পণ্ডিত সুৰেন্দ্ৰ নাৰায়ণ গোস্বামী স্মাৰক বঁটা, ‘নিউজ লাইভ’ৰ সাংবাদিক নিপ কুমাৰ বৰুৱাক বুধিন্দ্ৰ হাজৰিকা সদৌ অসম ইলেক্ট্ৰ’নিক মিডিয়া এৱাৰ্ড আগবঢ়োৱা হ’ব।
তদুপৰি একেটা অনুষ্ঠানতে ‘নিউজ লাইভ’ৰ জালুকবাৰীৰ সাংবাদদাতা ৰতন কলিতা আৰু ‘অসমীয়া প্ৰতিদিন’ৰ ফিলবাৰীৰ সংবাদদাতা পুষ্পধৰ মৰাণক যুটীয়াভাৱে ঊষা কমল চেতিয়া স্মাৰক সদৌ অসম সাংবাদিক বঁটা আগবঢ়োৱা হ’ব।
আনহাতে ‘প্ৰতিবিম্ব’ কাকতৰ ছিপাঝাৰৰ সাংবাদিক হিতেশ নাথ আৰি দুলীয়াজানৰ ‘নিয়মীয়া বাৰ্তা’ৰ সাংবাদিক কৃষ্ণ গগৈক যুটীয়াভাৱে মতিন্দ্ৰ চৌধুৰী স্মাৰক সদৌ অসম সাংবাদিক বঁটা, ‘অসমীয়া খবৰ’ৰ চৰাইদেওৰ সংবাদদাতা গৌতম গগৈ আৰু ‘অসমীয়া প্ৰতিদিন’ৰ নগাঁৱৰ চাপৰমুখৰ সংবাদদাতা দীপক কুমাৰ শৰ্মাক যুটীয়াভাৱে মণ্টু মোহন দাস স্মাৰক সদৌ অসম যুৱ সাংবাদিকতা বঁটা ঘোষণা কৰা হয়।
আনহাতে প্ৰথমবাৰৰ বাবে আপকুৱে বৰপেটা জিলাৰ হাউলীৰ সাংবাদিক ৰত্নেশ্বৰ তালুকদাৰ আৰু বঙাইগাঁৱৰ সাংবাদিক প্ৰণৱ কুমাৰ ডেকাক সংস্কৃত পণ্ডিত তথা শ্বহীদ সাংবাদিক ৰত্নেশ্বৰ শৰ্মা স্মাৰক সদৌ অসম সাংবাদিক বঁটা আগবঢ়োৱা হ’ব।
উল্লেখযোগ্য যে অহা ২৮, ২৯ আৰু ৩০ এপ্ৰিলত বঙাইগাঁৱত আপকুৰ অধিবেশনত উক্ত সাংবাদিক কেইগৰাকীক সন্মানিত কৰা হ’ব।