শিক্ষা বিভাগৰ এক হঠকাৰী সিদ্ধান্তৰ বাবেই এতিয়া সংকটৰ সন্মুখীন হৈছে ৰাজ্য শিক্ষাৰ্থীৰ লগতে শিক্ষক সমাজ। শিক্ষা বিভাগৰ হঠকাৰী কৰ্মৰ বাবে এতিয়া শিক্ষাৰ্থীক শিক্ষা দান কৰিবলৈ গৈ বিবুধিত পৰিছে শিক্ষকসকল।
উল্লেখ্য যে নতুন ৰাষ্ট্ৰী শিক্ষা নীতিক দোহাৰি দি ৰাজ্যৰ শিক্ষা বিভাগে গণিত আৰু বিজ্ঞানৰ পাঠ্যপুঠি ইংৰাজী ভাষাত ছপা কৰিছিল। শিক্ষা বিভাগে ইংৰাজীত পাঠ্যপুঠি ছপা কৰি বছৰ বছৰ ধৰি মাতৃভাষা অসমীয়াত শিক্ষা দান কৰি অহা শিক্ষকসকলক ইংৰাজী পাঠ দানৰ প্ৰশিক্ষণৰ ব্যৱস্থা কৰাৰ প্ৰতিশ্ৰুতি প্ৰদান কৰিও তেনে কোনো ব্যৱস্থা গ্ৰহণ নকৰিলে।
ইয়াৰ ফলতে নতুন শিক্ষা বৰ্ষ আৰম্ভ হোৱাত এতিয়া শিক্ষক আৰু শিক্ষাৰ্থীসকল উভয়ে সমস্যাৰ সন্মুখীন হৈছে। বিশেষকৈ গ্ৰামাঞ্চলৰ শিক্ষানুষ্ঠানৰ শিক্ষাৰ্থীসকল ইয়াৰ ফলত দুৰ্ভোগ ভুগিবলৈ ধৰিছে। এনে অঞ্চলসমূহৰ বিদ্যালয়ত শিক্ষকেও সঠিকভাৱে পাঠদান কৰিবলৈ সক্ষম নোহোৱাৰ লগতে অভিভাৱকেও সন্তানক ঘৰত পাৰ্যমানে সহায় কৰিব পৰা নাই। এনে বিপৰ্যয়ৰ বাবে এতিয়া শিক্ষাৰ্থীসকলৰ অভিভাৱকসকলো দুচিন্তাত পৰিছে।
ৰাজ্যজুৰি এনে সমস্যাৰে মোকাবিলা কৰিব নোৱাৰি এতিয়া ৰাজ্যখনৰ ১০ টাকৈ শিক্ষক সংগঠনে শিক্ষামন্ত্ৰী ডাঃ ৰণোজ পেগুলৈ স্মাৰক পত্ৰ প্ৰেৰণ কৰিবলৈ বাধ্য হৈ পৰিছে।
অসম ৰাজ্যিক প্ৰাথমিক শিক্ষক সন্মিলনী, সদৌ অসম মধ্য ইংৰাজী শিক্ষক সন্থা, সদৌ অসম মজলীয়া স্কুল শিক্ষক সন্থা, নিখিল বড়ো প্ৰাথমিক শিক্ষক সন্থা, সদৌ অসম চৰকাৰী বুনিয়াদী শিক্ষক সন্থা, সদৌ অসম জুনিয়ৰ কলেজ শিক্ষক কৰ্মচাৰী সন্থা, সদৌ অসম টেট উত্তীৰ্ণ শিক্ষক সমাজ, অসম ষ্টেটপুল শিক্ষক সন্থা, সদৌ অসম উচ্চতৰ মাধ্যমিক শিক্ষক আৰু কৰ্মচাৰী সন্থা আৰু অসম হাইস্কুল শিক্ষক সন্থাৰ উমৈহতীয়া সংগঠন সদৌ অসম সন্মিলিত শিক্ষক মঞ্চই শিক্ষা মন্ত্ৰীলৈ এই সন্দৰ্ভত এক স্মাৰক পত্ৰ প্ৰেৰণ কৰিছে।
তেওঁলোকে অসমৰ ৰাজহুৱা শিক্ষা ব্যৱস্থাটোক সুৰক্ষিত কৰি ৰাখিবলৈ তথা ছাত্ৰ-ছাত্ৰীৰ শৈক্ষিক ভৱিষ্যতৰ প্রতি লক্ষ্য ৰাখি ইংৰাজী ভাষাত ছপা কৰা গণিত-বিজ্ঞানৰ পাঠ্যপুথিসমূহ ওভতাই নিবলৈ দাবী জনাইছে। লগতে তাৎক্ষণিকভাৱে পাঠ্যপুঠিসমূহ মাতৃভাষাত ছপা কৰিবলৈও দাবী উত্থাপন কৰিছে সংগঠনকেইটাই।
উল্লেখ্য, ইংৰাজী ভাষাত গণিত আৰু বিজ্ঞানৰ পাঠ্যপুথি ছপাক কেন্দ্ৰ কৰি ৰাজ্যজুৰি ব্যাপক প্ৰতিক্ৰিয়াৰ সৃষ্টি হৈছিল। সাধাৰণ ৰাইজেও প্ৰতিক্ৰিয়া প্ৰকাশ কৰি আহিলেও কিন্তু ৰাজ্যখনৰ দুটাকৈ মূল ছাত্ৰ সংগঠন সদৌ অসম ছাত্ৰ সন্থা আৰু অসম জাতীয়তাবাদী যুৱ ছাত্ৰ পৰিষদে দায়সৰা মন্তব্য প্ৰদান কৰি ৰহস্যজনকভাৱে বিষয়টোকলৈ মৌন হৈ আছে। জাতীয় অনুষ্ঠান অসম সাহিত্য সভাৰো একেই অৱস্থান।
আছুৰ ভাৰপ্ৰাপ্ত সভাপতি উৎপল শৰ্মা আৰু ছাত্ৰ স্থাৰ সাধাৰণ সম্পাদক শংকৰজ্যোতি বৰুৱাই বিষয়টো সন্দৰ্ভত গ্রহণ কৰা সোপাডিলা ভূমিকাত শিক্ষক-অভিভাৱকসকলৰ মাজত অসন্তুষ্টিৰো সৃষ্টি হৈছে।
ইয়াৰ বিপৰীতে নিখিল বড়ো ছাত্ৰ সস্থা (এবছু) আৰু বড়ো সাহিত্য সভাই বিষয়টো সবল ৰূপত উত্থাপন কৰিছে। সংগঠন দুটাই শিক্ষা মন্ত্ৰীক সাক্ষাৎ কৰি চৰকাৰৰ মাতৃভাষা বিৰোধী সিদ্ধান্ত কোনো কাৰণতে মানি নোলোৱাৰ হুংকাৰ দিছে।
