খিলঞ্জীয়া লোকৰ প্ৰতিবাদত একপ্ৰকাৰে সেও মানিছে হিমন্ত বিশ্ব শৰ্মাৰ চৰকাৰৰ প্ৰশাসনে। খিলঞ্জীয়া লোকৰ প্ৰতিবাদত সেও মানি পুঁজিপতি আদানীক ভূমি গতাই দিয়া নহয় বুলি প্ৰকাশ কৰিবলৈ বাধ্য হৈছে কামৰূপ জিলা প্ৰশাসনে।
উল্লেখ্য যে, কামৰূপ জিলাৰ পলাশবাৰীৰ ট্ৰাইবেল্টৰ ১০০০ বিঘা মাটি পুঁজিপতি গৌতম আদানীক গতাই দিয়াৰ বাবে ব্যাপক প্ৰস্তুতি চলাইছিল কামৰূপ জিলা প্ৰশাসনে। প্ৰশাসনৰ এই তৎপৰতাৰ পিছতে অঞ্চলটোৰ খিলঞ্জীয়া জনগণেই ইয়াৰ বিৰুদ্ধে মাৰ বান্ধি ওলাই আহে।
প্ৰতিবাদী জনতাৰ ৰুদ্রমূর্তি দেখি কামৰূপৰ জিলা আয়ুক্তই স্পষ্ট কৰি দিবলৈ বাধ্য হ’ল যে পলাশবাৰী অঞ্চলৰ এহাজাৰ বিঘা মাটি আদানিক গতাই দিয়া হোৱা নাই আৰু গতাই দিবৰ বাবে কোনো নির্দেশো দিয়া নাই চৰকাৰে।
অৱশ্যে পৰৱৰ্তী সময়ত থলুৱাৰ মাটি বৃহৎ পুঁজিপতিক গতাই দিবৰ বাবে চলোৱা এই ষড়যন্ত্রই কেনে ৰূপ লয় সেয়া সময়েহে ক’ব।
উল্লেখ্য, ডিমা হাচাও জিলাত স্থানীয় ৰাইজৰ প্ৰবল বিৰোধিতা নেওচি ৯,০০০ বিঘা মাটি আদানিক গতাই দিব খোজা ঘটনাই সর্বত্র সৃষ্টি কৰা প্ৰতিক্ৰিয়াৰ বেশ মাৰ নৌযাওঁতেই পলাশবাৰী অঞ্চলৰ থলুৱা লোকৰ স্বাৰ্থ বিঘ্নিত কৰি পুনৰ আদানিক ১,০০০ বিঘা মাটি চমজাই দিব খুজিছিল অসম চৰকাৰে। আদানিক মাটি দিয়াৰ স্বাৰ্থতে পলাশবাৰী ৰাজহ চক্ৰৰ অধীনৰ বৰদুৱাৰ বাগানত স্থানীয় লোকক উচ্ছেদ কৰিবলৈ প্রস্তুতি চলাইছিল বিজেপি নেতৃত্বাধীন চৰকাৰে।
প্ৰকাশিত খবৰৰ মতে এসপ্তাহৰ পূৰ্বে প্ৰশাসনৰ উচ্চ পদস্থ বিষয়াই অঞ্চলটোত উপস্থিত হৈ পৰিস্থিতি বুজ লোৱাৰ লগতে উচ্ছেদ কৰিবলগীয়া ভূমি পৰিদৰ্শন কৰি আহিছিল। ইয়াৰ পাছতে ৰাভা হাছং পৰিষদৰ অন্তৰ্গত অঞ্চলটোৰ ৰাইজে ইয়াৰ বিৰুদ্ধে মাৰ বান্ধি ওলাই আহে।
স্থানীয় ৰাইজে হিমন্ত বিশ্ব শৰ্মাৰ চৰকাৰৰ থলুৱা বিৰোধী নীতিৰ বিৰুদ্ধে, আদানীক ভূমি গতাই দিয়াৰ বিৰুদ্ধে আন্দোলন তীব্ৰতৰ কৰি তোলে। বৰদুৱাৰ বাগান ভূমিপট্টন দাবী সমিতিৰ আহ্বানক্রমে বৃহস্পতিবাৰে কেইবাটাও দল-সংগঠনৰ সহযোগত অনুষ্ঠিত হয় বিশাল প্রতিবাদী সভা। স্থানীয় লোকৰ সৈতে গুৱাহাটী উচ্চ ন্যায়ালয়ৰ বিশিষ্ট অধিবক্তা, প্ৰগতিশীল লেখক শান্তনু বৰঠাকুৰ, যুৱনেতা সুব্ৰত তালুকদাৰ আদিও প্ৰতিবাদী সভা তথা আন্দোলনত অংশগ্ৰহণ কৰে।
‘বিজেপি চৰকাৰ হায় হায়’, ‘মুখ্যমন্ত্রী হিমন্ত বিশ্ব শর্মা মিছলীয়া’, ‘পলাশবাৰীৰ বিধায়ক হেমাংগ ঠাকুৰীয়া মিছলীয়া’, ‘ৰাজহমন্ত্রী যোগেন মহন হায় হায়’, ‘বৰদুৱাৰ বাগানৰ খিলঞ্জীয়া ৰায়তক উচ্ছেদ কৰি আদানি গোষ্ঠীক ভূমি হস্তান্তৰ কৰা নচলিব’, ‘বৰদুৱাৰ বাগান ভূমিপট্টন। দাবী সমিতি জিন্দাবাদ’, ‘কৃষক শ্রমিক এক হওক’ আদি ধ্বনিৰে উত্তাল হৈ পৰে সভাথলীৰ লগতে সমগ্ৰ বৰদুৱাৰ বাগান অঞ্চল। হাতে হাতে বেনাৰ-ফেস্টুন আদি লৈ শ শ লোকে প্রতিবাদী সভাত অংশগ্রহণ কৰে আৰু উচ্ছেদ বন্ধ নহ’লে সর্বাত্মক প্রতিবাদৰ হুংকাৰ দিয়ে।
অঞ্চলটোৰ শোষিত-বঞ্চিত, ভূমি পট্টাহীন খিলঞ্জীয়া ৰায়তক ভূমি পট্টা দিয়াৰ বিপৰীতে বৰদুৱাৰ বাগানৰ ১, ২ আৰু ৩নং পতিত ভূমিত এশ বছৰৰো অধিক কাল বাস কৰা লোকসকলক উচ্ছেদ কৰিবৰ বাবে চৰকাৰে প্ৰস্তুতি চলোৱা আৰু সেই মাটি গৌতম আদানিৰ কোম্পানীক গতাই দিব খোজা প্রচেষ্টা যিকোনো মূল্যৰ বিনিময়ত প্রতিহত কৰাৰ হুংকাৰ দিয়ে প্রতিবাদী জনতাই। ইয়াৰ পাছতে কামৰূপ জিলা প্ৰশাসনে অঞ্চলটোৰ ভূমি গৌতম আদানীক চমজাই দিয়া নহয় বুলি এক বিবৃতি প্ৰকাশ কৰে। স্থানীয় প্ৰশাসনে ইয়াক এক ভুৱা প্ৰচাৰ বুলিও মন্তব্য কৰিছে।
