ৰাজ্যখনত অবৈধ বিদেশী চিনাক্তকৰণৰ উদ্দেশ্যে ১০০০ খন বিদেশী ন্যায়াধীকৰণ স্থাপনৰ বাবে কেন্দ্ৰ আৰু অসম চৰকাৰে যৌথভাৱে উচ্চতম ন্যায়ালয়ত প্ৰস্তাৱ আগবঢ়াইছে।
অসমৰ ডিটেনশ্যন কেন্দ্ৰসমূহত আটক হৈ থকা লোকসকলৰ ভৱিষ্যৎ নিৰূপণৰ সৈতে জড়িত এটা গোচৰৰ শুনানিত বৃহস্পতিবাৰে উচ্চতম ন্যায়ালয়ত এই সন্দৰ্ভত এক বিশদ প্ৰতিবেদন দাখিলৰ নিৰ্দেশ দিছে।
চৰকাৰৰ প্ৰতিনিধিয়ে কয় যে প্ৰথম পৰ্যায়ত ২০০ খন বিদেশী ন্যায়াধীকৰণ স্থাপন কৰা হ’ব আৰু বাকী ন্যায়াধীকৰণসমূহ পৰৱৰ্তী পৰ্যায়ত স্থাপন কৰা হ’ব।
এই সন্দৰ্ভত মুখ্য ন্যায়াধীশ ৰঞ্জন গগৈ, ন্যায়াধীশ দীপক গুপ্তা আৰু সঞ্জীৱ খান্নাৰ বিচাৰপীঠে এনে বৃহৎ সংখ্যক ন্যায়াধীকৰণৰ বাবে ন্যায়াধীশ নিযুক্তি সম্পৰ্কেও প্ৰশ্ন কৰে।
উচ্চতম ন্যায়ালয়ে বিশদ তথ্য উল্লেখেৰে এখন নতুনকৈ শপতনাম দাখিলৰ বাবে নিৰ্দেশ দিছে। আদালতে লগতে কয় যে যদি প্ৰয়োজন হয় গোচৰটোৰ শুনানিৰ বাবে গ্ৰীষ্মৰ বন্ধৰ সময়ত বিশেষ বিচাৰপীঠ গঠন কৰা হ’ব।
বিদেশী নাগৰিকসকলক বহিস্কাৰ কৰা সন্দৰ্ভত গ্ৰহণ কৰা ব্যৱস্থা সন্দৰ্ভত উচ্চতম ন্যায়ালয়ে জানিব বিচৰাত মহাধিবক্তা তুষাৰ মেহতাই কয় যে বিষয়টো সন্দৰ্ভত বাংলাদেশ চৰকাৰৰ সৈতে উচ্চ পৰ্যায়ত আলোচনা চলি আছে।
মেহতাই কয় যে যিসকলে নিজকে বাংলাদেশী বুলি দাবী কৰে তেওঁলোকক বিতাৰণ কৰাত সমস্যা নাই, ‘’কিন্তু নিজকে বাংলাদেশী বুলি দাবী নকৰাসকলক লৈ সমস্যা হ’ব পাৰে।‘’
মেহতাই আদালতক জনায় যে গুৱাহাটীত থকা বাংলাদেশৰ উপ উচ্চায়ুক্তক ডিটেনশ্যন শিৱিৰত থকা বাংলাদেশী নাগৰিকক সাক্ষাৎ কৰাৰ অনুমতি দিয়া হৈছে।
আনহাতে, অধিবক্তা প্ৰশান্ত ভূষণে কয় যে আটকাধীন লোকসকলক দীৰ্ঘদিনৰ বাবে ডিটেনশ্যন কেম্পত ৰাখিব নোৱাৰে।
ইয়াৰ মাজতে সদৌ অসম ছাত্ৰ সন্থায়ো এই গোচৰটোত অংশ লোৱাৰ বাবে পৰিকল্পনা কৰিছে।
