সুদীৰ্ঘ ৫ বছৰৰ চেষ্টাৰ অন্তত জনপ্ৰিয় কন্ঠশিল্পী দীক্ষুৱে অসমৰ শ্ৰোতা ৰাইজৰ বাবে মুকলি কৰিলে ইপাৰ-সিপাৰ নামৰ এটি গীতৰ এলবাম। পবিত্ৰ মহা শিৱৰাত্ৰি তথা ভেলেন্টাইন দেৰ দিনাই অসমৰ শ্ৰোতা দৰ্শকলৈ ইপাৰ-সিপাৰৰ উপহাৰ দিলে কন্ঠশিল্পী দিক্ষুৱে।
এক বিশাল আয়োজনৰ মাজেৰে এই এলবাম মুকলি অনুষ্ঠান অনুষ্ঠিত হৈছিল গুৱাহাটীৰ গীতানগৰ খেলপথাৰত। দীক্ষুৰ এই ইপাৰ সিপাৰ শ্ৰব্য এলবামটি মুকলি কৰে যুৱ-প্ৰজন্মৰ হাৰ্টথ্ৰৱ জুবিন গাৰ্গে। এলবামটো মুকলি কৰি জুবিনে কন্ঠশিল্পী দীক্ষুক শুভেচ্ছা জনোৱাৰ লগতে ভবিষ্যতে সকলো সহায়-সহযোগিতা কৰি যাব বুলি কয়।
এলবাম উন্মোচনী অনুষ্ঠানৰ সৈতে সংগতি ৰাখি তথা ভেলেণ্টাইন দে উপলক্ষে আয়োজন কৰা সাংস্কৃতিক সন্ধ্যাত অসমীয়া অভিনয় জগতৰ সৈতে জড়িত গুঞ্জন ভৰদ্বাজ, নীল আৰু মেঘৰঞ্জনীকে ধৰি বহুকেইগৰাকীয়ে নৃত্য প্ৰদৰ্শন কৰে।
তদুপৰি সংগীত শিল্পী গীতালি কাকতি, আচুৰ্য্য বৰপাত্ৰ, মিন্টুমণিৰ লগতে আন আন শিল্পী সকলে গীত পৰিবেশন কৰি ভেলেন্টাইনৰ সন্ধ্যাটো জীপাল কৰি তোলে।
উল্লেখ্য যে ২০১২ চনত ‘ল’ৰালি’ এলবামৰ পিছত এইবাৰ দীক্ষুৱে শ্ৰোতা-দৰ্শকলৈ অনুৰাগ শইকীয়াৰ সংগীত পৰিচালনাৰে আগবঢ়াইছে ইপাৰ সিপাৰ এলবামৰ ৬ টাকৈ গীত।
দিগন্ত ভাৰতী, ইবচন লাল বৰুৱা, শশাংক সমীৰ, দীক্ষুৰ পত্নী বিজিয়েতাৰ কথা আৰু সুৰেৰে প্ৰকাশ পোৱা এই এলবামটোত গোটেই কেইটা গীততে কন্ঠদান কৰিছে দীক্ষু আৰু গীতালি কাকতিয়ে।
এই সাংস্কৃতিক অনুষ্ঠানৰ কাৰ্য্যসূচীৰ বন্তি প্ৰজ্বলনৰে শুভাৰম্ভণি কৰে বিশিষ্ট সংগীত শিল্পী ভূপেন উজীৰ আৰু শান্তা উজিৰে।
এই এলবাম মুকলি অনুষ্ঠানত অসমৰ সংগীত, অভিনয় তথা সাংস্কৃতিক ক্ষেত্ৰৰ লগত জৰিত কেইবাগৰাকীও জনপ্ৰিয় ব্যক্তি উপস্থিত থকাৰ লগতে দীক্ষুৰ অসংখ্য গুণমুগ্ধ উপস্থিত থাকে।
