১৬ ৰ পৰা ২০ ফেব্ৰুৱাৰিলৈ ৰাঁছি বিশ্ববিদ্যালয়ত হ’বলগীয়া ৰাষ্ট্ৰীয় আন্তঃ বিশ্ববিদ্যালয় যুৱ মহোৎসৱত গুৱাহাটী বিশ্ববিদ্যালয়ৰ ৪০ জনীয়া সদস্যৰ এটা দলে অংশ ল’ব। এই কথা জানিবলৈ দিয়ে বিশ্ববিদ্যালয় কৰ্তৃপক্ষই।
গুৱাহাটী বিশ্ববিদ্যালয়ক প্ৰতিনিধিত্ব কৰা সাংস্কৃতিক দলটোৱে প্ৰতিযোগিতাখনৰ লোক বাদ্য, লোক নৃত্য, মুকাভিনয়, হাস্যকৰ নাটক, পশ্চিমীয়া একক কণ্ঠ, পশ্চিমীয়া একক বাদ্যযন্ত্ৰ, পশ্চিমীয়া গ্ৰুপ সংগীত, তৰ্ক, কুইজ, মিমিক্ৰি, শাস্ত্ৰীয় একক কণ্ঠ আদি প্ৰতিযোগিতাত অংশ ল’ব।
উল্লেখণীয় যে দেশৰ বিভিন্ন মণ্ডল আন্তঃবিশ্ববিদ্যালয় যুৱ মহোৎসৱ প্ৰতিযোগিতাৰ প্ৰথম তিনিগৰাকী বিজয়ী প্ৰতিযোগিক ৰাষ্ট্ৰীয় আন্তঃবিশ্ববিদ্যালয় যুৱ মহোৎসৱৰ ২৬ টা বিভিন্ন শিতানৰ প্ৰতিযোগিতাত অংশগ্ৰহণ কৰাৰ বাবে সুবিধা প্ৰদান কৰিছে।
আনহাতে গুৱাহাটী বিশ্ববিদ্যালয়ত অনুষ্ঠিত পূব মণ্ডল আন্তঃবিশ্ববিদ্যালয় যুৱ মহোৎসৱত গুৱাহাটী বিশ্ববিদ্যালয়ে মুঠ ১৭ টা পদক পাবলৈ সক্ষম হৈছিল।
ইফালে গুৱাহাটী বিশ্ববিদ্যালয়ৰ উপাচাৰ্য ড০ মৃদুল হালৈয়ে যুৱ মহোৎসৱত অংশল’বলগীয়া বিশ্ববিদ্যালয়খনৰ দলটোক শুভেচ্ছা প্ৰদান কৰি কয় যে ৰাষ্ট্ৰীয় পৰ্যায়ত নিজৰ প্ৰতিভা সমূহ প্ৰতিফলিত কৰাৰ বাবে এইখন এখন শ্ৰেষ্ঠ মঞ্চ। লগতে এই প্ৰতিযোগিতাখনৰ জৰিয়তে দেশৰ ঐক্য সংহতি আৰু সম্প্ৰীতি যেন অটুট থাকে তাৰেই আশা কৰো।
গুৱাহাটী বিশ্ববিদ্যালয়ৰ ছাত্ৰ কল্যাণ সঞ্চালক ড০ ৰঞ্জন কুমাৰ কাকতিয়ে দলটোক শুভেচ্ছা বাৰ্তা প্ৰদান কৰি কয় যে ৰাষ্ট্ৰীয় পৰ্যায়ৰ প্ৰতিযোগিতাত ছাত্ৰ-ছাত্ৰী সকলে নিজৰ সুপ্ত প্ৰতিভাৰ উমান দিয়াৰ বাবে যুৱ মহোৎসৱ এখন ধুনীয়া মঞ্চ। মহোৎসৱখনৰ জৰিয়তে সকলো ঠাইৰে কৃষ্টি সংস্কৃতিৰ বিষয়ে জ্ঞান আহৰণ হ’ব আৰু ভৱিষৎ জীৱনত আগবাঢ়ি যোৱাত এনে মহোৎসৱে যথেষ্ট সহায় কৰিব। সেয়ে এনেধৰণৰ প্ৰতিযোগিতাত অংশ গ্ৰহণ কৰিবলৈ সকলো আগবাঢ়ি আহিব লাগে বুলি কাকতিয়ে মন্তব্য কৰে।
৪০ জনীয়া সদস্যৰ দলটো বিশ্ববিদ্যালয়খনৰ অধীনৰ বিভিন্ন মহাবিদ্যালয়ৰ ছাত্ৰ-ছাত্ৰী তথা বিশ্ববিদ্যালয়ৰ কিছু স্নাতকোত্তৰ পৰ্যায়ৰ ছাত্ৰ-ছাত্ৰীৰে গঠিত কৰা হৈছে বুলি জানিবলৈ দিয়ে।
ৰাষ্ট্ৰীয় আন্তঃ বিশ্ববিদ্যালয় যুৱ মহোৎসৱত গুৱাহাটী বিশ্ববিদ্যালয়ৰ এই দলটোক নেতৃত্ব দিব ড০ কাকতি আৰু কুলদীপ পাটগিৰীয়ে।
