চাকমা-হাজং শৰণাৰ্থী সকলক নাগৰিকত্ব প্ৰদান তথা তিব্বতীয়ান পুনৰসংস্থান আঁচনি ২০১৪ কাৰ্যকৰী কৰাৰ তীব্ৰ বিৰোধিতা কৰিছে সদৌ অৰুণাচল প্ৰদেশ ছাত্ৰ সংস্থা চমুকৈ আপছুৱে।
বুধবাৰে এক প্ৰেছ বিবৃতিযোগে আপছুৱে ক্ষোভ উজাৰি কয়: চাকমা আৰু হাজং সকল স্থানীয় খিলঞ্জীয়াৰ প্ৰতি এক ভাবুকি স্বৰূপ হৈ পৰিছে। কিয়নো তেওঁলোকৰ জনসংখ্যা খিলঞ্জীয়া সকলতকৈ তুলনামূলকভাৱে বহু বেছি।ইয়ে ৰাজ্যখনৰ ভৌগলিক জনগাঁথনি সলনি কৰিব।
চাকমা আৰু হাজং সকলে ৰাজ্যখনৰ ভূমি নীতি সম্পূৰ্ণৰূপে অগ্ৰাহ্য কৰাই নহয়, তেওঁলোকে খিলঞ্জীয়াৰ ভূমিৰ ওপৰত নিজৰ অধিকাৰ সাব্যস্ত কৰাৰ বাবে তৎপৰ হৈ পৰিছে।
আনকি তেওঁলোকে হত্যা, ধনদাবী আদিৰ দৰে বিভিন্ন অসামাজিক কাৰ্যকলাপৰ সৈতেও জড়িত হৈ পৰা বুলি গুৰুতৰ অভিযোগ উত্থাপন কৰে আপছুই।
স্মৰ্তব্য যে ব্ৰিটিছৰ শাসন কালৰ পৰাই অৰুণাচল প্ৰদেশক বিভিন্ন আইনৰ গণ্ডীৰ মাজেৰে পৰিচালিত আৰু সুৰক্ষিত কৰি ৰখা হৈছে।সেয়েহে কেন্দ্ৰীয় চৰকাৰৰ প্ৰস্তাৱিত উক্ত আইন ৰাজ্যখনৰ খিলঞ্জীয়া জনসাধাৰণৰ স্বাৰ্থৰ পৰিপন্থী।
আনহাতে আপছুৱে অৰুণাচল বিধানসভাৰ ১৩ সংখ্যক অধিবেশনে ৰাজ্যখনৰ খিলঞ্জীয়া লোকসকলক ভাৰতীয় সংবিধানৰ আওতাত সুৰক্ষা দিয়া হ’ব বুলি সন্মতি প্ৰকাশ কৰা বিষয়টো উনুকিয়াই দিয়ে।
উল্লেখ্য যে আজি ৰাজ্যখনৰ ৰাজধানী ইটানগৰত প্ৰয়াত মুখ্যমন্ত্ৰী দৰ্জে খাণ্ডু ৰাজ্যিক সভা কেন্দ্রটো আনুষ্ঠানিকভাৱে উদ্বোধন কৰিব প্ৰধানমন্ত্ৰী নৰেন্দ্ৰ মোডীয়ে। ইয়াৰ পূৰ্বে আপছুৰ ক্ষোভ প্ৰকাশ তাৎপৰ্যপূৰ্ণ।
