কৰ’না মহামাৰীয়ে জুৰুলা কৰা বিশ্বত এতিয়া স্বাস্থ্য সেৱাৰ অৱস্থা অত্যন্ত উদ্বেগজনক। আন্ত:গাঁথনিও প্ৰায় বিপৰ্যস্ত হৈ পৰিছে।
ভাৰততো কৰ’না মহামাৰীৰ ব্যাপক প্ৰভাৱ পৰিছে। দেশখনত কৰ’না ভাইৰাছৰ সংক্ৰমণ ব্যাপক হাৰত বৃদ্ধি পাইছে।
ইয়াৰ মাজতে ‘ফাউণ্ডেশ্যন অফ ৰিপ্ৰডাক্টিভ হেলথ চাৰ্ভিচেছ ইণ্ডিয়া’ই চলোৱা এক সমীক্ষাৰ প্ৰতিবেদন প্ৰকাশ পোৱাৰ পাছত আন এক উদ্বেগজনক তথ্য পোহৰলৈ আহিছে।
ভাৰতৰ বেচৰকাৰী খণ্ডত ‘ক্লিনিকেল ফেমিলি প্লেনিং চাৰ্ভিছ’আগবঢ়োৱা এক বৃহৎ সংস্থা হৈছে ‘ফাউণ্ডেশ্যন অফ ৰিপ্ৰডাক্টিভ হেলথ চাৰ্ভিচেছ ইণ্ডিয়া’।
সংস্থাটোৰ প্ৰতিবেদন অনুসৰি বিগত প্ৰায় ছয়মাহ ধৰি চলা কৰ’নাৰ তাণ্ডৱৰ মাজত দেশখনৰ জন্মনিয়ন্ত্ৰণ সেৱা বিঘ্নিত হৈ পৰিছে।
সমীক্ষা অনুসৰি, দেশৰ প্ৰায় ২.৫কোটি দম্পতিয়ে চৰকাৰী জন্মনিৰোধক সেৱাৰ পৰা বঞ্চিত হৈছে।
ইয়াৰ পৰিণতিতে অনাকাঙ্খিত সন্তান প্ৰসৱৰ আশংকাৰ সৃষ্টি হৈছে।
অহা কেইমাহমানৰ ভিতৰতে ভাৰতত প্ৰায় ১১লাখ অবাঞ্চিত সন্তান জন্মলাভৰ আশংকা কৰা হৈছে।
সমীক্ষাত প্ৰকাশ পোৱা মতে অহা বৰ্ষৰ প্ৰথমতে ভাৰতত প্ৰায় ১৮লাখ অতিৰিক্ত গৰ্ভপাত হ’ব আৰু ইয়াৰ ভিতৰত ১০লাখ গৰ্ভপাত শংকাজনক হ’ব।
প্ৰতিবেদন অনুসৰি, এই গৰ্ভপাতৰ সময়ত প্ৰসূতিৰ জীৱনলৈ সংশয় নামি আহিব পাৰে।
সংস্থাৰ এই প্ৰতিবেদনত কেইমাহমান পূৰ্বে য়ুনিচেফে ব্যক্ত কৰা আশংকাৰে প্ৰতিফলন ঘটিছে।
য়ুনিচেফে সদৰী কৰিছিল যে কৰ’নাৰ ফলত বিপৰ্যস্ত হৈ পৰা স্বাস্থ্যসেৱা তথা আন্ত:গাঁথনিৰ বাবে পৰৱৰ্তী ছয়মাহৰ ভিতৰত ৫৬হাজাৰতকৈয়ো অধিক প্ৰসূতি মৃত্যুমুখত পৰিব পাৰে।