গুৱাহাটীত চুৰি হৈছে ইখনৰ পিছত সিখনকৈ বাইক। এক বৃহৎ চক্ৰই গুৱাহাটীৰ বিভিন্ন স্থানৰ পৰা চুৰি কৰিছে নামী-দামী বাইক। যাৰ ফলত এতিয়া বাইক চুৰি চক্ৰক কৰায়ত্ব কৰাৰ অভিযানত নামি পৰিছে মহানগৰ আৰক্ষী।
ইতিমধ্যে বাইক চুৰি চক্ৰটোৰ ১১ জন ব্যক্তিক গ্ৰেপ্তাৰ কৰিছে আৰক্ষীয়ে।
আৰক্ষীয়ে জনোৱা মতে, গ্ৰেপ্তাৰ হোৱা ১১ জনৰ ভিতৰত ১০ গৰাকীয়েই মণিপুৰৰ।
চোৰ কেইটাক গ্ৰেপ্তাৰ কৰাৰ লগতে আৰক্ষীয়ে ১৩খন চুৰি মটৰ চাইকেল উদ্ধাৰ কৰিছে। ইয়াৰে ১২খন ৰয়েল এনফিল্ড বাইক।
তদুপৰি, দুখন মহিন্দ্ৰা থাৰ এছ ইউ ভি আৰু এখন মহিন্দ্ৰা স্ক’ৰপিঅ’কে ধৰি তিনিখন চুৰি গাড়ী জব্দ কৰা হৈছে।
তদন্তত প্ৰকাশ পাইছে যে চুৰি বাইকসমূহ বাছৰ জৰিয়তে মণিপুৰলৈ লৈ যোৱা হৈছিল। মণিপুৰৰ পৰা এই বাইকসমূহ ম্যানমাৰলৈ প্ৰেৰণ কৰা হয়।
জানিব পৰা মতে গোৱালপাৰাৰ ইনামুল হুছেইন নামৰ এটা চোৰে এই চুৰি কাণ্ডত মণিপুৰী চোৰ কেইটাক সহায় কৰিছিল।বাইক চুৰি চক্ৰৰ লগত জড়িত আন সকলকো গ্ৰেপ্তাৰ কৰিবলৈ তদন্ত অব্যাহত ৰাখিছে আৰক্ষীয়ে।
