লকডাউনৰ সময়ছোৱাত নতুন দিল্লীত কমেও ১২ জন উত্তৰ-পূৰ্বাঞ্চলৰ লোকৰ মৃত্যু হোৱাৰ লগতে ৰাষ্ট্ৰীয় ৰাজধানীখনত আন চাৰিজনৰ কোভিড-১৯ৰ ফলত মৃত্যু হৈছে।
দিল্লী আৰক্ষীৰ বিশেষ আয়ুক্ত ৰবীন হিবুৱে এইকথা জানিবলৈ দিয়ে।
অলপতে অসমৰ লখিমপুৰ জিলাৰ এগৰাকী যুৱতীৰ নতুন দিল্লীৰ এইমছত কোভিড-১৯ত আক্ৰান্ত হৈ মৃত্যু হৈছিল।
কোভিড-১৯ত মৃত্যু হোৱা ছানিয়া দেউৰী নামৰ যুৱতীগৰাকীয়ে ৰাষ্ট্ৰীয় ৰাজধানীখনত যোৱা ১২বছৰ ধৰি এটা ব্যক্তিগত প্ৰতিষ্ঠানত কাম কৰি আছিল।
হিবুৱে কয় যে স্মশানৰ অভাৱ আৰু মৃতদেহ কঢ়িওৱাৰ বাবে বাহনৰ অভাৱৰ ফলত অন্তিম সৎকাৰ কঠিন হৈ পৰিছিল।
‘’দক্ষিণ দিল্লীৰ দ্বাৰকাৰ ২৩ ছেক্টৰৰ সমাধিক্ষেত্ৰ এতিয়া সম্পূৰ্ণ ভৰি পৰিছে। উত্তৰ-পূৰ্বাঞ্চলৰ লোককেইজনৰ মৃতদেহ এই সমাধিক্ষেত্ৰত সৎকাৰ কৰা হৈছিল,’’-হিবুৱে কয়।
সমাধিক্ষেত্ৰখনৰ সম্প্ৰসাৰণৰ বাবে সমাধিক্ষেত্ৰ পৰিচালনা সমিতিক এটা বেচৰকাৰী সংস্থাই সহায়ৰ হাত আগবঢ়াইছে।
তেওঁ জানিবলৈ দিয়ে যে কেন্দ্ৰীয় গৃহ মন্ত্ৰ্যালয়ৰ উত্তৰ-পূৰ্বাঞ্চল বিভাগে ২০১৬চনত উত্তৰ-পূৰ্বাঞ্চলৰ লোকসকলৰ অন্তিম সৎকাৰৰ বাবে পুঁজি আগবঢ়াইছিল।
‘’আমি দিল্লীৰ যিকোনো স্থানৰ পৰা বিনামূলীয়াকৈ বাহনেৰে মৃতদেহ কঢ়িওৱাৰ বাবে চৰ্দাৰ দেবিন্দ্ৰ সিঙৰ নেতৃত্বৰ সংযুক্ত শিখৰ সৈতে চুক্তিবদ্ধ হৈছো,’’-হিবুৱে কয়।
অৰুণাচল প্ৰদেশৰ এগৰাকী আই পি এছ বিষয়া ৰবীন হিবুক দিল্লী আৰক্ষীয়ে উত্তৰ-পূৰ্বাঞ্চলৰ লোকসকলৰ বাবে নডেল অফিচাৰ হিচাপেও নিযুক্তি দিছে।
‘’ ঘৰৰ পৰা বহু আঁতৰত থকা এই অসহায় মৃত ব্যক্তিৰ তেওঁলোকৰ ধৰ্মীয় ৰীতিৰে মৰ্যাদাসম্পন্নভাৱে অন্তিম সৎকাৰ কৰিব পৰাটোতকৈ মোৰ বাবে আৰু গভীৰ শ্ৰদ্ধাঞ্জলি আন একো নাই,’’-হিবুৱে কয়।
