দেশত ৰাষ্ট্ৰীয় নাগৰিকপঞ্জী (এন আৰ চি) হ’লে ১৪ কোটি হিন্দু নাগৰিক বাদ পৰিব। আন্ত:ৰাষ্ট্ৰীয় হিন্দু পৰিষদৰ সভাপতি প্ৰবীণ টোগাড়িয়াৰ মন্তব্য এয়া।
দেশ জুৰি এন আৰ চি কাৰ্যকৰী কৰাৰ গৃহ মন্ত্ৰীৰ বক্তৱ্যৰ লগতে কেন্দ্ৰীয় চৰকাৰে নাগৰিকত্ব সংশোধনী বিধেয়ক গৃহীত কৰি আইনত পৰিণত কৰে।
উক্ত আইনখনৰ জৰিয়তে চৰকাৰে চুবুৰীয়া তিনিখন দেশৰ ধৰ্মীয় নিৰ্যাতনৰ বলি সংখ্যালঘু লোকক নাগৰিকত্ব দিয়াৰ ব্যৱস্থা কৰিছে।
কেন্দ্ৰৰ এই আইনখনৰ বিৰুদ্ধে সমগ্ৰ দেশ প্ৰতিবাদত উত্তাল হৈ পৰিছে। কেন্দ্ৰীয় চৰকাৰে এই আইনখন আনি হিন্দুত্ববাদীসকলৰ সমৰ্থন লাভ কৰিব বুলি আশা কৰিছিল।
পিচে, কেন্দ্ৰীয় চৰকাৰৰ এই আশাত চেঁচা পানী ঢালিলে প্ৰবল হিন্দুত্ববাদী নেতা প্ৰবীণ টোগাড়িয়াই।
টোগাড়িয়াই স্পষ্ট কৰি কৈছে যে দেশৰ নাগৰিকৰ তালিকাত হিন্দু নাগৰিকো বাদ পৰিব পাৰে। বিশ্ব হিন্দু পৰিষদৰ নেতাগৰাকীৰ এনে মন্তব্যত শলঠেকত পৰিছে কেন্দ্ৰীয় চৰকাৰ।
টোগাড়িয়াৰ মন্তব্যৰ শাণত বিদ্ধ হোৱাৰ পথত প্ৰধান মন্ত্ৰী নৰেন্দ্ৰ মোদী আৰু অমিত শ্বাহ যুটী।
বিশ্ব হিন্দু পৰিষদৰ প্ৰগল্ভ নেতাগৰাকীয়ে দেশৰ আৰ্থিক পৰিস্থিতিৰ লগতে এন আৰ চি তথা চি এ এৰ বিৰুদ্ধে সংঘটিত হৈ থকা নিৰৱিচ্ছিন্ন প্ৰতিবাদী আন্দোলনৰ বাবেও চৰকাৰকে দোষাৰোপ কৰে।
উত্তৰ প্ৰদেশৰ মীৰাটৰ এখন হাস্পাতালত অলপতে সাংবাদিকৰ সৈতে হোৱা মত বিনিময় সভাত টোগাড়িয়াই অসমৰ এন আৰ চিৰ প্ৰসংগ টানি আনি কয়,’’ইয়াত ৪৫ লাখ বিদেশীয়ে ভাৰতীয় নাগৰিকত্ব লাভ কৰিছে। কিন্তু ১৫ লাখ ভাৰতীয় নাগৰিকৰ নাম তালিকাৰ পৰা বাদ পৰিছে।‘’
তদুপৰি, তেওঁ কয়,’’একেধৰণে দেশ জুৰি এন আৰ চি হ’লে তালিকাৰ পৰা ১৪ কোটি হিন্দুৰ নাম বাদ পৰিব।‘’
বিশ্ব হিন্দু পৰিষদৰ নেতাগৰাকীয়ে লগতে ৰাম মন্দিৰ সন্দৰ্ভতো মোদী –শ্বাহক আক্ৰমণৰ লক্ষ্য কৰি লয়।
তেওঁ কয়,‘’নৰেন্দ্ৰ মোদী কৰসেৱক আছিল নে তেওঁ কেতিয়াবা অযোধ্যাৰ পক্ষে প্ৰচাৰ চলাইছিল। তেনেহ’লে ৰাম মন্দিৰক লৈ তেওঁক কৃতিত্ব দিয়া হ’ব কিয়?’’
