তামুলপুৰ জিলাৰ ভাৰত-ভূটান সীমান্তৰ নাগ্ৰীজুলিৰ ২ নং ডোঙৰগাঁৱত নিশাৰে পৰা বৰনদীৰ বুকুত আবদ্ধ হৈ আছে ১৪ টাকৈ পৰিয়াল।
নিশাৰে পৰা আবদ্ধ হৈ আছে ১৪ টাকৈ পৰিয়ালৰ শিশু মহিলা সহ প্ৰায় ৭০ গৰাকী লোক। ইয়াৰ উপৰিও মানুহৰ লগতে জলবন্দী হৈ আছে বহু পশু ধনো। ভূটান পাহাৰৰ পৰা বৈ অহা খৰস্ৰোতা বৰনদীৰ বাঢ়নী পানীয়ে নৈৰ পূব দিশৰ মঠাউৰি ভাঙি যোৱাৰ ফলতেই দ্বীপ এটাৰ সৃষ্টি হৈ জলবন্দী হৈ পৰিছে এই সমূহ পৰিয়াল। ইতিমধ্যে বহু পৰিয়ালৰ বাসগৃহ নৈৰ বুকুত জাহ গৈছে। খবৰ পাই তামুলপুৰৰ বিধ্যয়ক জলেন দৈমাৰী, বিটিচিৰ কাৰ্যবাহী সদস্য ডঃ ধৰ্মনাৰায়ন দাস, তামুলপুৰ জিলা প্ৰশাসনৰ লোক সকল আহি নৈৰ পাৰত উপস্থিত হৈছে।
ইতিমধ্যে তামুলপুৰ জিলা প্ৰশাসনে লোক কেইজনক উদ্ধাৰৰ বাবে তৎকালীন ব্যৱস্হা লোৱা পৰিলক্ষিত হৈছে। জিলা প্ৰশাসন, তামুলপুৰৰ বিধায়ক জলেন দৈমাৰী আৰু বিটিচিৰ কাৰ্যবাহী সদস্য ধৰ্মনাৰায়ন দাসৰ তৎপৰাতত এছডিআৰএফ, এনডিআৰএফৰ লোক আহি ২নং ডোঙৰগাঁওত উপস্থিত হৈ উদ্ধাৰ কাৰ্যত নামি পৰিছে।
ইপিনে বৰনদীত চলা অবৈধ শিল বালি খননৰ বাবেই আৰু নদীৰ বুকুত শিল বালি দম দম কৈ ৰখাৰ বাবেই পানীৰ সোঁত পৰিৱৰ্তন হৈ মঠাউৰি ভাঙি যোৱাৰ গুৰুতৰ অভিযোগ উত্থাপন কৰিছে স্বয়ং বিটিচিৰ কাৰ্যবাহী সদস্য ধৰ্মনাৰায়ণ দাসে। বিটিচিৰ কাৰ্যবাহী সদস্য এগৰাকীৰ অবৈধ খননৰ বিৰুদ্ধে অনা এনে অভিযোগে বিশেষ তাৎপৰ্য বহন কৰিছে।