কৰ’নাৰ ভেকচিন গ্ৰহণ কৰি ভেকচিনৰ পাৰ্শ্ব প্ৰতিক্ৰিয়া ঘটাৰ বহুকেইটা ঘটনাৰ বাতৰি পোৱা গৈছে।
ইতিমধ্যে ভেকচিন লোৱাৰ পিছতে এজন লোকৰ মৃত্যুও ঘটা বুলি অভিযোগ উঠিছে।
এনে সময়তে শেহতীয়াকৈ কোভিডৰ ভেকচিন গ্ৰহণ কৰি অসমৰ চুবুৰীয়া ৰাজ্য পশ্চিমবংগত ১৪ জনকৈ লোক অসুস্থ হৈ পৰাৰ বাতৰি পোৱা গৈছে।
তেওঁলোকৰ মাজৰে দুজনৰ অৱস্থা অতি সংকটজনক বুলি জানিব পৰা গৈছে।
তেওঁলোকক পশ্চিমবংগৰ চিকিৎসালয়ৰ আইচিইউত ভৰ্তি কৰোৱা হৈছে।
বাতৰি অনুসৰি, ৰাজধানী দিল্লীতেই ভেকচিন গ্ৰহণৰ পাছত ৫২জন স্বাস্থ্যকৰ্মীৰ দেহত পাৰ্শ্ব প্ৰতিক্ৰিয়া দেখা গৈছে।
ইয়াৰ ভিতৰত ৫১জনৰ দেহত সামান্য আৰু এজনৰ দেহত গুৰুতৰ পাৰ্শ্ব প্ৰতিক্ৰিয়া দেখা দিছে।
সেইদৰে তেলেংগানাত ১১জনৰ দেহত পাৰ্শ্ব প্ৰতিক্ৰিয়া দেখা দিয়াৰ কথা জানিব পৰা গৈছে।
শনিবাৰৰ পৰা সমগ্ৰ দেশতে আৰম্ভ হৈছে কৰ’নাৰ ভেকচিন প্ৰদানৰ কাৰ্যসূচী। দুই এটা সৰু ঘটনাৰ কথা বাদ দিলে গোটেই দেশতে প্ৰথমটো দিনৰ টীকাকৰণ প্ৰক্ৰিয়া সুকলমে পাৰ হৈ যায়।
কিন্তু নিশা আগবাঢ়ি যোৱালৈকে বহুকেইটা পাৰ্শ্ব প্ৰতিক্ৰিয়াৰ ঘটনা পোহৰলৈ আহিছে।
পৰহিও কলকাতাত এগৰাকী নাৰ্ছ অসুস্থ হৈ পৰাৰ খৱৰ পোৱা গৈছিল। তেওঁক হাস্পাতলত ভৰ্তি কৰা হয়।
দিল্লীত টীকাকৰণৰ পাছতে দুজন স্বাস্থ্যকৰ্মীৰ দেহত পাৰ্শ্ব প্ৰতিক্ৰিয়া দেখা গৈছিল। দুয়োজনকে চৰক পালিকা হাস্পাতলত ভেকচিন প্ৰদানৰ পাছত বুকুত চাপ অনুভৱ কৰে। আধা ঘন্টা পৰ্যবেক্ষণত ৰখাৰ পাছত স্বাভাৱিক হৈ পৰাত তেওঁলোকক যাবলৈ দিয়া হয়।
দিল্লী চৰকাৰৰ স্বাস্থ্য বিভাগৰ সূত্ৰ অনুসৰি দিল্লীত মুঠ ৫২জন স্বাস্থ্যকৰ্মীৰ দেহত পাৰ্শ্ব প্ৰতিক্ৰিয়া দেখা গৈছিল। দক্ষিণ দিল্লীৰ এজন স্বাস্থ্যকৰ্মী গুৰুতৰভাৱে অসুস্থ হৈ পৰা বুলি কোৱা হৈছে।
