দেশৰ বিভিন্ন প্ৰান্তৰ পৰা নৱজাতক শিশুক চুৰি কৰি হায়দৰাবাদলৈ আনি এক বৃহৎ ব্যৱসায় চলাই থকা এটা সংগঠিত চক্ৰক শেহতীয়াকৈ আৰক্ষীয়ে উৎখাত কৰিবলৈ সক্ষম হৈছে। এই গেংটোৱে প্ৰতিটো শিশুৰ মূল্য ১৫ লাখ টকালৈকে নিৰ্ধাৰণ কৰিছিল আৰু ইতিমধ্যে তেওঁলোকে ১৫ টাকৈ কেঁচুৱা বিক্ৰী কৰাৰ তথ্য পোহৰলৈ আহিছে। হায়দৰাবাদ আৰক্ষীয়ে নিৰুদ্দেশ হোৱা শিশুৰ সন্ধানত অভিযান চলাই এই চক্ৰটোৰ কেইবাজনো সৰবৰাহকাৰীক আটক কৰিছে। মাধোপুৰৰ ডিচিপি ৰিথিৰাজে জনোৱা মতে উদ্ধাৰ হোৱা আৰু বিক্ৰী হোৱা এই কেঁচুৱাবোৰৰ বয়স মাত্ৰ কেইদিনমানহে আছিল। গ্ৰেপ্তাৰ হোৱা লোকসকলৰ বিৰুদ্ধে পূৰ্বেও বিভিন্ন ৰাজ্যত অপৰাধমূলক গোচৰ আছিল বুলি আৰক্ষীয়ে প্ৰকাশ কৰিছে।
আৰক্ষীৰ তদন্তত ওলাই পৰা অনুসৰি এই সৰবৰাহকাৰী গেংটোৱে আহমেদাবাদকে ধৰি দেশৰ বিভিন্ন চহৰৰ চিকিৎসালয়ত নিজৰ নেটৱৰ্ক গঢ়ি তুলিছিল। তাত তেওঁলোকৰ এজেণ্টসকলে চিকিৎসালয়ৰ পৰা সুযোগ বুজি শিশু চুৰি কৰাৰ কাম কৰিছিল। এই চক্ৰটোৱে মূলতঃ দৰিদ্ৰ পৰিয়ালৰ দম্পতীক লক্ষ্য কৰি লৈছিল যাতে তেওঁলোকৰ সন্তান চুৰি কৰিলে সহজে ধৰা নপৰে। চিকিৎসালয়ৰ পৰা শিশুকেইটা চুৰি কৰাৰ পাছত অতি গোপনীয়ভাৱে হায়দৰাবাদলৈ লৈ অহা হৈছিল আৰু তাৰ পাছত সন্তানহীন ধনী পৰিয়াল বিচাৰি উলিয়াই লাখ লাখ টকাত সেই কেঁচুৱাবোৰ বিক্ৰী কৰি দিছিল।
এই ভয়ংকৰ ঘটনাৰ লগত জড়িত থকাৰ অভিযোগত এতিয়ালৈকে ১২ জন লোকক আৰক্ষীয়ে গ্ৰেপ্তাৰ কৰিছে। তদন্তকাৰী বিষয়াসকলে সন্দেহ কৰিছে যে চিকিৎসালয়ৰ ভিতৰৰ কোনো কৰ্মচাৰী বা চিকিৎসৰ সহায় নোহোৱাকৈ ইমান ডাঙৰ চক্ৰ এটা চলোৱাটো সম্ভৱ নহয়। সেইবাবেই আৰক্ষীয়ে বৰ্তমান ৮ খনকৈ চিকিৎসালয়ক নিৰীক্ষণত ৰাখিছে আৰু সেই চিকিৎসালয়সমূহৰ কৰ্মচাৰী তথা চিকিৎসকৰ বেংক একাউণ্ট পৰীক্ষা কৰা আৰম্ভ কৰিছে। যিকোনো বৃহৎ লেনদেনৰ তথ্য পালেই আৰক্ষীয়ে কঠোৰ ব্যৱস্থা গ্ৰহণ কৰিব বুলি হুংকাৰ দিছে।
আৰক্ষীৰ অভিযানৰ সময়ত বৰ্তমানলৈকে দুটা শিশুক সুৰক্ষিতভাৱে উদ্ধাৰ কৰা হৈছে আৰু তেওঁলোকক বৰ্তমান চৰকাৰী চিকিৎসালয়ত চিকিৎসাৰ বাবে ভৰ্তি কৰোৱা হৈছে। এই শিশু দুটিৰ আচল পিতৃ-মাতাক বিচাৰি উলিয়াবলৈ আৰক্ষীয়ে চেষ্টা চলাই আছে। লগতে যি ১৩ টা কেঁচুৱা ইতিমধ্যে বিক্ৰী কৰা হৈছিল সেইবোৰ ক’ত আছে আৰু কাৰ ওচৰত আছে সেই সন্দৰ্ভতো ধৃত অপৰাধীসকলক সোধা-পোছা কৰি থকা হৈছে। সমগ্ৰ দেশজুৰি নেটৱৰ্ক থকা এই চক্ৰটোৰ আন সদস্যসকলক ধৰিবলৈ আৰক্ষীয়ে বিভিন্ন স্থানত তালাচী অভিযান অব্যাহত ৰাখিছে।
