মাকৰ পৰকীয়া সম্পৰ্কৰ বিৰোধিতা কৰাটোৱেই কাল হ’ল এগৰাকী ১৫ বছৰীয়া কিশোৰৰ। অভিযোগ অনুসৰি, নিজৰ প্ৰেমিকৰ সৈতে মিলি মহিলাই সম্পৰ্কৰ পথত হেঙাৰ হৈ থিয় দিয়া নিজৰ পুত্ৰক হত্যা কৰে। তাৰ পিছত এই হত্যাকাণ্ড লুকুৱাবলৈ ল’ৰাজন সন্ধানহীন হোৱাৰ নাটক ৰচনা কৰে। অৱশেষত আৰক্ষীৰ বিশেষ তদন্তকাৰী দলৰ অনুসন্ধানত এই ভয়ংকৰ সত্য পোহৰলৈ আহে। এই চাঞ্চল্যকৰ ঘটনাটো সংঘটিত হৈছে অন্ধ্ৰপ্ৰদেশৰ কুৰ্নুল জিলাৰ আদোনি অঞ্চলত।
আৰক্ষীৰ সূত্ৰই প্ৰকাশ কৰা অনুসৰি, মৃত কিশোৰজনৰ নাম বীৰেন্দ্ৰ। সি আদোনি মণ্ডলৰ জি হোচাল্লি গাঁৱৰ বাসিন্দা আছিল। তদন্তকাৰীসকলে দাবী কৰা মতে, বীৰেন্দ্ৰৰ মাক গংগাম্মাৰ সৈতে দৰগাপ্পা নামৰ এজন ব্যক্তিৰ অবৈধ সম্পৰ্ক আছিল। দীৰ্ঘদিন ধৰি বীৰেন্দ্ৰই মাকৰ এই সম্পৰ্কক লৈ আপত্তি দৰ্শাই আহিছিল। অভিযোগ অনুসৰি, সি কেৱল পৰিয়ালৰ সদস্যসকলৰ আগতেই নহয়, গাঁৱৰ মানুহৰ আগতো এই কথা প্ৰকাশ কৰিছিল।
ইয়াৰ ফলত ঘৰত প্ৰায়েই কাজিয়া হৈছিল। তদন্তকাৰীসকলে অনুমান কৰিছে যে সম্পৰ্কটো সকলোৱে গম পোৱাৰ ভয় আৰু ল’ৰাজনৰ অহৰহ প্ৰতিবাদৰ বাবেই তাক আঁতৰাই পেলোৱাৰ পৰিকল্পনা কৰা হৈছিল। অভিযোগ অনুসৰি, বীৰেন্দ্ৰক হত্যা কৰাৰ পিছত দুয়ো মিলি গাঁৱৰ বাহিৰৰ এখন কবৰস্থানত গোপনে তাৰ মৃতদেহটো পুতি থৈছিল।
ঘটনাৰ পিছত সন্দেহৰ পৰা হাত সাৰিবলৈ অভিযুক্তই আন এক কৌশল অৱলম্বন কৰে। বীৰেন্দ্ৰৰ মাকে নিজেই থানাত ল’ৰা সন্ধানহীন হোৱাৰ ডায়েৰী দাখিল কৰে। পুত্ৰক বিচৰাৰ নামত তাই বিভিন্ন ঠাইত অভিযান চলোৱাৰো ভাও জোৰে। আনকি আৰক্ষীৰ তদন্তত পলম হোৱাৰ অভিযোগ তুলি তাই উচ্চ ন্যায়ালয়ৰ কাষ চাপে আৰু পুত্ৰক বিচাৰি উলিওৱাৰ নিৰ্দেশ বিচাৰি আবেদন জনায়।
ন্যায়ালয়ৰ নিৰ্দেশৰ পিছত তদন্ত খৰতকীয়া কৰিবলৈ এটা বিশেষ তদন্তকাৰী দল গঠন কৰা হয়। তদন্তৰ সময়ত গংগাম্মা আৰু দৰগাপ্পাৰ কথাত আৰক্ষীয়ে কেইবাটাও খেলিমেলি ধৰা পেলায়। ফোনৰ তথ্য আৰু স্থানীয় সাক্ষীসকলৰ বক্তব্য বিশ্লেষণ কৰাৰ পিছত তদন্তকাৰীসকলৰ সন্দেহ আৰু অধিক ঘনীভূত হয়। এগৰাকী আৰক্ষী বিষয়াই জানিবলৈ দিয়ে যে ইয়াক কেৱল এক নিৰুদ্দেশৰ ঘটনা হিচাপে সজাবলৈ চেষ্টা কৰা হৈছিল। কিন্তু বৈজ্ঞানিক প্ৰমাণ আৰু সাক্ষীসকলৰ ভাষ্যই প্ৰকৃত ঘটনাটো পোহৰলৈ আনে।
সোধা-পোছাৰ অন্তত আৰক্ষীয়ে কবৰস্থানৰ নিৰ্দিষ্ট ঠাইটুকুৰা চিনাক্ত কৰে। যোৱা ১ জুন তাৰিখে ৰাজহ বিষয়া, চিকিৎসকৰ দল আৰু কটকটীয়া নিৰাপত্তাৰ মাজত মাটি খান্দি বীৰেন্দ্ৰৰ মৃতদেহ উদ্ধাৰ কৰা হয়। মৰণোত্তৰ পৰীক্ষাৰ বাবে মৃতদেহটো চিকিৎসালয়লৈ প্ৰেৰণ কৰা হৈছে। ইতিমধ্যে দৰগাপ্পাক আৰক্ষীয়ে নিজৰ জিম্মাত লৈছে। এই ঘটনাৰ সৈতে আন কোনোবা জড়িত আছে নেকি আৰু কেনেকৈ এই হত্যাকাণ্ডৰ পৰিকল্পনা কৰা হৈছিল, সেই বিষয়ে আৰক্ষীয়ে তদন্ত অব্যাহত ৰাখিছে।
