বিকাশে নতুন মাত্রা লাভ কৰা দাবী কৰা হিমন্ত বিশ্ব চৰকাৰ ধাৰ, ঋণৰ বোজাত পোত গৈছে। কাৰণ চলিত বৰ্ষৰ ৩১ মাৰ্চলৈ অসম চৰকাৰৰ সৰ্বমুঠ ঋণৰ বোজা হ’ল ১,৭২,১৭৪.৭৪ কোটি টকা। এই হিচাপত অসমৰ জনমূৰি ঋণ হ’ল ৫২,১৬৪ টকা।
বিত্ত মন্ত্রী অজন্তা নেওগে কালি বিধানসভাত দাখিল কৰা বাজেটৰ তথ্যৰ পৰা এই কথা পোহৰলৈ আহিছে। ১,৭২,১৭৪.৭৪ কোটি ঋণৰ ভিতৰত ৰিজার্ভ বেংকৰ পৰা লোৱা ঋণ ১,১৩,৫৮২.৪১ কোটি টকা, কেন্দ্ৰীয় চৰকাৰৰ পৰা লোৱা ঋণ ২০৪৮২.১৫ কোটি টকা, ভাৰতীয় জীৱন বীমা নিগম, ভাৰতীয় সাধাৰণ বীমা নিগম, ৰাষ্ট্ৰীয় সমবায় উন্নয়ন নিগম আৰু নাবাৰ্ডৰ পৰা লোৱা ঋণ ১৩০২১.৮০ কোটি টকা, ৰাষ্ট্ৰীয় ক্ষুদ্ৰ সঞ্চয়ৰ পৰা লোৱা ঋণ হ’ল ৩৪২৪.৮০ কোটি টকা। তদুপৰি চৰকাৰে বিভিন্ন শিতানৰ পৰা লোৱা সৰ্বমুঠ ধাৰ হ’ল ২১৬৬৩.৫৮ কোটি টকা। ইফালে, মুঠ ৰাজ্যিক ঘৰুৱা উৎপাদনৰ অনুপাতে গ্ৰহণ কৰা ঋণৰ হাৰৰ ক্ষেত্ৰত অসম ভাৰতৰ ভিতৰত আটাইতকৈ তলৰ স্থানত আছে বুলি মুখ্যমন্ত্রী হিমন্ত বিশ্ব শৰ্মাৰ উপৰি বিত্ত মন্ত্রী নেওগে বাজেটত উল্লেখ কৰে।
মুখ্যমন্ত্ৰীৰ মতে, অসমৰ মুঠ ৰাজ্যিক ঘৰুৱা উৎপাদনৰ বিপৰীতে ঋণৰ অনুপাতত দেশৰ ভিতৰতে সৰ্বনিম্ন স্থানত আছে অসম। ২০২৩-২৪ বর্ষত জিএছডিপিৰ বিপৰীতে ঋণৰ অনুপাত হ’ল ২৪.৩ শতাংশ। অজন্তা নেওগে বাজেটত উল্লেখ কৰা অনুসৰি ঋণৰ পৰিমাণত পঞ্জাবৰ মুঠ ৰাজ্যিক ঘৰুৱা উৎপাদন হ’ল ৪১.৪ শতাংশ, হিমাচল প্ৰদেশৰ ৪১.১ শতাংশ, পশ্চিমবংগৰ ৩৪.৫ শতাংশ, কেৰালাৰ ৩৪.২ শতাংশ, ৰাজস্থানৰ ৩২.৬ শতাংশ, অন্ধ্রপ্রদেশৰ ৩০.৯ শতাংশ, উত্তৰ প্ৰদেশৰ ২৮.০ শতাংশ, তামিলনাডুৰ ২৬.৬ শতাংশ আৰু মধ্যপ্ৰদেশৰ ২৫.৭ শতাংশ।
বিত্ত মন্ত্রী অজন্তা নেওগে বাজেটত উল্লেখ কৰা অনুসৰি, ২০২৩-২৪ বৰ্ষত অসমৰ মুঠ ৰাজ্যিক ঘৰুৱা উৎপাদন হ’ল ৫,৭০,৯৪৪ কোটি টকা আৰু জনমূৰি আয় হ’ল ১,৩৯,৭৮৩ টকা। জনমূৰি আয় হিচাপত বছৰেকীয়া বৃদ্ধিৰ হাৰ হ’ল ১৭ শতাংশ। সেইদৰে ২০২৪-২৫ বৰ্ষত ৰাজ্যিক ঘৰুৱা উৎপাদন ৬,৪৩,৬৬৭ কোটি টকা, জনমূৰি আয় ১,৫৪,২২২ টকা। জনমূৰি আয়ৰ হিচাপত বছৰেকীয়া বৃদ্ধিৰ হাৰ ১০ শতাংশ।
