সদ্য প্ৰকাশিত এন আৰ চিৰ চূড়ান্ত তালিকাৰ পৰা বাদ পৰিছে এগৰাকী স্বাধীনতা সংগ্ৰামীৰ পৰিয়ালৰ ১৯জন সদস্যৰ নাম।
মুক্তিযোদ্ধা গৰাকীৰ নাতিয়েকে সংবাদ প্ৰতিষ্ঠানৰ আগত প্ৰকাশ কৰিছে এই কথা।
‘’মোৰ ককা আহমেদ আলী এগৰাকী স্বাধীনতা সংগ্ৰামী আছিল। তেওঁ এবছৰৰ বাবে ব্ৰিটিছৰ সেনা বাহিনীত যোগ দিছিল যদিও পাছত ভাৰতৰ স্বাধীনতা সংগ্ৰমাত যোগ দিয়ে। যিগৰাকীৰ নাম নিজেই বাৰতীয় নাগৰিকত্বৰ এক প্ৰমান সেইগৰাকী ব্যক্তিৰ পৰিয়ালৰেই আমাৰ নাম চূড়ান্ত এন আৰ চিৰ পৰা বাদ পৰিছে,’’-সংবাদ প্ৰতিষ্ঠানৰ আগত এইদৰে কয় আব্দুল ছামাদ চৌধুৰীয়ে।
তেওঁ জানিবলৈ দিয়া মতে সকলো নথি পত্ৰ থকাৰ পাছতো তেওঁলোকৰ পৰিয়ালৰ ১৯জন সদস্যৰ নাম চূড়ান্ত তালিকাৰ পৰা বাদ পৰিছে।
আনহাতে, তেওঁৰ মাতৃ আৰু ভগ্নীৰ নাম এন আৰ চিৰ চূড়ান্ত তালিকাত আছে।
এই ঘটনাই তেওঁৰ পৰিয়ালটোক অপমান কৰাৰ লগতে আচৰিতো কৰি তুলিছে।
কামৰূপ জিলাৰ কাউৰবাহাৰ এগৰাকী বাসিন্দা আব্দুল ছামাদ চৌধুৰী এআইয়ুডিএফৰ এগৰাকী নেতা।
চৌধুৰীয়ে সংবাদ প্ৰতিষ্ঠানক জানিবলৈ দিয়ে যে তেওঁলোকে নগাঁৱৰ এন আৰ চিৰ সেৱা কেন্দ্ৰত পৰিয়ালৰ সৈতে গৈ হাজিৰ হৈছিল। বিষয়াসকলে তেওঁলোকক বিদ্যালয়ৰ উত্তীৰ্ণ হোৱা প্ৰমান পত্ৰ দাখিল কৰিবলৈ কৈছিল আৰু শীঘ্ৰই বিষয়টো নিষ্পত্তি কৰাৰ আশ্বাস দিছিল।
অৱশেষত, তেওঁলোকৰ নাম এন আৰ চিৰ চূড়ান্ত তালিকাত নাহিল।
পৰিয়ালটোৱে উপযুক্ত নথি থকা সকলোৰে নাম তালিকাত অন্তৰ্ভুক্ত কৰিবলৈ এন আৰ চি কৰ্তৃপক্ষক অনুৰোধ জনাইছে।
