হাৰিয়ানাৰ আম্বালা জিলাৰ লগতে ইয়াৰ আশে-পাশে থকা কেইবাটাও অঞ্চলত বিষাক্ত মদ সেৱন কৰি ১৯ জন লোকৰ মৃত্যু হয়।
এই ঘটনাক লৈ এতিয়া গাঁওবাসীৰ মাজত সৃষ্টি হৈছে ব্যাপক প্ৰতিবাদ। ক্ষুব্ধ গাঁওবাসীয়ে সুৰা বিক্ৰেতাৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে। এই কেলেংকাৰীত স্থানীয় কংগ্ৰেছ নেতা আৰু জননায়ক জনতা পাৰ্টিৰ নেতাৰ পুত্ৰকে ধৰি মুঠ ৭ জন লোকক ইতিমধ্যে আৰক্ষীয়ে গ্ৰেপ্তাৰ কৰিছে।
বিগত কিছুদিনত হাৰিয়ানাৰ যমুনানগৰ জিলাৰ মাণ্ডেবাৰী, পাঞ্জেটো কা মাজৰা, ফুছগড়, সাৰণ অঞ্চলৰ গাঁৱে-ভূঞে আৰু আম্বালা জিলাৰ বিভিন্ন গাঁৱত একাধিক লোকৰ মৃত্যু ঘটিছে।
ইফালে অশুভ আত্মাৰ প্ৰভাৱত এইসকল লোকৰ মৃত্যু হোৱা বুলিহে স্থানীয় ৰাইজে অভিযোগ উত্থাপন কৰে।
অবৈধ মদ ভাঙ বিক্ৰীৰ অভিযোগত আৰক্ষীয়ে এই পৰ্যন্ত মুঠ ৭ জন লোকক গ্ৰেপ্তাৰ কৰিছে। লগতে গ্ৰেপ্তাৰ হোৱাসকলৰ ভিতৰত এজন স্থানীয় কংগ্ৰেছ নেতাৰ পুত্ৰও আছে বুলিও খবৰ আহিছে।
এই ঘটনাক লৈ ইতিমধ্যে বিৰোধী দলসমূহে ৰাজ্যখনৰ মনোহৰ লাল খট্টৰ চৰকাৰক আক্ৰমণ কৰিছে। বিৰোধীয়ে অভিযোগ উত্থাপন কৰে যে ৰাজ্যৰ বিজেপি চৰকাৰে বিগত সময়ত এনেধৰণৰ ঘটনাৰ পৰা কোনো শিক্ষা লোৱা নাই।
মদ্যপান কৰি মৃত্যু হোৱা ৭০ বছৰীয়া এজন ব্যক্তিৰ পুত্ৰ ৰণবীৰে কয় যে, যোৱা নিশা মোৰ দেউতাৰ মদ্যপানৰ ফলত মৃত্যু হৈছিল। মদৰ প্ৰতি তেওঁৰ প্ৰবল আসক্তি আছিল যদিও মদ্যপানৰ পৰিমাণ অতি কম আছিল। সেইদিনা দেউতাই যিসকলৰ লগত মদ খাইছিল, তেওঁলোকেও প্ৰাণ হেৰুৱাইছে।”
আৰক্ষীয়ে জনোৱা মতে, এই ঘটনাত এতিয়ালৈকে প্ৰাণ হেৰুৱাই পেলোৱা ১৯ জন লোকৰ ভিতৰত ২ জন উত্তৰ প্ৰদেশৰ প্ৰব্ৰজিত শ্ৰমিক। বৃহস্পতিবাৰে আম্বালা জিলাত তেওঁলোকৰ মৃত্যু হয়।
আৰক্ষীৰ মতে, যমুনানগৰ আৰু আম্বালা জিলাৰ বিভিন্ন স্থানীয় সুৰা ঘাটিত আৰক্ষীয়ে অভিযান চলাইছে। স্থানীয় আৰক্ষীয়ে যমুনানগৰৰ এটা পৰিত্যক্ত কাৰখানাৰ পৰা মুঠ ২০০ বাকচ ভেজাল দেশীয় সুৰা উদ্ধাৰ কৰে। অভিযুক্তৰ বিৰুদ্ধে উত্থাপিত অভিযোগৰ তদন্তৰ বাবে যমুনগৰ আৰক্ষীয়ে বিশেষ তদন্তকাৰী দল (SIT)ও গঠন কৰিছে।
