ভাৰতীয় সংসদীয় ইতিহাসত এইটো সম্ভৱতঃ প্ৰথমবাৰৰ বাবে ঘটিছে। বিৰোধী ‘INDIA’ মিত্ৰজোঁটে দেশৰ মুখ্য নিৰ্বাচন আয়ুক্ত জ্ঞানেশ কুমাৰক অপসাৰণৰ বাবে ৰাষ্ট্ৰপতিলৈ জাননী প্ৰেৰণৰ প্ৰস্তুতি চূড়ান্ত কৰিছে।
বাতৰি অনুসৰি, লোকসভা আৰু ৰাজ্যসভাকে ধৰি বিৰোধী শিবিৰৰ মুঠ ১৯৩জন সাংসদে এই অপসাৰণৰ দাবীত অনা দুখন জাননীত স্বাক্ষৰ কৰিছে। যদি সকলো ঠিকে থাকে তেন্তে শুকুৰবাৰে সংসদৰ অন্ততঃ এখন সদনত এই জাননী দাখিল কৰিব পাৰে।
ভাৰতৰ নিৰ্বাচন আয়োগৰ ইতিহাসত কেতিয়াও কোনো মুখ্য নিৰ্বাচনী আয়ুক্তক অপসাৰণৰ বাবে সংসদত আনুষ্ঠানিক জাননী দিয়া হোৱা নাই। ফলত বিৰোধীৰ এই পদক্ষেপক ৰাজনৈতিক মহলে অতি তাৎপৰ্যপূৰ্ণ আৰু অভূতপূৰ্ব বুলি গণ্য কৰে।
সূত্ৰ অনুসৰি ১৩০ জন লোকসভা আৰু ৬৩ জন ৰাজ্যসভাৰ সাংসদে এই জাননীত স্বাক্ষৰ কৰিছে। অৱশ্যে শুকুৰবাৰে কোনটো সদনত এই জাননী প্ৰথমে দাখিল কৰা হ’ব সেয়া এতিয়াও স্পষ্ট হোৱা নাই।
সংবিধান আৰু সংসদৰ নিয়ম অনুসৰি মুখ্য নিৰ্বাচনী আয়ুক্তক অপসাৰণৰ জাননীত লোকসভাৰ কমেও ১০০জন সাংসদৰ স্বাক্ষৰ প্ৰয়োজন হয়। আনহাতে ৰাজ্যসভাত এই সংখ্যা ৫০। ইতিমধ্যে বিৰোধীয়ে এই প্ৰয়োজনীয় সংখ্যাতকৈ বহু বেছি সাংসদৰ স্বাক্ষৰ সংগ্ৰহ কৰিছে।
সংবাদ সংস্থা পিটিআইক দিয়া এক সাক্ষাৎকাৰত বিৰোধী দলৰ এগৰাকী সাংসদে কয় যে, “জাননীখনত স্বাক্ষৰ কৰাৰ বাবে সাংসদসকলৰ মাজত যথেষ্ট উৎসাহ দেখা গৈছে। বৃহস্পতিবাৰেও কেইবাজনো সাংসদ স্বাক্ষৰ কৰিবলৈ আগবাঢ়ি আহিছিল যদিও তেতিয়ালৈকে প্ৰয়োজনীয় সংখ্যা পাৰ হৈ গৈছিল।”
সংসদত এই জাননী দাখিল কৰাৰ পিছত যদি এই জাননী গ্ৰহণ কৰা হয়, তেন্তে উচ্চতম ন্যায়ালয়ৰ ন্যায়াধীশৰ দৰেই মুখ্য নিৰ্বাচনী আয়ুক্তক অপসাৰণ বা ইমপিচমেন্টৰ প্ৰক্ৰিয়া আৰম্ভ হ’ব। মুখ্য নিৰ্বাচনী আয়ুক্তক পদৰ পৰা অপসাৰণ কৰিবলৈ সংসদৰ দুয়োটা সদনত উপস্থিত আৰু ভোটদান কৰা সদস্যৰ দুই তৃতীয়াংশ আৰু সংসদৰ মুঠ শক্তিৰ আধাতকৈ অধিক সমৰ্থনৰ প্ৰয়োজন।
ৰাজনৈতিক বিশ্লেষকসকলৰ মতে, লোকসভা নিৰ্বাচনৰ পিছৰে পৰা নিৰ্বাচন আয়োগৰ ভূমিকাক লৈ বিৰোধীয়ে সৰৱ হৈ পৰিছে। বিৰোধীয়ে ভোটাৰ তালিকাত বিভিন্ন অমিলৰ অভিযোগ উত্থাপন কৰি আহিছে যদিও জ্ঞানেশ কুমাৰে কোনো কথা শুনা নাই। SIR সম্পৰ্কীয় বিভিন্ন বিষয়ত বিৰোধীৰ সৈতে তেওঁৰ মতানৈক্য বাঢ়ি গৈছিল।
এই অপসাৰণৰ জাননী আৰু ইয়াৰ ওপৰত বিৰোধীয়ে ব্যাপক স্বাক্ষৰ কৰাটোৱে সেই সংঘাতক চৰম পৰ্যায়লৈ লৈ গৈছে। শুকুৰবাৰৰ পৰা সংসদৰ অধিৱেশন আৰম্ভ হ’লে এই বিষয়ত তীব্ৰ হুলস্থুল হ’ব পাৰে বুলি ৰাজনৈতিক পৰ্যবেক্ষকসকলে আশংকা কৰিছে।
