জনপ্ৰিয় পঞ্জাৱী গায়ক সিদ্ধু মুছেৱালা হত্যাকাণ্ডৰ গোচৰত অভিযুক্ত দুগৰাকী কয়দীৰ কাৰাগাৰৰ ভিতৰতে ৰহস্যজনক মৃত্যু ঘটিছে। পঞ্জাৱৰ তৰ্ণ তৰণ জিলাৰ গোইন্দৱাল চাহাব কেন্দ্ৰীয় কাৰাগাৰত কাৰাৰুদ্ধ হৈ থকা দুই গেংষ্টাৰ দেওবাৰে কয়দীৰ মাজত সৃষ্টি হোৱা সংঘৰ্ষত নিহত হয় বুলি আৰক্ষীয়ে জানিবলৈ দিয়ে।
এই সংঘৰ্ষত একেটা গোটৰে আন এগৰাকী কয়দীও আহত হয়। আহত কয়দীগৰাকীকো সিদ্ধু মূছেৱালা হত্যাকাণ্ডৰ গোচৰত গ্ৰেপ্তাৰ কৰা হৈছিল। জিলাখনৰ এগৰাকী শীৰ্ষস্থানীয় আৰক্ষী বিষয়াই জানিবলৈ দিয়া মতে, নিহত দুই কয়দীৰ বিৰুদ্ধে মুছেৱালা হত্যাকাণ্ডৰ লগতে অন্যান্য অভিযোগো আছিল।
আৰক্ষীৰ তথ্য মতে, নিহত দুই কয়দীক ক্ৰমে বটালাৰ মনদ্বীপ সিং ওৰফে টুফান আৰু বুধলাদাৰ নিবাসী মনমোহন সিং ওৰফে মোহনা বুলি চিনাক্ত কৰা গৈছে। আনহাতে সংঘৰ্ষত আহত কেশৱ নামৰ কয়দীগৰাকীক চিকিৎসালয়লৈ প্ৰেৰণ কৰা হয় বুলি আৰক্ষীয়ে জানিবলৈ দিয়ে।
আৰক্ষীয়ে সদৰী কৰা মতে, কোনো বিষয়ক লৈ কয়দীসকলৰ মাজত এই সংঘৰ্ষ সংঘটিত হয় আৰু অতি সোনকালেই পৰিস্থিতিয়ে উত্তপ্ত ৰূপ ধাৰণ কৰে। কাৰাগাৰৰ ভিতৰতে সূত্ৰপাত হোৱা এই সংঘৰ্ষত কয়দীসকলে বাচন-বৰ্তন আৰু লোহাৰ ৰড ব্যৱহাৰ কৰিছিল বুলি আৰক্ষীয়ে জানিবলৈ দিয়ে।
উল্লেখ্য যে, যোৱা বৰ্ষৰ ২৯ মে’ত পঞ্জাৱৰ মানছা জিলাত গুলীয়াই হত্যা কৰা হৈছিল জনপ্ৰিয় গায়ক তথা সিদ্ধু মুছেৱালা নামেৰে পৰিচিত শুভদীপ সিং সিদ্ধুক। মুছেৱালা হত্যাকাণ্ডই জোকাৰি গৈছিল সমগ্ৰ দেশ। এই হত্যাকাণ্ডত কুখ্যাত গেংষ্টাৰ লৰেন্স বিষ্ণৈ জড়িত থকাৰ প্ৰমাণ পোৱা গৈছিল।
হত্যাকাণ্ডৰ তদন্তৰ সময়ত মনদ্বীপ সিং ওৰফে টুফানক মনপ্ৰীত সিং ওৰফে মণি ৰায়ৰ সৈতে যোৱা বৰ্ষতে অমৃতসৰ জিলাৰ পৰা গ্ৰেপ্তাৰ কৰা হৈছিল। দুয়োগৰাকী জগু ভগৱানপুৰীয়া গেঙৰ মূল গুলীচালনাকাৰী বুলি আৰক্ষীয়ে জানিবলৈ দিয়ে।
প্ৰথম অৱস্থাত টুফান আৰু ৰায়ক সিদ্ধু মুছেৱালাক হত্যা কৰাৰ দায়িত্ব দিয়া হৈছিল যদিও গায়িকগৰাকীৰ চাৰিওফালে নিৰাপত্তাৰক্ষীৰ বেষ্টনী থকাৰ বাবে তেওঁলোক এই পৰিকল্পনা সম্পন্ন কৰিব পৰা নাছিল বুলি আৰক্ষীয়ে জানিবলৈ দিছিল।
মনমোহন সিং ওৰফে মোহনাৰ বিৰুদ্ধে যোৱা বছৰৰ জানুৱাৰী আৰু ফেব্ৰুৱাৰী মাহত মুছেৱালাৰ তথ্য যোগান ধৰাৰ অভিযোগত আৰু কেশৱৰ বিৰুদ্ধে মুছেৱালা হত্যাৰ পিছত গুলীচালনাকাৰীক এখন বাহন যোগান ধৰাৰ লগতে পলায়ন কৰাত সহায় কৰাৰ অভিযোগ উত্থাপন হৈছিল।
ইফালে কালিৰ ঘটনাৰ পাছতে ৰাজ্যখনৰ বিৰোধী দল শিৰোমণি আকালি দলে ঘটনাৰ আঁৰত গভীৰ ষড়যন্ত্ৰ শিপাই থকা বুলি অভিযোগ তোলে আৰু এই কাণ্ডৰ স্বতন্ত্ৰ তদন্তৰ দাবী কৰে। ৰাজ্যখনত আইন-শৃংখলাৰ অৱনতি ঘটা বুলি অভিযোগ তুলি দলটোৱে লগতে ‘জংগল ৰাজ’ৰ প্ৰাধান্য পোৱা বুলি সমালোচনা কৰে।
