শেহতীয়াকৈ প্ৰকাশ পোৱা ২০২৫ বৰ্ষৰ অসামৰিক সেৱা পৰীক্ষাৰ ফলাফলক লৈ সমগ্ৰ দেশতে এক অস্বাভাৱিক পৰিস্থিতিৰ সৃষ্টি হৈছে। ফলাফল ঘোষণাৰ পিছত দেখা গ’ল যে একে নামৰ আৰু একে ৰোল নম্বৰৰ দুগৰাকী প্ৰাৰ্থীয়ে একেলগে ৩০১ নং ৰেংক লাভ কৰা বুলি দাবী কৰিছে। এই ঘটনাই সামাজিক মাধ্যমত এক ব্যাপক চৰ্চাৰ সৃষ্টি কৰিছে আৰু প্ৰাৰ্থী দুগৰাকীৰ প্ৰমাণ পত্ৰক লৈ প্ৰশ্নৰ অৱতাৰণা কৰিছে।
ঘটনাৰ বিৱৰণী অনুসৰি, বিহাৰৰ এগৰাকী আকাংক্ষা সিঙে নিজকে ৩০১ নং ৰেংক পোৱা প্ৰাৰ্থী বুলি দাবী কৰিছিল। আনহাতে, দিল্লীত থকা আৰু মূলতঃ উত্তৰ প্ৰদেশৰ গাজীপুৰৰ এগৰাকী চিকিৎসক আকাংক্ষা সিঙেও একেটা ৰেংক নিজৰ বুলি ঘোষণা কৰে। বিভ্ৰান্তিৰ মূল কাৰণটো তেতিয়াই পোহৰলৈ আহে যেতিয়া দুয়োগৰাকী প্ৰাৰ্থীৰ ওচৰত একেটা ৰোল নম্বৰ ০৮৫৬৭৯৪ থকা এডমিট কাৰ্ড থকা বুলি জানিব পৰা যায়।
এই বিতৰ্কৰ মাজত দিল্লীৰ পৰা অহা চিকিৎসক আকাংক্ষা সিঙে এটা ভিডিঅ’ বাৰ্তাৰ জৰিয়তে নিজৰ স্থিতি স্পষ্ট কৰে। তেওঁ উল্লেখ কৰে যে তেওঁ এইমছ পাটনাৰ পৰা স্ত্ৰীৰোগ বিশেষজ্ঞ হিচাপে স্নাতক আৰু স্নাতকোত্তৰ ডিগ্ৰী লাভ কৰিছে। নিজৰ এডমিট কাৰ্ডৰ বাৰক’ড আৰু ৰোল নম্বৰৰ মিল থকাটো তেওঁৰ পক্ষত থকা আটাইতকৈ ডাঙৰ প্ৰমাণ বুলি তেওঁ ব্যক্ত কৰে। তেওঁ আশা প্ৰকাশ কৰিছে যে বাৰক’ড পৰীক্ষা কৰিলে সকলো স্পষ্ট হৈ পৰিব।
ইপিনে, বিহাৰৰ প্ৰাৰ্থীগৰাকীয়ে প্ৰদৰ্শন কৰা এডমিট কাৰ্ডত ৰোল নম্বৰটো মিলিছে যদিও বাৰক’ডত অন্য এটা নম্বৰ অৰ্থাৎ ০৮৫৬৫৬৯ থকা বুলি অভিযোগ উঠিছে। এনে পৰিস্থিতিত প্ৰকৃততে কোনগৰাকী প্ৰাৰ্থীয়ে এই স্থান লাভ কৰিলে আৰু কেনেকৈ একে নাম আৰু ৰোল নম্বৰৰ প্ৰাৰ্থীৰ ক্ষেত্ৰত এনে বিভ্ৰান্তি ঘটিল, সেয়া এতিয়া তদন্তৰ বিষয় হৈ পৰিছে। এই ঘটনাক লৈ ইউপিএছচি কৰ্তৃপক্ষৰ পৰা স্পষ্টীকৰণ বিচাৰিছে সাধাৰণ ৰাইজে।
