বিবাহত নৱবিবাহিত যুৱক-যুৱতীক উপহাৰ প্ৰদান কৰাটো এক পৰম্পৰাগত দৃশ্য। পিছে শুভাকাংক্ষীৰ পৰা লাভ কৰা এনে উপহাৰ যে মৃত্যুদূত স্বৰূপ হৈ পৰিব পাৰে, সেয়া জানো কল্পনা কৰিব পাৰি! পিছে এই অভাৱনীয় ঘটনাই সংঘটিত হৈছে ছত্তীশগড়ত।
ৰাজ্যখনৰ কবীৰ্ধম জিলাত এগৰাকী যুৱকে বিবাহত উপহাৰ হিচাপে লাভ কৰা হোম থিয়েটাৰ মিউজিক চিষ্টেম বিস্ফোৰণ ঘটাৰ ফলস্বৰূপে নৱবিবাহিত যুৱকগৰাকীৰ লগতে তেওঁৰ জ্যেষ্ঠ ভাতৃৰো মৃত্যু ঘটিছে।
এই শোকাৱহ ঘটনাত লগতে পৰিয়ালটোৰ আন চাৰিগৰাকী ব্যক্তি আহতো হৈছে। সোমবাৰে সংঘটিত হৈছে এই শোকাৱহ ঘটনা। ঘটনা সন্দৰ্ভত আৰক্ষীয়ে জানিবলৈ দিয়া মতে, বিস্ফোৰণৰ সঠিক কাৰণ এতিয়াও জানিব পৰা হোৱা নাই।
বিস্ফোৰণৰ প্ৰভাৱত হোম থিয়েটাৰ মিউজিক চিষ্টেমটো ৰখা কোঠাটোৰ দেৱাল আৰু চাল ভাঙি যায় বুলি আৰক্ষীয়ে জানিবলৈ দিয়ে। আনহাতে ঘটনাত নিহত দুৰ্ভগীয়া নৱবিবাহিত যুৱকগৰাকীৰ নাম হেমেন্দ্ৰ মেৰাৱী বুলি জানিব পৰা গৈছে।
প্ৰকাশিত খবৰ অনুসৰি, ২২ বৰ্ষীয় হেমেন্দ্ৰ মেৰাৱীয়ে ১ এপ্ৰিলত বিবাহপাশত আবদ্ধ হৈছিল। সোমবাৰে তেওঁ আৰু পৰিয়ালৰ আন সদস্যসকলে তেওঁৰ ঘৰৰ এটা কোঠাৰ ভিতৰত বিয়াৰ উপহাৰ খুলিছিল।
মেৰাৱীয়ে ইলেক্ট্ৰিক বৰ্ডৰ সৈতে তাঁৰ সংযোগ কৰাৰ পিছত হোম থিয়েটাৰ চিষ্টেমটো অন কৰাৰ লগে লগে এক বৃহৎ বিস্ফোৰণ ঘটে আৰু এই বিস্ফোৰণত মেৰাৱীৰ থিতাতে মৃত্যু হয়।
বিস্ফোৰণত তেওঁৰ ভাতৃ ৰাজকুমাৰ (৩০) আৰু ডেৰ বছৰীয়া এটি শিশুকে ধৰি আন চাৰিগৰাকী লোক আহত হোৱাৰ পিছত তেওঁলোকক কাৱৰাধাৰ জিলা চিকিৎসালয়লৈ লৈ যোৱা হয়।
কিন্তু পৰিয়ালটোলৈ আন এক বিভিষীকা নমাই আনি চিকিৎসাৰ সময়তে মৃত্যু হয় মেৰাৱীৰ ভাতৃৰ। আনহাতে আহত আনকেইগৰাকী লোক চিকিৎসালয়ত চিকিৎসাধীন হৈ আছে বুলি স্থানীয় আৰক্ষী বিষয়া এগৰাকীয়ে জানিবলৈ দিয়ে।
ইফালে খবৰ লাভ কৰাৰ পিছতে ফৰেনছিক বিশেষজ্ঞৰ সৈতে আৰক্ষীৰ এটা দল ঘটনাস্থলীত উপস্থিত হয়। কোঠাটো পৰিদৰ্শনৰ সময়ত বিস্ফোৰণ ঘটিব পৰা আন কোনো দ্ৰব্যৰ প্ৰমাণ পোৱা নগ’ল বুলি আৰক্ষী বিষয়াগৰাকীয়ে লগতে কয়।
বিস্ফোৰণৰ সঠিক কাৰণ এতিয়াও জানিব পৰা হোৱা নাই বুলি উল্লেখ কৰি তেওঁ লগতে তদন্তৰ পিছতহে এই সন্দৰ্ভত নিশ্চিত হ’ব পৰা যাব বুলি মন্তব্য কৰে।
