কোকৰাঝাৰ জিলাৰ পৃথক পৃথক স্থানত বিগত ২৪ ঘণ্টাত বজ্ৰপাত পৰাৰ ফলত এটি চাৰিবছৰীয়া শিশুসহ দুজন নিহত হোৱাৰ লগতে ১২ জন গুৰুতৰভাৱে আহত হয়।
বজ্ৰপাতত নিহত চাৰিবছৰীয়া শিশুটিক স্বামা বসুমতাৰী বুলি চিনাক্ত কৰা হৈছে। ঘটনাটো সংঘটিত হয় জিলাখনৰ পাতগাঁও আৰক্ষী চকীৰ অধীনৰ হেলেংবজাৰ কাচপুৰ অঞ্চলত।
নিহত আনজনক জিলাখনৰ বিছমুৰী ভূমিকা গাঁৱৰ ধন কুমাৰী ঘেলে(৩৮) বুলি চিনাক্ত কৰা হৈছে। প্ৰথম অৱস্থাত বজ্ৰপাতত গুৰুতৰভাৱে আহত মহিলা গৰাকীক চিকিৎসালয়লৈ নিয়া হয়। অৱশ্যে দুৰ্ভাগ্যবশত চিকিৎসকে মহিলাগৰাকীক মৃত বুলি ঘোষণা কৰে।
আনহাতে জিলাখনৰ বিভিন্ন ঠাইত হোৱা বজ্ৰপাতৰ ফলত ১২ জন লোক গুৰুতৰভাৱে আহত হয়। গুৰুতৰভাৱে আহত সকলোকে কোকৰাঝাৰ ৰূপনাথ ব্ৰহ্ম অসামৰিক হস্পিতাললৈ প্ৰেৰণ কৰি চিকিৎসা প্ৰদান কৰি থকা হৈছে।
গুৰুতৰভাৱে আহতকেইজনক ক্ৰমে সৰন কিস্কু (২৫), সনাতন হাসদা (২৪), নীলা হাসদা (১৭), চৰন টুডু (১৩), সজেন মুছাহাৰী(৪০), দিদম মুছাহাৰী (১৫), অফশ্বৰ আলী শেইখ (২৬), ৰবিকা বিবি (১৯), আকলেমা বিবি (২৪), অনঠাও ব্ৰহ্ম(১২), ধনমানিক ব্ৰহ্ম (১৩) আৰু বুহা খাকলাৰ (৬৯) বুলি চিনাক্ত কৰা হৈছে।
