ভাৰতীয় ৰেলৱেই গুৱাহাটীৰ পৰা উত্তৰ-পূবৰ বাহিৰলৈ দুখন ব্যক্তিগত ৰে’ল চলোৱাৰ পৰিকল্পনা কৰিছে।
বাতৰিমতে, ৰেলৱেই দেশৰ ১০০টা নিৰ্বাচিত পথত ব্যক্তিগত ৰে’ল চলোৱাৰ পৰিকল্পনা কৰিছে আৰু গুৱাহাটীও তাৰ অন্তৰ্ভুক্ত হৈছে।
ৰে’ল দুখনৰ পথ দুটা হ’ব গুৱাহাটী-মুম্বাই আৰু গুৱাহাটী-তিৰুৱনন্তপুৰম।
উত্তৰ-পূবৰ ভিতৰত কেৱল গুৱাহাটীৰ পৰা এই ব্যক্তিগত ৰে’লসেৱা আৰম্ভ কৰা হ’ব।
দেশজুৰি মুঠ ১৫০খন যাত্ৰীবাহী ৰে’ল চলোৱাৰ পৰিকল্পনা কৰা হৈছে।
শীৰ্ষ ৰে’ল বিষয়াৰ উদ্ধৃতিৰে প্ৰকাশিত বাতৰিত কোৱা হৈছে, পৰিকল্পনাটোক যোৱা ১৯ ডিচেম্বৰত বিত্ত মন্ত্ৰ্যালয়ৰ পি পি পি এ চি (Public Private Partnership Appraisal Committee)এ সেউজ সংকেত দিছে।
মন্ত্ৰ্যালয়ে ৰেলৱেক ব্যক্তিগত নিবিদা আহ্বানৰ বাবে অনুমতি দিছে আৰু পৰৱৰ্তী মাহৰ ভিতৰতে এই কাম সম্পাদন কৰা হ’ব।
ৰেলৱে ব’ৰ্ডৰ সঞ্চালক বিনোদ কুমাৰ য়াদৱে ব্যক্তিগত ৰে’লৰ পথ চিনাক্তকৰণৰ তথ্য নিশ্চিত কৰিছে।
যোৱা ৪ অক্তোবৰত লক্ষ্ণৌ আৰু নতুন দিল্লীৰ মাজত দেশৰ প্ৰথমখন ব্যক্তিগত ৰে’ল তেজছ এক্সপ্ৰেছ মুকলি কৰা হৈছিল।
অহা ১৭ জানুৱাৰিত আহমেদাবাদ আৰু মুম্বাই চেণ্ট্ৰেলৰ মাজত ভাৰতৰ দ্বিতীয়খন ব্যক্তিগত ৰে’লৰ যাত্ৰা আৰম্ভ হ’ব।
