ইটোৰ পিছত সিটো নাৰী উৎপীড়ন কাণ্ডই জোকাৰিছে দেশ। এইবাৰ পোহৰলৈ আহিছে ছত্তীশগড়ৰ এক দলবদ্ধ ধৰ্ষণৰ ঘটনা। ৰাজ্যখনৰ ৰায়পুৰত দলবদ্ধ ধৰ্ষণৰ বলি হৈছে দুই ভগ্নী।
প্ৰকাশিত খবৰ অনুসৰি, ভুক্তভোগী দুই ভগ্নীৰে এগৰাকীৰ ভাবী স্বামীৰ সৈতে ৰাখী বন্ধন উদযাপন কৰি উভতি অহাৰ সময়তে দুই ভগ্নীক দলবদ্ধ ধৰ্ষণ কৰা হয়।
দহজনীয়া দুৰ্বৃত্তৰ এটা দলে বলপূৰ্বকভাৱে পথ অৱৰোধ কৰি এই ঘৃণনীয় কাণ্ড সংঘটিত কৰে বুলি জানিব পৰা গৈছে। আৰক্ষীয়ে উল্লেখ কৰা মতে, দুই ভগ্নী আৰু তেওঁলোকৰ সংগীক প্ৰথমে তিনি দুৰ্বৃত্তই পথ আগচি ধৰে।।
দুৰ্বৃত্তৰ দলটোৱে তিনিওৰে পৰা নগদ ধন আৰু মোবাইল ফোন কাঢ়ি নিয়াৰ অভিযোগ উত্থাপন হৈছে। ইয়াৰ পিছতে আন সাতগৰাকী অভিযুক্ত মটৰ চাইকেলেৰে সেই স্থানত উপস্থিত হয়।
অভিযুক্ত দুৰ্বৃত্তৰ দলটোৱে দুই ভগ্নীৰ লগত থকা যুৱকগৰাকীক প্ৰহাৰ কৰি ভগ্নী দুগৰাকীক মূল পথৰ পৰা টানি বিচ্ছিন্ন স্থানলৈ লৈ যায় আৰু দলবদ্ধ ধৰ্ষণ কৰা বুলি অভিযোগ উত্থাপন হৈছে।
এই ঘটনাৰ বিষয়ে খবৰ লাভ কৰাৰ লগে লগে আৰক্ষীয়ে গোচৰ ৰুজু কৰে আৰু তাৎক্ষণিক অভিযান চলাই দহ অভিযুক্তক গ্ৰেপ্তাৰ কৰে।
ধৃত অভিযুক্তসকলৰ মাজত স্থানীয় এগৰাকী বিজেপি নেতাৰ পুত্ৰও আছে বুলি জানিব পৰা গৈছে। ঘটনাৰ মূল অভিযুক্ত বুলি সন্দেহ কৰা পুনম ঠাকুৰ স্থানীয় বিজেপি নেতা লক্ষ্মী নাৰায়ণ সিঙৰ পুত্ৰ।
পূৰ্বেও অপৰাধমূলক কাৰ্যকলাপত জড়িত থকাৰ ইতিহাস থকা পুনম ঠাকুৰক শেহতীয়াকৈ ২০২৩ চনৰ আগষ্ট মাহত জামিনত মুকলি কৰি দিয়া হৈছিল।
