আগন্তুক ২০২৬ চনৰ অসম বিধানসভা নিৰ্বাচনৰ প্ৰতি লক্ষ্য ৰাখি কংগ্ৰেছ দলে পূৰ্ণগতিত প্ৰস্তুতি আৰম্ভ কৰিছে। এই নিৰ্বাচনী যুঁজৰ ৰণনীতি তৈয়াৰ কৰিবলৈ মঙলবাৰে সন্ধিয়া দিল্লীত এক বিশেষ গুৰুত্বপূৰ্ণ বৈঠক অনুষ্ঠিত হয়।
নিখিল ভাৰত কংগ্ৰেছ কমিটীৰ সভাপতি মল্লিকাৰ্জুন খাৰ্গে আৰু লোকসভাৰ বিৰোধী দলপতি ৰাহুল গান্ধীয়ে অসম কংগ্ৰেছৰ এক শক্তিশালী দলৰ সৈতে আলোচনাত মিলিত হয়। অহা বছৰৰ মাৰ্চ-এপ্ৰিল মাহত অনুষ্ঠিত হ’বলগীয়া বিধানসভা নিৰ্বাচনৰ প্ৰস্তুতিৰ লগতে কেইবাটাও গুৰুত্বপূৰ্ণ বিষয় এই বৈঠকত আলোচনাৰ মূল কেন্দ্ৰবিন্দু আছিল।
এই উচ্চস্তৰীয় আলোচনাত প্ৰদেশ কংগ্ৰেছৰ সভাপতি তথা সাংসদ গৌৰৱ গগৈ, কে চি বেণুগোপাল, জীতেন্দ্ৰ সিং, বিৰোধী দলপতি দেৱব্ৰত শইকীয়াকে ধৰি অসমৰ একাধিক শীৰ্ষ নেতা উপস্থিত আছিল।
আলোচনাৰ অন্তত সংবাদ মাধ্যমক সম্বোধন কৰি প্ৰদেশ কংগ্ৰেছৰ সভাপতি গৌৰৱ গগৈয়ে স্পষ্ট কৰি দিয়ে যে কেন্দ্ৰীয় নেতৃত্বৰ মূল লক্ষ্য হৈছে ‘২০২৬ চনত অসমক বিজেপি মুক্ত হিচাপে গঢ়ি তোলা’। তেওঁ কয় যে তেওঁলোকে ৰাহুল গান্ধী আৰু মল্লিকাৰ্জুন খাৰ্গেৰ সন্মুখত ৰাজ্যৰ প্ৰধান সমস্যাসমূহ উত্থাপন কৰে আৰু কংগ্ৰেছৰ নেতৃত্বই এই কথাবোৰক যথেষ্ট গুৰুত্ব সহকাৰে লৈছে।
গগৈয়ে সদৰী কৰে যে দীঘলীয়া আৰু ফলপ্ৰসূ আলোচনাত কেন্দ্ৰীয় নেতৃত্বই বিধানসভাত জনসাধাৰণৰ সমস্যা কেনেদৰে উত্থাপন কৰা হৈছে সেই বিষয়ে বুজ লয় আৰু বৰ্তমানৰ প্ৰস্তুতিৰ বাবে দলক সমৰ্থন আগবঢ়ায়। বিজেপি মুক্ত অসমৰ বাবে সকলো ধৰণৰ সমৰ্থন আগবঢ়োৱাৰ আশ্বাসো কেন্দ্ৰীয় নেতৃত্বই দিয়ে বুলি তেওঁ জানিবলৈ দিয়ে।
গৌৰৱ গগৈয়ে কয় যে বৈঠকৰ মাজতে ৰাহুল গান্ধীয়ে অসমৰ শিল্পী জুবিন গাৰ্গক স্মৰণ কৰে।
নতুন দিল্লীত অনুষ্ঠিত হোৱা এই গুৰুত্বপূৰ্ণ বৈঠকত নিখিল ভাৰত কংগ্ৰেছ কমিটীৰ সভাপতি, লোকসভাৰ বিৰোধী দলপতি, সাধাৰণ সম্পাদককে ধৰি প্ৰদ্যুৎ বৰদলৈ, ৰকিবুল হুছেইন, দেৱব্ৰত শইকীয়া, ভূপেন কুমাৰ বৰা, ৰিপুণ বৰা, ৰ’জলিনা তিৰ্কী , জাকিৰ হুছেইন শিকদাৰ, প্ৰদীপ সৰকাৰ আদি নেতা সকল উপস্থিত থাকে।
